¹ Yaz Stăngz nyăngz yâuf-pez lex! oix zuc numđ nyađ yămz Zâu cah njaf, Yaz max numđ nyayz yaz ja quaix ninyh quaix lauf nâyx đomc woac, six wâyc phunz nyâuh yâuf-pez pâyz buôngh. ² Oix zuc buôngh woax đomc Clô, buôngh cloon woax đomc ayx huđ dlayc nyăngz Munh. nănh stiz cungb hayh catz ngwoaic đutx blanc. ³ Seenz quaix catz nyăngz gâyf six pănh, wâyc zuc pănh Couv Singx-lingh Canyx bongc nzangc Pha Njâuv Zâu Tênb-Hungh. Seenz oonz loc, max couv Wangz pănh hayh ayx laiv hungđ. ⁴ Max cun yaz naih lyv do phunz yaz zeen tingc, pitc lanh hănđ nyâyh coong yaz naih lyv do zeen tingc têx, Yaz lauf naih năngx đungx têx tymb. ⁵ Yaz stengb stâyv taih tuz pong yeetc Noib bix ayx quaix catz nyăngz gâyf, Yaz stengb taih pênx I-sa-la-ên Munh. Yaz six Bên-ya-min stingx, Yaz nyăngz nzif Pha six taix Hêpc-lu Munh nyăngz samđ stâyz, âyz Yiu-tai Munh nyăngz gâyf, Yaz six săngh Pha-li-si woax jau Munh. ⁶ Coong tauv joomz nyâuđ yaz six hoiđ Huyđ-toongh nyăngz Munh. Coong tauv âyz Đoouc-lyc gâyf ayx yaz yâuc max naih tync nzêmh. ⁷ Laiv hungđ đangc dlih Yaz stunx lôif, Nâyx zanyf yaz stunx stâyb wâyc Njâuv Zâu. ⁸ Max si cungb buc nâyc, Yaz stunx muif hungđ max naih lôif, six wâyc pây cloon tuz pâyz Njâuv Zâu Yê-su Saix nzongf nyăngz muif hungđ, Yaz songđ quanyf nzuf muif hungđ stunx pênx njamc nyav wâyc tuz Njâuv Zâu. ⁹ Yâuc wâyc Pănh tuz cloon Nănh songc Mengc Săngh. Yaz lêpc Yiu-tai Munh nyăngz gâyf njanh ayx. six max tuz cloon Tênb-Hungh hopđ nyâuđ. Tuz cloon Tênb-Hungh hopđ nyâuđ six wâyc Yaz naih seenz stymz zeen Njâuv Zâu. ¹⁰ Yaz cungb oix pâyz tuz phunz Njâuv Zâu tuz nyunc tayc bix săngh phunb stengb taih nyăngz quyênh. Yâuc naih phănc cloon Nănh tanyđ zâuđ năngđ nănh zuc tayc nâyx. ¹¹ Yaz naih nyăngz njih mungc tync, six Tayc năngx tuz săngh phunb stengb taih. ¹² Yaz yâuc max zâyf coong yaz tuz nzuf muif hungđ, yâuc max zâyf coong Yaz tuz Clakx-clunh nzuf. Six Yaz oix nzac jab tyuv ninyh zoz tuz sâuđ nyâyc. Six wâyc zuc Njâuv Zâu zoz tuz Yaz quaix đangc nzof gôh. ¹³ Yâuf-pez lex! Yaz max zâyf stunx yaz tuz nzuf muif hungđ. Six yaz cungb naih ah hungđ cungv, cungb oix nyâuđ cob đangz phanx nyăngz dlayc, hungv ninyh cah đangc tutc. ¹⁴ Yaz oix tyuv ninyh zac zoz tuz Saix nzongf sâuđ nyâyc nyăngz tync, Six Zâu Tênb-Hungh êu yaz couv Njâuv Zâu Yê-su yămz cah zâyc gungh nyăngz sâuđ nyâyc. ¹⁵ Pănh laiv lanh pênx Munh lub yămz Mengc hoonh woax phanx, laiv lanh Yâuf-pez naih pitc hungđ nyâuđ nyâyh, Tênb-Hungh songđ oix phunz nănh tuz pitc hungđ nyâuđ nyâyh. ¹⁶ Six pănh oix zuc yăngh âyz Zâu Seenz Gâyf nyăngz jau pănh bêc nyunc âyz woa yăngh. ¹⁷ Yâuf-pez lex! nyâuh tinyh đoih six zuc ayx âyz yaz bux nyăngz gao, yâuc oix zuc Mangc lêpc Yaz nuz phunz woax đomc Munh nyăngz jau yăngh. ¹⁸ Wâyc zuc Yaz bux nyâuh sax hâyđ quaix đangc, nâyx zanyf Yaz haoh năngx bux nyâuh tymb, Six nâyx zanyf naih Munh đungx wâyc nănh stiz ayx nyăngz dlayc pênx Yônz zaz cloon Njâuv Zâu nyăngz săpc đăngc zax. ¹⁹ Six stêtb Mâyv nănh stiz songđ zuc Mêtc, wâyc Nănh stiz cănh nongc nănh stiz nyăngz nyâuđ ayx Zâu. nănh stiz zoz bah lotb nyăngz dlayc nzâyz taih nongc ayx Manyh tauh. Nănh stiz nyăngz pyây lâyđ cungb nyâyh tauv bamh canz nyăngz jau Cungv. ²⁰ Pănh six ayx Tênb-Toongh nyăngz pec stingx. Yâuc zu pănh nyăngz Njâuv Zâu Tăng woa Tênb-toongh Côkz nzac taih. Nănh six Njâuv Zâu Yê-su. ²¹ Nănh oix nongc Nănh nyăngz quyênh, phunz muif hungđ yămz nănh nyăngz puf đi nyăngz Quyênh. Zoz pănh đoonh nzongf nyăngz stynb pyênv pênx năngđ nănh Gwăngz-eng nyăngz stynb.