¹ Idi punganay, pinarsua ti Dios dagiti langit ken ti daga. ² Idi inrugina a parsuaen ti daga, awan langlangana daytoy ken awan nagianna. Nakasipsipnget ti entero a rabaw ti adalem a danum. Ket agtigtignay ti Espiritu ti Dios iti rabaw ti danum. ³ Kinuna ti Dios, "Mapaadda ti lawag," ket immadda ti lawag. ⁴ Naay-ayo ti Dios iti lawag. Ket adda ti tiempo ken disso a pinagraniagna ti lawag, kabayatan nga iti dadduma a disso ket nasipnget pay laeng. ⁵ Inawaganna ti lawag iti "aldaw," ken inawaganna ti sipnget iti "rabii." Daytoy ket rabii ken bigat, ti immuna nga aldaw. ⁶ Kalpasanna kinuna ti Dios, "Mapaadda ti law-ang a mamagsina iti danum iti dua a paset." ⁷ Ket dayta ti napasamak. Inaramid ti Dios ti law-ang a namagsina iti danum nga adda iti ngatoenna manipud iti danum nga adda iti daga nga adda iti babaenna. ⁸ Pinanaganan ti Dios ti law-ang iti "langit." Daytoy ket rabii ken bigat, ti maika-dua nga aldaw. ⁹ Ket kinuna ti Dios, "Agtitipon dagiti danum nga adda iti baba ti tangatang, ket agparang ken agpangato ti namaga a disso manipud iti danum." Ket kasta ti napasamak. ¹⁰ Pinanaganan ti Dios ti namaga a disso iti "daga," ken pinanagananna dagiti danum a nagmaymaysa iti "taaw." Naay-ayo ti Dios iti daga ken kadagiti taaw. ¹¹ Ket kinuna ti Dios, "Mangpataud ti daga iti adu a kita ti mula a makapagpaadu - mulmula a mangpataud kadagiti bukel ken kaykayo nga agbunga iti adda bukelna." Ket kasta ti napasamak. ¹² Ket nagtubo dagiti mula iti rabaw ti daga. Nangrugi a mangpataud ti tunggal kita ti mula kadagiti bukel ken bunga nga adda bukelna. Naay-ayo ti Dios kadagiti mula ken kaykayo. ¹³ Daytoy ket rabii ken bigat, ti maika-tallo nga aldaw. ¹⁴ Ket kinuna ti Dios, "Agraniag dagiti adu a silaw iti tangatang. Dagitoyto ti agserbi a pagilasinan iti aldaw manipud iti rabii. Babaen iti panagbaliw ti langada, maipakitanto ti tiempo para kadagiti nadumaduma a fiesta, ken dadduma pay a banbanag nga ar-aramiden dagiti tattao no kasta a dumteng dagiti kasta a tiempo ken dagiti kasta a tawtawen. ¹⁵ Kayatko met a raniagan dagitoy a silaw ti rabaw ti daga." Ket kasta ti inaramidna. ¹⁶ Inaramid ti Dios ti dua kadagitoy a silaw a nakadakdakkel. Inaramidna ti init nga isu ti kadadakkelan a silaw nga agraniag iti aldaw, ken ti bulan nga isu ti basbassit a silaw nga agraniag iti rabii. ¹⁷ Inkabil amin ti Dios dagitoy iti tangatang tapno agraniag iti rabaw ti daga, ¹⁸ nga agraniag iti aldaw ken iti rabii, ken mamagsina iti lawag ti aldaw manipud iti sipnget ti rabii. Naay-ayo ti Dios kadagiti silaw. ¹⁹ Daytoy ket rabii ken bigat, ti maika-uppat nga aldaw. ²⁰ Ket kinuna ti Dios, "Mapunno dagiti danum kadagiti amin nga agbibiag a pinarsuak, tunggal parsua a kabaelanna ti agpaadu; ken inaramidko met a makapagpaadu ti tunggal kita dagiti agtaytayab iti tangatang iti amin a henerasion." ²¹ Pinarsua ngarud ti Dios dagiti dadakkel a parsua iti taaw ken tunggal kita dagiti dadduma a parsua nga aglanglangoy ken aguummong iti danum, ken inaramidna amin dagitoy a makapagpaadu. Pinarsuana met dagiti adu a kita iti billit nga adda payyakna, ken inaramidna dagitoy a makapagpaadu. Naay-ayo ti Dios kadagitoy. ²² Binendisionan ngarud ti Dios dagitoy. Kinunana, "Aganakkayo ket agpaadukayo. Kayatko nga agnaed iti amin a paset ti danum dagiti parsua nga adda iti danum, kasta met a dagiti billit ket agpaadu." ²³ Daytoy ket rabii ken bigat, ti maika-lima nga aldaw. ²⁴ Ket kinuna ti Dios, "Mangaramidak iti nadumaduma a kita ti ayup nga agnaed iti rabaw ti daga. Addanto dagiti adu a kita iti naamo nga ayup, dagiti parsua nga agkarkarayam iti daga, ken dadakkel a naatap nga ayup." Ket kasta ti inaramidna. ²⁵ Nangaramid ti Dios kadagiti amin a kita ti naatap ken naamo nga ayup, kasta met kadagiti parsua nga agkarkarayam iti daga. Makapagpaaduda amin iti kalanglangada. Naay-ayo ti Dios kadakuada. ²⁶ Ket kinuna ti Dios, "Mangaramidtayo iti tattao a kaaspingtayo. Kayatko nga iturayanda dagiti lames iti baybay, dagiti billit iti tangatang, dagiti amin a naamo nga ayup, ken dagiti amin a dadduma pay a parsua nga aggargaraw iti rabaw ti daga." ²⁷ Pinarsua ngarud ti Dios ti tao a kaaspingna iti adu a wagas. Inaramidna dagitoy a kalanglangana. Pinarsuana ida a lalaki ken babai. ²⁸ Binendisionan ida ti Dios, a kunana, "Aganakkayo iti adu, ket masapul nga agnaedda iti entero a daga ken iturayanda daytoy. Kayatko nga iturayanyo dagiti lames iti baybay ken dagiti billit iti tangatang ken dagiti amin nga agkarkarayam iti rabaw ti daga." ²⁹ Kinuna ti Dios, "Kitaenyo, intedkon amin kadakayo dagiti mulmula a mangpatpataud kadagiti bukel iti entero a daga ken amin a kaykayo nga agbungbunga. Agpaay amin dagitoy a taraonyo. ³⁰ Intedko dagiti amin a nalalangto a mulmula kas taraon kadagiti amin a naatap nga ayup, kadagiti billit ken kadagiti amin nga agkarkarayam iti daga, dayta ket agpaay iti amin a masapul nga aganges tapno biag. Ket dayta ti inaramidna. ³¹ Naay-ayo ti Dios iti amin nga inaramidna. Pudno nga amin ket nasayaat. Daytoy ket rabii ken bigat, ti maika-innem nga aldaw.