¹ १) यीसु फासका तीवारोन सोव दीहोन पेल, बेतनीया गावमा आवलु जीनाह,यीसु मोतोम दोखु जीवतु कोरलु, च्यु लाजरस बी तीना गावोन ओतु।

² २) गांव मा एक जागे यीसुन कोरता खाणे बोणावला ओता ,च्यांहरी यीसु हाते खाणे ज्या बोठला ओता, तीनुहाते लाजरस बी ओतु च्यांहरी मारथा तीनुह खाणे वाटतोती।

³ ३) एने मोरीयम आरदु लीटर मोंगलो पीवर आतोर लावीन,यीसुन पायपोर रेचवी, एने तेर जुटा कोरीन तेरा पाये नुसी तीन आत्तोरोन वास,आखा गोरमा गोंदायणे बाज गोया। ⁴ ४) येसुदास इस्कारीयोत ज्यु यीसुन चेला मायलु एक एने यीसुह दोरीन आपणारू ओतु च्यु कोयु।

⁵ ५) जोर तु यो आतोर वेचीन च्या एक सालोन कोमायीन बारोबोर ओहे च्या पोयहा जोर तु गोरीब माणहोह आप देती ते हाजो रोयतो

⁶ ६) च्यु गोरीब माणहोन फीकुर कोरतोतु कोरीन एंहे नी कोयु पुण च्यु चुहे ओतु ,एने आखा चेलान पोयहा तेंर जोबाबदरीमा ओता च्यु गोडी गोडी तीन खुतवीमा दोखु चुराये चुराये पोयहा काडतोतु ⁷ ७) तेतार यीसु यो कोयु इनीही सुड देवु यी बायी मार डीलोपोर आत्तोर रेचवीन मी मोरलु पेलुज मार दोडोह वोगे कोरनेन रीतोन तीयारी कोरली से।

⁸ ८) काहाके गोरीब माणहे तुमु हाते जोलम रोयहे पुण मी तुमु हाते जोलमकु नी रोयो। ⁹ ९) येहुदीया मायला खुब होंटा माणहे यीसु बेतनीया गावमा से कोरीन जाण लेयदा कोरीन च्या च्याहारी गोया एने च्या लाजरसोह बी देखणे हुत्तोता काहके यीसु तीनाह मोरलाम दोखु जीवतु कोरलु ओतु।

¹⁰ १०) पुण मुखी पुजारा लाजरसोह बी मारने होमचु कोरया।

¹¹ ११)काहाके यीसु लाजरसोह जीवतु कोरलु देखीन, खुब येहुदी माणहे तीनुह सुडीन यीसु पोर बुरहु कोरया। ¹² १२) दीहरे दीह फासका तीवार वावनेन कोरता आवला ओता,माणहोन मोटलु टुवु होंब्या के ,यीसु यरुसलेमोमा आवणे बाज रोयह।

¹³ १३) माणहे खारकान जोडान डाब्या लीन,यीसुह मीवायणे गोया,एने च्या आयडीन कोया,होसन्ना ज्यु इसरायेली माणहोन राजा बोणीन मालक बोगवानोन नावोमा आवतलु से,च्यु बोरकोतवावु से । ¹⁴ १४) यीसुह गोदडान एक बोच्चो जुडयो ते,च्यु तीनापोर बोठयु बोगवानोन पुस्तोकोमा एंहे लेखाय रोयलो ओतो के।

