¹ Yaz Phao-lô cloon Ti-mô-thê songc ayx Njâuv Zâu Yê-su nyăngz cumh pâuz Munh.* Yaz ja jeenx zuyz phunz Tênb-Hungh nyăngz Munh yămz Phi-lipv Stengv nyăngz Đăngb zengh pec stingx, Zeen Njâuv Zâu Yê-su nyăngz Munh. Cloon Huyđ-toongh Munh côx cloon toongz puf Munh. ² Jođ Nzangc Pha Zâu Tênb-Hungh cloon Njâuv Zâu Yê-su sađ Pôz sađ pengh oonz phunz nyâuh yâuf-pez ô stayx tinyh đoih. ³ Yaz laiv zanyf săngx tauv nyâuh yâuf-pez tinyh đoih, Yaz yâuc wâyc nyâuh hâuđ yaz nyăngz Zâu Tênb-Hungh. ⁴ Yaz muif dlih numđ nyađ clo Zâu phunz nyâuh yâuf-pez ô stayx tinyh đoih. ⁵ Yaz sâuf nănh wâyc stăngc nyâuh yâuf-pez ô stax tih đoih. Songc congz ayx cumh pâuz nzônh cuđ jeenx tăng coonz tauv nâyx zanyf. ⁶ Yaz zeen tingc Tênb-Hungh yămz nyâuh yâuf-pez nyăngz stymz nyâuđ ayx gongx dlayc, ayx tuz songx nzuf tauv njâuv Zâu Ye-su năngx phunb đangz taih woax Noib. ⁷ Yămz yaz nyăngz stymz nyâuđ laiv zanyf yâuc săngx tauv nyâuh yâuf-pez ô stayx tinyh đoih. Năngđ nâyx six numđ hođ yaz nyăngz stymz nyâuđ, max cun Yaz zuc yămz nzauh, mah six tuz pungx seetb ninyh nzengz tuz hingh cuđ jeenx max phunz tuih. Yâuc phunz Munh pâyz tuz Cuđ jeenx six seenz Gâyf. Nyâuh tinyh đoih tuz songc Tênb-Hungh nyăngz phănc. ⁸ Tênb-Hungh Stăngc yaz ayx zanyx manyf coong yaz songđ seenz stăngz nyâuh oix tuz pongh nyâuh yâuf-pez ô stayx tinyh đoih. Yaz stăngz nyâuh năngđ Njâuv Zâu Yê-su stăngz nyâuh nâyx. ⁹ Yaz jođ Zâu phunz nyâuh yâuf-pez naih nyâuđ stăngz Munh yâuc naih Tongb-manyh pâyz tuz muif hungđ đôz đungx staox. ¹⁰ Phunz nyâuh yâuf-pez songđ hayh phân biêtc saz tuz ayx gongx nyăngz jau. Ayx Đăngđ zengh nyăngz dlayc tauv Njâuv Zâu năngx taih woax Noib songđ max naih tync nzêmh. ¹¹ Wâyc Couv Njâuv Zâu stăngc nyâuh yâuf-pez tinyh đoih yămz nây stâyv sangc ayx muif hungđ gongx dlayc wâyc phunz Munh nzâyz Gwăngz-eng taih phunz Tênb-Hungh. ¹² Yaz oix nongc nyâuh yâuf-pez pâyz tuz yaz pongh zuc nâyx đomc dlayc, songđ phunz Cuđ jeenx đanv quăng ninyh. ¹³ Wâyc zuc zu Hungh tync nyăngz pengz cloon songx Munh songđ pâyz tuz yaz wâyc lêpc Njâuv Zâu bix zuc yămz nzauh. ¹⁴ Yaz zuc yămz nây nzauh nâyx đomc dlayc six wâyc stăngc nyâuh yâuf-pez tuz pungx stymz zeen Zâu đungx staox max zuc cumh nzav laiv hungđ ninyh nzônh Tênb-Hungh nyăngz Gâyf. ¹⁵ Songđ seenz naih ah phanx munh nzônh cuđ jeenx oix stâyx munz nzengz zax. Six naih ah po seenz