¹ मी पोवलुस आपणु वाचाडनारू बोगवान एने आपणी आसान आदारे यीसु मोसीन हुकुम दोरजु येसु मोसीन निवाडलु नेवतो पुचाडणारू चेलु से मी तीमुथीन कोरता लेखतलु के च्यु येसु मोसीपोर बुरहु कोरनेमा मार पुरयान होस से!

² आपणु बाह बोगवान एने पोरबु येसु मोसीखेर दोखी दोया एने कुरपा एने सुख सांती तुमु आखाह जुडती रोयुह ! ³ जेतार मी मोकीदुनीया जीला जातोतु तीन टेमे मी तोहो रावण्या कोरलु के तु इफीसी सेहरोमा रोयीन थुडाक माणहे च्यांहरी ठोग हीक हीकाडतला तीनुह ठोग हीक हिकाडने जुन देतु ! ⁴ ओहली डाय डायान मोन गोड्य़ा ठोग काणीपोर एने होरे नी ओहली वोसोन बरामायली काणीपोर द्य़ान जुणु लागाडता ओहली हिक जोगडु तीयार कार देतली एने वातोन जीखडी पाडाव देतली च्यी बोगवानो पोर बुरहामा एने बोकततीमा वोडनेन मोदत नी कोरतली.! ⁵ इना हुकुमोन मोतलोब मोग से पी मोग सुखला मोन दोखी हाजा वीचार दोखी एने खोरा बुरहु दोखो उबोजणु जुवे!

⁶ पुण थुडाक माणहे इनाह सुडीन रीकामी वतोखेर फीरीन बोटकी गोयला से!

⁷ च्या मुसान नेम हीकाडनारा मास्तरे बोणन हु‌‌‌त्तला पुण च्या एर बारामा हिम्मोत होते बुलतला ती बी कायतान बारामा बुलतला च्यो नी सोमजतला!

⁸ आपु यो बी जाणतला के ज्यु कुण हाजी रीते नेम पावतलु ते नेस धाजो से ! ⁹ आपु यो बी जाणतला से के नेम मोजे दोरमी माणहोन कोरता नी पुण बीगुर दोरमीन कोरता हुकुम नी माननारान कोरता बोगवानोन बोक्ती नी कोरनारान करता पापीन कोरता बीगुर पोवीत्र जीवाय जीवणारन कोरता वीटवाडे ओहली कामे कोरनारा माणहोन करता आय बाबाह मारनारान कारता खुन कोरनारान करता!

¹⁰ सीनावो कोरनारान कोरता माणहो हाते माणुह सीनावो कोरनारान करता माणहोह काबमा राखीन वेचनारान करता ठोगणारान करता नेम तुडनारान करता एने तेरी खोरी हीकोन विरुद काम कोरनारान कोरता से!

¹¹ यी नेमोन हीक माणहे बुरहु कोरे ओहली से एने यी बोगवानोन मोटली मोहीमान बारामायली यीसु मोसीन बारमायली हाजी खोबर से यी हाजी जोर हीकाडनेन काम बोगवान मेहे होपलु से! ¹² मेहे ताक़ोत आपीन एने खोरु सोमजीन तेरी सेवामा नीवाड्यु कोरीन आपणा पोरवुन येसु मोसीन मी दोन्यवाद कोरलु !

¹³ मी ते पेल बोगवानोन नावबोदी कोरनारु एने माणहोह सोताडनारु एने बोवाखु माणुह ओतु ति बी बोगवान मेहेपोर दोया कोरयु काहाके मी तीनापोर बुरहु नी कोरतोलु मी काय कोरतलु कोरीन मी नी जाणतोलु.!

¹⁴ आपणु यीसु मोसी पोरलु बुरहु एने मोंगो दोया पोरबुन खुब मोटी कुरपा मेहे पुरीन पुरी जुडली से! ¹⁵ यी वात खोरी से एने आखा माणहे माननेन लायकोन सेमके पापी माणहोह वाचाडनेन कोरता यीसु मोसी इनी कोवीमा आव्यु तीनुमा आखा दोखु मोटलु पापी मी से!

¹⁶ आखा दोखु मोटलु पापी मी ओतु ती बी बोगवान मार पापोन कोरता दीर दोरीन मेहेरोयण खुब दोया देखाड्यु तीनामा ज्या एवी दोखा येसु मोसीपोर बुरहु कोरतला तीनुह जोलमकीज जीवाय जुडनेन कोरता मी एक नोमुना बोण गोया!

¹⁷ एली जोलमकुज रोयणारु राजा मोजे कोदी नी मोरनारु नी देखायणारु एकुज बोगवानोन मान पान एने बोडायी पीडीडीह ओर ती रोये आमीन! ¹⁸ ए बेटा तीमुथीन मी‌ यु हुकुम आपतलु के तु हाजीहुते यो काम कोरतु रोयजी पेल तारा बारामा कोयला ओता ती नी बोवीस्योन वातोन मोनमा मेकजी च्यो तोहो बोगवानोन बुरहामा हाजी हु ते युदद् मोदत कोरहे!

¹⁹ तु यीसु पोर बुरहु कोरनेमा टीकीन रोयजी एने होमेस्या तार मायला मोनोम वीचारोह साप राखजी काहाके थुडाक माणहे खोरी हीकोह एक वोगा सुडीन जाहाज जोहली चुराचुर ओय जातली तोहला तींदरा ख़राब वीचारोमा तींदरा बुरहाम दोखा बोटकी गोया!

²⁰ च्या बोगवानोन नावबोदी कोरने नी हीकणु जुवे कोरीन मी तीनुमायला हुमुनीयुस एने सींकदरोह बुतडाह होप देल्लु से!