¹⁵ १५)ए सीय्योन सेहरोन माणहो , तुमु बीवु मा देखु तुमरु राजा तुमु हाते आवणे बाज रोयुह ,काहाके तुमरु राजा गोदडान बोच्चा पोर बोठीन आवणे बाज रोयुह। ¹⁶ १६) यीसुन चेला यी वात पुरी ओयली , कोरने नी जाणतोता पुण जेतार मोरयु,एने ओवतु यीसु मोसी सोरगोमा मोहीमामा गोयु, तेतार च्या यी वात तींदरा डुवान ओगोव पुरी ओयली कोरीन ओर कोरया । ¹⁷ १७) तेतार गोरदी मायला माणहे यीसु लाजरसोह मोटटयाम दोखु बुलाडीन जीवतु कोरलु देखला ओता, च्या दीहरा माणहोह तेर बारामा पुरावु आपतोता। ¹⁸ १८) च्यु ओहलो मोटलो चोमत्कारोन काम कोरलु कोरीन,खुब माणहे यीसुह मीवायणे गोया। ¹⁹ १९) यो देखीन फारीसी पोंथवाला माणहे तींदरे तींदरे वातु कोरया देखु,आपहु कायीज नी बोणतलो,आखी कोवीन माणहे तेर फोसोव जातला। ²⁰ २०) ज्या माणहे फासका तीवारोमा बोकती कोरने आवला ओता,च्या थुडाक युनानी माणहे बी ओता। ²¹ २१) च्या फीलीप्पुसी पाह आवीन कोया,ए मालोक आमु यीसुह देखणे हुत्तला,युफीलीप्पुस गोलील जीलान बेतसायदा वावा यीसुन चेला ओता। ²² २२) ओवतु फीलीप्पुस आवीन आंदरीयासोह कोयु, एने च्या जायीन यीसुह कोया। ²³ २३) मोंग यीसु कोयु,च्यु टेम आव लागलु से,माणहोन पुरयु मोंजे मारी बोडायी ओयहे । ²⁴ २४) मी तुमुह खोराखोर कोयोह के जाहलोगोण गोवोन दाणु दोरती पोर पोडीन नी मोरे, ताहलोगोण च्यु एखलु रोयहे पुण जेतार च्यु मोरहे ते होंठों फोव लावहे। ²⁵ २५) तोहलो ज्यु कुण इनी कोवीन जीवयमा सोतान जीवोह खुब मोंग कोरे ते,च्यु तेरु जीव खुब देहे,पुण ज्यु कुण मार कोरता इनी कोवीन जीवयमा सोतान जीव लोगोण आपणे तीयार से, च्यु ओमर जीवायोन कोरता तेर जीव वाचाड लेहे । ²⁶ २६) जोर कुण मारी सेवा कोरतलु ते च्यु मार फोसोव आवणु जुवे, एने मी जेहे से,तेहे मार सेवा कोरनारु सेवक बी रोयहे,ज्यु कुण मारी सेवा कोरे ते बाह बोगवान तीनाह इज्जुत कोरहे। ²⁷ २७) मारु जीव खुब फोलवणे बाज रोयुह,मी काय कोरो ए बाबा इना दुखोन टेमो दोखु मेहे वाचाड,एंहे कोरो के ,पुण मेहे वाचाड,ऐसे कोरो के, पुण मेहे यो दुख वेठणुज पोडहे कोरीन मी इन कोवीमा आवलु से। ²⁸ २८) ए बाबा तु तारा नावोन मोहिमा देखाड,तेतार सोरगे दोखी एक आवाज़ होंबायी मी मार मोहिमान ताकोतोह देखाडयु,एने मी उंजु मोहिमा ताकोतोह देखाडन्यु से । ²⁹ २९) मी आवाज होंबीन च्ये उबरोयला ओता,थुडाक माणहे एंहे कोया गाजेह, एने दीहरो कोया सोरग दुत तीना हाते कायतोरी बुल्यु । ³⁰ ३०) यीसु तीनुह कोयु,एंवी होंब्या यी आवाज मार कोरता नी आवी,पुण तुमरा फायदान कोरता से । ³¹ ३१) एवी इनी कोवीन नीयाव कोरनेन टेम आव लाग्यु,एने बुतडु ज्यु कोवी चालाडतलु,तेरी ताकोत नास ओय जाहे। ³² ३२) जेतार माणहे मेहे दोरती पोर दोखु कुरुसो पोर चोडावहोत,तेतार मी आखा माणहोह मेहे हाते खेच लीह। ³³ ३३) यीसु एहे कोयीन,च्यु केहेकाय मोरन्यु से, कोरीन तेर मोतोन बारामा देखाड देल्लु। ³⁴ ३४) यीसु कोयलु होंबीन माणहे एहे कोयला आमरा नेमोमा एहे लेखाय रोयोह के, मोसी जोलोम रोयहे पुण तु ते माणहोन पुरयु उचे चोडावणेम आवहे एहे कोयतलु ते च्यु माणहोन पुरयु कुण ओहे। ³⁵ ३५) एने यीसु तीनुह कोयु,उज्यावो थुडाक टेमे ओतरोज रोयहे,जाहलोगोण उज्यावो रोयहे ताहलोगोण चालजी , ओवतो आंदरलो तुमुह गेर लैहे ज्या आंदारलामा चालतला,च्या कांहरी जातला कोरीन तीनुह नी मालुम से। ³⁶ ३६) जाहलोगोण उज्यावो तुमरे हाते रोयहे,ताहलोगोण उज्यावापोर बुरहु कोरु,तेतार तुमु उज्यावान पुरया बोण जाहोत यो कोयीन यीसु तीनुह सुडीन जात रोयु एने आरतायु गोयु। ³⁷ ३७) च्यु तींदरे ओगोव कोतरा होंटा चोमत्कार कोरयु, ती बी च्या यीसु पोर बुरहु नी कोरया। ³⁸ ३८) यों ज्यों काय येसाया बोवीस्य कोरणारु कोयलु ओतु,च्यु पुरो ओये, ए पोरबु आमरी वातोपोर कुण बुरहु कोरयो,कुणीह पोरबु तेर ताकोत देखाडयु। ³⁹ ३९) इन वातोन कोरता माणहे यीसु पोर बुरहु नी कोरया,काहाके येसाया बोवीस्य कोरणारु एंहे बी कोयु। ⁴⁰ ४०) बोगवान तींदरा डुवा आंदवा कोरयु,एने तींदरो मोन वातडो कोरयु ,काहाके तींदरा मोन सोमज नी सोके,एने मार खेर नी फीरे एने मी तीनुह हाजा नी कोरो। ⁴¹ ४१) येसाया एंहे कोयु,काहाके च्यु यीसुन मोहिमान जागो हीवणो देखलु एने तेर बारामा कोयलु ओतु। ⁴² ४२) ती बी येहुदीन पुडारी मायला खुब माणहे यीसु पोर बुरहु कोरया बाकीन फरीसी पोंथवावामा माणहोह देखीन, च्या ठावका रोय गोयला काहाके फरीसी पोंथवावामा माणहोह मालुम पोडे ते तीनुह बोक्तीन गोरमा दोखु बारथे काड देहोत ।