nongc nyâuđ nzônh Njâuv Zâu nyăngz Cuđ jeenx. ¹⁶ Nây six wâyc Nănh stiz nyâyh taih pâyz tuz yaz wâyc nzengz max phunz Tênb-Hungh nyăngz Cub jeenx tuih songđ zuc yămz nây nzauh. ¹⁷ Six woax đomc max nongc nyâuđ nzônh Njâuv Zâu nyăngz Cub jeenx stâyx munz munh, tâuh cănh tuz gongx woax đomc Munh. nănh stiz nyâyh taih ayx năngđ nâyx six phunz yaz yămz woa nzauh zuc dlauc huđ năngx nzongf têx tymb! ¹⁸ Six max đâuf, max cun nănh stiz tinyh phanv nzônh, Njâuv Zâu nyăngz cub jeenx yaz lauf numđ nyađ. Six yaz lauf năngx numđ nyađ têx tymb. ¹⁹ Mungc nyâuh yâuc-pez clo-Zâu couv Njâuv Zâu nyăngz Singx-lingh stăngc Yaz. Yaz zeen tingc coong yaz songđ tuz pungx seetb nzauh taih njâu. ²⁰ Yaz zeen tingc coong yaz naih tync Mungc, max naih laiv hungđ ayx phunz Yaz zuc nyayz. Njâuv Zâu songđ tuz Gwăngz-eng yămz yaz cah njac, max cun yaz săngh mah six Tayc. ²¹ Yaz Săngh six săngh wâyc Njâuv Zâu.* Yaz hănđ tayc six tuz lôif. ²² Six coong yaz săngh hayh ayx yaz tync mungc tuz Pôz nyăngz cumh pâuz, yâuc max pâyz tuz cayx sên ayx toix laiv hungđ cumh pâuz. ²³ Nây iz hungđ seenz zâuđ phunz yaz sên, Yaz numđ oix gâyh nâyx nomz Stynb stayđ ninyh cloon Njâuv Zâu Yămz six năngx gongb têx. ²⁴ Six yaz săngh wâyc phunz nyâuh yâuf-pez nongc seen quaix. ²⁵ Wâyc năngđ nâyx yaz pâyz tingc yaz năngx oix zuc săngh yămz nây stâyv sangb wâyc stăngc nyâuh yâuf-pez zeen nyăngz jau naih seenz stymz zeen tuz gongx yâuc tuz numđ nyađ. ²⁶ Tauv yaz laiv zanyf ninyh tauv woa tayđ nyâuh yâuf-pez nyâuh songđ naih lyv do lănv nyâuh cloon Njâuv Zâu Yê-su songc Mengc săngh. Nyâuh songđ năngx numđ nyađ têx Yaz. ²⁷ Nongc seen quaix six nyâuh yâuf-pez yămz nây stâyv sangb oix zuc ayx muif hungđ payh tuz hopđ Njâuv Zâu nyăngz Cub jeenx. max cun yaz tuz ninyh Tayđ nyâuh yâuf-pez mah six yămz Côz. Yaz numđ Munh lănv coong nyâuh hopđ stymz tongh âyx zeen tuz wăn. Nzengz max phunz Cub jeenx tuih. ²⁸ Max nongc cumh nzav cloon nyâuh tinyh toix woax đomc Munh, nây six ayx jix houđ phunz nănh stiz pâyz tuz nănh stiz six zuc mêtc, Six nyâuh yâuf-pez songđ tuz Tênb-Hungh Njâuv nyâuh. ²⁹ Tênb-Hungh sađ Pôz phunz nyâuh canyx bongc Njâuv Zâu. max zâyf cungb zeen nănh cungđ, yâuc zuc tanyc zâuđ wâyc nănh. ³⁰ Nyâuh yâuf-pez songđ tuz cloon yaz (zaiz qua) muif hungđ cumh pâuz. Nâyx zanyf nyâuh tuz numđ Munh lănv coong yaz nzengz max phunz Cub jeenx tuih.