¹ Yaz Phao-lô ayx Tênb-Hungh nyăngz pâuz, yâuc ayx Njâuv Zâu Yê-su nyăngz đayf, wâyc stăngc Tênb-Hungh sên taih nyăngz munh hayh zeen tuz wăn, wâyc phunz nănh stiz pâyz tuz seenz gâyf, yâuc hayh yeenv gongx phunz munh pâyz gao lêpc seenz gâyf. ² Nănh stiz zeen nyăngz jau, cloon seenz gâyf nyăngz coonz tay six munh naih tync mungc, yâuc tuz stâyv quâyx nyăngz mengc, nâyx six max zâyf Tênb-Hungh puv maoh, six tăng cah lof banc stâyv banc đaic woax zanyf, Zâu nyunc phunz nyăngz mengc. ³ Bengc săngx huđ, Tênb-Hungh phunz nănh nyăngz pâuz hynđ yangh seetb taih. zoz nâyx đomc gâyf jaoz phunz yaz lănv, yaz songđ âyz pănh nyăngz Njâuv Zâu Tênb-Hungh lănv phunz songx munh mungv. ⁴ Yaz ja jeenx zuyz phunz yaz nyăngz seenz toonz Titv lex, wâyc pănh tinyh đoih zeen Yê-su songc seenz stymz, jođ pănh nyăngz nzangc pha Tênb-Hungh Yê-su Jix-tuz pănh nyăngz Njâuv Zâu hâuđ lênh sađ pôz sađ pengh oonz phunz mâyh. ⁵ Yaz njâuh mâyh yămz woa Ca-litv coiđ synh, wâyc phunz mâyh bênc max zengx songf nyăngz dlayc, yâuc yămz muif nomz stengv paiđ munh ayx Huyđ toongh nyăngz munh côx, năngđ yaz bux mâyh quaix woa nâyx. ⁶ Yax huyđ toongh nyăngz munh côx six zuc ayx max naih tync nzêmh nyăngz munh, cungb nongc ah tauh au, nănh nyăngz sây yâuc zuc zeen Zâu, zuc ayx max phunz munh naih tync nzêmh nyăngz dlayc, yâuc zuc pungx stymz ayx. ⁷ Ayx Tênb-Hungh nyăngz munh côx cun songx munh six max hopđ zuc ayx phunz munh naih woac yônx, nănh max tuz cloon munh tinyh nzengz, yâuc siv nhleenx căn, max tuz blaz tyu, yâuc max ayx guyc, yâuc max tuz mauh puv quâyx. ⁸ Ayx munh côx six zuc naih stymz stipx zeb, yâuc stăngz ayx gongx nyăngz dlayc, zuc naih tongb manyh, vaic ayx pengh stymz, songđ hayh cun tuz stynb. ⁹ Nănh stiz six zuc lif couv tuz wăn nyăngz seenz gâyf, phunz nănh stiz hayh zoz seenz gâyf taih nzaox phunz munh pâyz tuz zengv gâyf nyăngz munh, phunz nănh stiz pâyz tuz nănh stiz ayx six sai. ¹⁰ Wâyc zuc naih zeen Zâu ayx quaix catz nyăngz gâyf woax đomc Yiu-tai munh, aox seenz gâyf, coong bah camx bah caiz jaf munh. ¹¹ Mâyh zuc ayx phunz nănh stiz payx nzeetx, wâyc zuc nănh stiz nzaox max hopđ zuc nzaox nyăngz gâyf, ayx phunz max pâyz sax sênz pyau munh lunc nzuf, woax đomc munh six nzaox mauh puv quâyx nyăngz jau cungv. ¹² Nănh stiz Yangh-munh cănh naih ah tauh tâuc woac munh coong quaix nâyx đomc woac, Yangh-munh muif dlih cungb coong puv maoh, huđ năngđ stanyb hauc, huđ nzongf lâyc matc, yâuc mauh nhlync. ¹³ Tâuc woac munh coong nănh stiz seenz toix nzongf, six zuc coong năngx đăngb zac phunz nănh stiz hayh naih seenz stymz pâyz zeen wăn seenz gâyf. ¹⁴ Max mungv Yiu-tai munh coong nyăngz ưrx jeetx woac, mah six max mungv seenz gâyf nyăngz munh bênc taih nyăngz gâyf. ¹⁵ Đăngb zengh nyăngz munh, six ayx đăngb zengh nyăngz dlayc, cah lôh nyăngz munh tăng nănh stiz nyăngz pyây lâyf nyâyh max đăngb zengh nyăngz dlayc, stiz nyăngz stymz nyâuđ songđ huđ nzuf gôh. ¹⁶ Nănh stiz coong stiz pâyz Zâu Tênb-Hungh, six nănh stiz ayx nyăngz dlayc, cayx năngđ nănh stiz max pâyz, nănh stiz cungb ngaux hox bây munh max mungv woac, yâuc max hayh ayx laiv hungđ gongx dlayc.