2 मोडलीन ओगवाय कोरनारु पुडारी बीगुर गुनावालु एने एकुज गोरवावु एने तेर सोतान जीवोह काबमा राखणारु एने आबरु आपणेन लायोक एने आवणारान हाजी पावणाय कोरनारु एने एक दोम हाजा हीकाडनारु जुवे !
3 च्यु दार कुट्यु नी रोयणु जुवे एने आथ सुट्यु नी जुवे पुण हुवाव्वा सोबानोन जोगडु कोरनारु नी जुवे एने पोयहात हाय हाय कोरनारु नी जुवे ! 4 एने च्यु तेर सोतान गोरबार हाजो चालाडनारु एने तेर पुरया सुरयाह तेर वात मानीन होस कोरीन काबमा लावणारु जुवे !
5 जोर तीनुह सोतान गोरबार ओगवाय कोरीन एने राखवावी कोरीन चालाडता नी आवडे ते च्यु. बोगवानोन मोडलीन केहेकाय चालाडहे ! 6 च्यु नोवलु वीस्वासी नी रोयणु जुवे कायथापे एंहे नी ओयणु जुवे के जोलदी नीवडाय गोयु कोरीन मोठाय कोरनेमा बुतडान होस डोंड नी जोडनु जुवे!
7 बीगुर वीस्वासी माणहे बी तेर बारामा हाजी गोवायी आपणु जुवे तेतार च्यु माणहोन नावबोदी कोरनेमा एने बुतडान फासामा नी सापडे ! 8 ऐहाज कोरीन ज्या मोडलीन खास नीवाडला पावरे से च्या बीगुर गुनान जीवाय जीवीन नावलायला रोयणु जुवे च्या दुयोखेर लागाडनारा नी रोयणु जुवे एने खोराब दोंदु कोरीन पोयहा लुचाडनारा नी रोयणु जुवे!
9 च्या सुखला मोन दोखा बोगवान तीनुह देखाडलु तीन बुरहान लीकायली खोरी वातोपोर पोक्का बुरहु कोरता रोयणु जुवे!
10 तीनुह पेलेन फारकणु जुवे के जोर च्या बीगुर गुनान नीकवे ते मोडलीन खास पावोरीन सेवा कोरने नीवाड सोकतला ! 11 तेहेज मोडलीन खास पावोरीन लाड्या नावलायला रोयणु जुवे चाडी चुगली कोरनारा नी जुवे पुण च्या बीगुर चुकीन एने आखी वातोमा खोरी रोयणु जुवे
12 मोडलीन खास पावरे एकुज गोरवावा रोयणु जुवे एने सोतान पुरयापारी एने तेरो गोरबरा चालाडने मालुम रोयणु जुवे!
13 काहाके ज्या मोडलीन खास पावोरीन सेवान काम हाजीहुते कोरतला ते तीनुह मोटलो पोद जुडहे एने खुब इज्जुत जुडहे एने यीसु मोसीन बुरहान मायली वातु देखाडणे हिम्मोत जुड जाहे! 14 के मी तोंहोपाह जोलदी आवणेन आसा कोरतलु ती बी यी वातु तोहो लेखतलु !
15 एक जोर मेहे आवणो वार लाग जाये ते माणहोह जुवे कोरन तु सोमाजी जा एने तीनुह सोमजाडाजी काहाके च्या जीवतला बोगवानोन मोडली से एने च्यी मोडली खोरी वातोन खांबु एने पायु से ! 16 इनामा सोका नी के बोगवानोन लीकायली बोकतीन राज खुब उड़ो से पोरबु बोगवान यीसु मोसी माणुह बोणीन आव्यु पोवीत्र जीव आत्मा यीसु मोसीहोह मोरलाम दोखु जीवतु कोरीन यीसुज बोगवानोन खोरु पुरयु से एंहे पुरावु आपी एने सोरगदुतोनुह देखायु एने आखा देसोमा तेर पोरचार ओयो एने कोरीन आखी बीगुर येहुदी बातीन माणहे तीनुपोर बुरहु मेकला एने च्यु मोहीमा हाते सोरगोमा उचलाय गोयु !