¹ काल्ला बी डायला माणहोह जुलतु जुण एने त इनाह तार बाहे जाणीन सोमजाड देजी एने जुवान्याह तार बायरा जाणीन सोमजाड देजी!

² डायला बायरानुह आयी जाणीन एने जुवान बयरानुह एक दोम पोवीत्र मोन दोखु बोणीह जाणीन सोमजाड! ³ ज्या खोराखोर रोडायला बायरा से तिनुह मान पान आपाजी!

⁴ पुण जोर काल्ला बी रोडायला बयरान पुरया एने तीदरा पुरयान पुरया रोये ते च्या पेल सोतान गोराणा मायलाह बोकतीमा चालाडनु जुवे एंहे कोरनेमा च्या तीदरा आय बाहे तीनुह पेल देखरेख कोरला च्यो फोसा फेडतलान होस से काहाके योज बोगवानोह पोटतलो! ⁵ ज्यी खोरा जोर रोडायली से एने तीनीन चाकरी कोरनारु कुन बी नीमबीहे च्यी एखली से ते च्यी बोगवानोन पोर आसा मेकतली एने रात ने दीह रावन्या एने पोरथना कोरनेमा जीत पोड रोयतलु से !

⁶ पुण रोडायला ज्यी दुनीयान मोज्यामा रोयतली ते च्यी जीवतला रोयीन बी मोरलाम होसे से ! ⁷ तीनुह इनी वातोन बी हुकुम आप तीदरा बारामा कुण बी गुनु नी लागाड सोकतला!

⁸ पुण जोर कुण बी सोतान होगाह एने गोरल्यान देखरेख नी कोरे ते च्यु येसुन खोरु बुरहान दोखु सेटु ओय गोयु एने बुरहु नी कोरनारा माणहो दोखु बी खुब बेक्कार ओय गोयलु से ! ⁹ काल्ला बी रोडायला बयरान वोय साठ साल दोखी कोम रोये ते तीदरा नावे मोदत कोरनेन वोहीन लेखणेम नी आवे उंजु च्यी एकुज वार वीयाव कोरली रोयणु जुवे!

¹⁰ एने च्यी आखा हाजी काम कोरनेमा नावलायली एने सोतान पुरायनुह पुहणारी एने ओंजावडा माणहोन पावणाय कोरनारी पोवीत्र माणहोन पाये दुवणारी दुखी माणहोन मोदत कोरनारी एने आखी बातीन हाजी कामे मोन लागडीन कोरीन गोवायीन रोय तीनुह नीवाडनु जुवे! ¹¹ पुण जुवान रोडायला बयरान नावे लेखतलु जुण काहाके तीदरा मोनमा सोवसार कोरनेन वीचार आव लागहे ते च्या मोसी येसु पोरली बोकती सुडीन फोसु वीयाव कोरने हुदहे !

¹² तीनामा यीसुपोर पेल बुरहु कोरला रोडायला बायरा बुली तुड देल्ला कोरीन तीनुह डोंड जुडहे!

¹³ एने ज्या हातेल्ला गोर गोर जायीन उजगया टेवाय जाहे एने उंजु उजगया ओतराज नी पुण चाडी चुगली कोरता रोये एने दीहरान कामही खुटी कोरे ज्यी वात गोंदी से च्यी बुलहे! ¹⁴ कोरीन मी यो कोयतलु के जुवान रोडायला बायरा वीयाव कोरे एने पुरया पोयदा कोरे सोतान गोरबार समावे तेतार कल्ला बी वीरुद कोरनाराह तींदरो नाव बोदी कोरने सोंदी नी जुडे !

¹⁵ थुडाक जुवान रोडायला बयरा ते पेलेन बोगवानोन इस्या सुडीन बुतडान फोसोव चालने बाज गोया !

¹⁶ जोर एगदा वीस्वासीन गोरमा रोडायला बायरा रोये ते गोरमायलाज तीनुपोर मोदत कोरने जुवे तीनुह मोदत कोरनेन वोजु मोडलीनपोर नी नाखणु जुवे पुण एकदा रोडायला बयरान कुणीज नी रोये ते मोंडाली तींदरी मोदत करनु जुवे ! ¹⁷ ज्या ओगोवाण्या मोडलीन पुडारया च्या हाजा ओगवाय कोरनारा रोये एने खास कोरीन ज्या खोराखोर मेहनुत कोरीन वात होबाडतला एने हीकाडतला डोबलीन मान पान आपनेन लायक मानजु !

¹⁸ काहाके पोवीत्र पुस्तोकोमा लेखाय रोयोह के खोवामा जुपायाला बुयलोन मुये मुहको नी बींदणु एने उंजु मोजरयाह तेर रुज| ¹⁹ जोर मोंडलीन पुडारीन काय बी वाकी काडणेम आवे ते दुय नी ते तीन पुरावान बीगुर जुण मानतु !

²⁰ ज्या पाप कोरता आवतला तीनुह आखा माणहोन ओगोव कीचवायीन हीकाडजी तेतार दीहरा माणहे बी पाप नी कोरने कोरीन गाबरहे ! ²¹ बोगवान एने मोसी यीसु एने नीवाडला सोरगदुतोन हाजरोमा मी तोहो चेतावणी आपतलु के पुरो मोन लागाडीन इनी वातोह मानीन चालजी एने फुसीन नीवाडु पाडे बीगुर एने बेदबाव कोरे बीगुर नीयाव जुण कोरतु !

²² कुणीह बी मोंडली मुखी नीवाडनेमा उतवावमा आथ जुण मेक तु एने दीर इन पापोम इ बोसकायतु जुण सोता पोवीत्र बोणीह रोयजी ! ²³ पाणी ओतरुज पीतु जुण रोयणु पुण तार पोटोम दुखतलो एने गोडी गोडी मांदलु पोड जातलु कोरीन थुडाक जेवुण आवलु दोरकास्यान रुह बी पीया कोरजी !

²⁴ थुडाक माणहोन पाप माणहोन वीस्मा मालुम ओय जातलो कोरीन तींदरो वीयाव कोरतला च्या केहेक वेवार कोरला कोरीन तोपासणे‌न जोरकत नींबदे पुण थुडाक माणहोन दावका लिकायीन कोरनेन पाप माणहोह मालुम नी रोयतलो ओवता वीयाव कोरनेन दोहोमा तींदरा पापे तींदरे फोसोवजु आवहे !

²⁵ तेहेज हाजा कामे बी देखाय जाहे एने ज्यो लीकायलो रोयतलो च्यो हाजो काम बी मालुम ओय जाहे!