¹ १)फरीसी पोंथवावा माणहोम एक माणुह ओतु,तेर नाव नीकुदेमुस ओतो, च्यु येहुदी दोरमोन पोंचुन पुढारी ओतु।. ² २) एक दीह राती च्यु यीसु हाते आव्यु,एने कोयु ए गुरु आमुह मालुम से के तु आमुह ही हिकाडणे बोगवानो खेर दोखु आवलु से ,काहाके ज़ोर बोगवान एक माणहो हाते नी रोये ते तु केहे काय चमत्कार कोरतलु ,तेहे नी कोर सोकतलु । ³ ३) च्यु होबीन यीशु कोयु मी खोराखोर तोहो कोयतलु ,एक आयतलु पुरूयु जोनम ओयतलु ,तोहलो एक माणुह फोसु नोवलु नी बोणे,ताहलोगोण च्यु बोगवानोन राज नी देख सोकतलु।. ⁴ ४)ओवतु नीकुदेमुस कोयु,आह एक माणुह डायलु ओयीन फोसु केंहे काय नोवलो जोनमो ली सोकतलु,च्यु काय आयीन पेटोमा जायीन दुसरी वार जोनमो ली सोकतलु के। ⁵ ५)यीसु तीनाह कोयु,मी खोराखोर तोहो कोयतलु,जोर कुण बी पाणी एने पवित्र आत्मामा जोनम नी लेये ते च्यु बोगवानोन राज ना जाय सोकतलु । ⁶ ६) एक माणुह आय बाबा दोखु डीलो हाते पोयदाओयतलु, पुण बोगवानोन पवित्र जीव आत्मा ओतरोज माणहोह बोगवानोन नोवलो आत्मा आपतली। ⁷ ७) मी तुमु आखा फोसा नोवलो जोनमो लेणु जुवे, कोरीन मी तुमुह कोयतलु,यो होंबीन तु बोंगलाये मा।. ⁸ ८) वाहवु तीनह ज्याहारी पोटतलो च्यांहारी सुटतलू,तु तेरो आवाज होंबीव सोकतलु,पुण च्यु काहारी दोखु आवतलु,एने काहारी जातलु तोहो काय नी मालुम रोयतलो,तोहलो एक माणुह पवित्र आत्मामा केहेक नोवली जीवायोन जोनम लेतलु, च्यो मालुम नी रोयतलो। ⁹ ९) यो होंबीन नीकुदेमुस कोयु,यो केहेंक ओय सोकतलो।

¹⁰ १०) यीसु तीनाह जोपाप आप्यु,तु ते इसरायेली माणहोन खास गुरु से,ती बी एवी लोगोण नी सोमज्यू के। . ¹¹ ११) मी तुमुह खोराखोर कोयतलु,ज्यो काय आमु देखली एने जाणतला,च्यो आमु तुमुह गोवयी कोयापतला,पुण तुमु आमरी गोवायी पोर बुरहु नी कोरतला। ¹² १२) जोर खोरी इन दोरतीन बारामा मी तुमुह कोयलु ते, तुमु मेहेपोर बुरहु नी कोरतला,ते जोर मी सोरगोन काय ओयहे, कोरीन तुमुह कोयीह ते तुमु मारु कहेकाय बुरहु कोरहोत।. ¹³ १३)काहाके मी माणहोन पुरयु, सोरगे दोखु दोरती पोर आवलु एने फोसु सोरगोमा जाण्यु से, एंवी लोगोण कुण बी ओहलो सोरगोमा नी गोया। ¹⁴ १४) एने मुसा तांबान गोडघहा उजाडी जागामा खांबापोर टांगलु तोहलो माणहोन पुरयाह, मोंजे में हे बी कुरुस खांबा पोर चोडावणेम आवहे। ¹⁵ १५) कोरीन ज्यु कुण मारपोर बुरहु कोरहे,ते तीनुह ओमोर जीवाय जुडहे। ¹⁶ १६) काहाके बोगवान कोवीन पापी माणहोह ओतरु मोंग कोरयु के ,च्यु तेर एखला पुरयाह तींदरे बोदले मोरने कोलीन आप देल्लु, काहाके च्यु कुण तीनापोर बुरहु कोरहे ,च्यु नास नी ओये, पुण ओमोर जीवाय सापडावहे।