⁴³ ४३) काहाके बोगवान तीनुह तुमु हाजा से, कोयीन वाह वाह कोयणेम दोखु ,माणहे तींदरे चाह वाह कोरनु तीनुह खुब पोटतलो। ⁴⁴ ४४) यीसु आयडीन कोयु ज्यु कुण मेहे पोर बुरहु कोरतलु,च्यु मेहे पोर ओतरुज नी बाकीन च्यु मेहे मुकोल्लु तीना बोगवानो पोर बी बुरहु कोरतलु।

⁴⁵ ४५) एने ज्यु मेहे देखतलु,च्यु मेहे मुकोल्लनाराह बी देखतलु। ⁴⁶ ४६) मेहे पोर ज्यु कुण बुरहु कोरतलु ,च्यु आंदारला मा रोयणु नी जुवे ,कोरीन मी इनी कोवीमा उज्यावो बोणीन आवलु।

⁴⁷ ४७) च्यु कुण मारी वात होंबीन बी बुरहु नी कोरतलु ते मी तीनान नीयाव नी कोरे, काहाके मी इनी कोवीमा नीयाव कोरणे नी बाकीन वाचाडने आव रोयुह। ⁴⁸ ४८) च्यु कुण मेहे पोर नी बुरहु कोरतलु एने मारी वात होंबीन नी मानतलु ,ते एक से च्यु तीनान नीयाव कोरहे,आखरी दीहोमा मारी वात तीनान नीयाव कोरहे। ⁴⁹ ४९) मारा आदीकारमा मी कायीज नी कोयतलु,बाकीन मेहे मुकोल्लनारु बाह मेहे ज्यो काय कोयणे कोयलु,ज्योज हुकुम आपतलु।

⁵⁰ ५०) ज्यो काय मार बाह मेहे कोयणे हुकुम आपलु,मेहे यो मालुम से कोरीन ज्यो काय मार बाह मेहे कोयणे कोयलु, ज्योज मी बुलतलु।