¹⁷ १७) काहाके बोगवान सोतान पुरयाह इन दुनीयान माणहोह नीयाव कोरीन डोंड आपणे नी,पुण माणहोह पाप दोखू वाचाडने मुकोल्लु से।. ¹⁸ १८) जोर कुण बोगवानोन बेटा पोर बुरहु कोरतलु, ते बोगवान तीनाह गुनावालु नी ठेरावे, पुण च्यु बोगवानोन एकुज बेटान नावोपोर बुरहु नी कोरे, तीनाह बोगवान गुनावलु ठोरावहे,काहाके च्या बोगवानोन एकुज पुरयापोर बुरहु नी कोरया। ¹⁹ १९) तीनामा बोगवान माणहोन नीयाव कोरीन डोंड ठोरावलु के उज्यावो इन दुनीयामा आवलो,पुण माणहोह उज्यावा दोखो आंदारलो खुब पोटलो,काहाके च्या खोराब काम ²⁰ कोरतोता।. २०) जोर कुण खोराब काम कोरतलु,ते तीनाह उज्यावो नी पोटतलो,एने च्यु उज्यावान आहनु जाहे,ते तेरो खोराब काम देखाय जाहे।. ²¹ २१) पुण ज्यु कुण खोरो काम कोरे,ते च्यु उज्यावाखेर खुसीमा आवतलु,कोरीन आखा माणहोह देखाय जाहे, के च्यु बोगवानोन इस्या दोखु आखो काम कोरतलु। ²² २२)ओवता यीसु एने तेर चेला येरुसलेम सेहर दोखा येहुदीया जिलामा आव्या,च्याहरी तेर चेला हाते रोयीन यीसु माणहोह बापतीस्मा आपतोतु ²³ २३)तीने टेमे एनोन नावोन जागे सालेम गांवो हाते युहन्ना बी माणहोह बापतीस्मा आपतोतु,च्यांहारी खुब पाणी ओतो ,एने होंटा माणहे च्यांहरी आवीन बापतीस्मा लेतोता।. ²⁴ २४) तेतार युहन्नाह जेलोम काय नी कुंडया ओता। ²⁵ २५) एकवार थुडाक येहुदी माणहे, युहन्नान चेलानु हाते तीदंरी सुखलो कोरनेन रीतोन बारामा जोखडी पोड गोया।. ²⁶ २६) युहन्नान चेला युहन्ना हातेगोया, एने कोया ए गुरु च्यु माणुह तारहाते ओतु, एने तु बी तेर बारामा गोवायी आपलु ओतु,च्यु योरदान खुदरान पोल्लीखेर माणहोह बापतीस्मा आपतलु,एनेआखा माणहे बी तीनापाह जातला। ²⁷ २७) ओवतु युहन्ना कोयु, ज़ोर काल्ला बी माणहोह सोरग दोखो काय बी नी आवणेम आवे, ताहलोगोण तीनाह काय बी नी जुड़े। ²⁸ २८) तुमु मारु पुरावु से के, मी काय कोयतु ओतु,मी मोसी नम्बे,पुण बोगवान मेहे तेर ओगोव मुकोल्लु से। ²⁹ २९) नोवलवाडी नोवरदवोन से,नोवरदेवोन दुस्ती ज्या तेर कोरता वाट जुवतला, एने तेरो होंबोवतला,एने नोवोरदेवोन आवाज होंबोवताज खुस ओय जातला ,तोहलीज मी तेर जोकाम कामोपोर खुसीमा बोराय गोयु।

³⁰ ३०) येसुन इज्जुत खुब वोडती जणु जुवे, मारी इज्जुत कोमी ओयती जणु जुवे। ³¹ ३१) ज्यु कुण सोरगे दोखु आवतलु,च्यु आखा दोखु खुब मोटलु से,पुण ज्यु दोरती दोखु से, च्यु दोरतीनजु से,एने दोरतीन बारामा वातु कोरतोतु,यीसु ओतरुज सोरगोम दोखु आवलु च्यु आखा दोखु खुब मोटु से।

³² ३२) ज्यो काय च्यु सोरगोमा देखलु एने होंबोवलु, तेर बारामा गोवायी कोयतलु ती बी कुण बी तेरी गोवायी नी मानतला।. ³³ ३३) पुणे ज्या कुण तेरी गोवायी मान लेतला ,च्या पोक्का कोय देतला,के बोगवान खोरु से। ³⁴ ३४) काहाके जीनाह बोगवान मुकोल्लु, च्यु बोगवान बारामा वातु कोरतला,काहाके बोगवान तीनाह पुरुन पुरु चुखली आत्मा आप रोयलु।

³⁵ ३५) बाह सुराह मोंग कोरतलु, ते तेर आव्योमा तेर आखी ताकोत आप देल्लु। ³⁶ ३६) ज्यु बी बोगवानोन पुरया पोर बुरहु कोरहे,होमेस्यान जीवाय तेरीज से, बाकीन ज्यु तीनापोर बुरहु नी कोरे, तीनाह जोलोम कीज जीवाय जुडेज नी,एने बोगवानोन सोताप तीना पोर रोयहे।