¹ Yaz Phao-lô, wâyc Yê-su Jix-tuz zuc yămz nzauh, Yaz cloon yaz nyăngz yâuf Ti-mô-thê, ja jeenx zuyz phunz buz stăngz nyăngz toic, six cloon buz songc congz ayx nyăngz munh Phi-li-môn, ² Yâuc ja phunz buz nyăngz muc Apc-phi, năngx cloon buz ayx pengz woax tauh An-zipv-batc. ³ Jođ pănh nyăngz nzangc pha Zâu Tênb-Hungh cloon Njâuv Zâu Yê-su Jix-tuz sađ pôz sađ pengh oonz phunz nyâuh yâuf pez ô stayx. ⁴ Yâuf Phi-li-môn lex, yaz muif dlih clo Zâu hâuđ Tênb-Hungh yâuc săngx đamf tauv mâyh. ⁵ Wâyc zuc yaz numđ lănv coong, "mâyh zeen gongx Yê-su, yâuc stăngz Zâu Tênb-Hungh nyăngz songx munh đungx nzongf. ⁶ Yaz jođ Tenb-Hungh phunz mâyh zeen nyăngz jau naih tinyh tongb, stăngc pănh pâyz pâu đungx staox pănh tuz cloon Njâuv Zâu songc mengc săngh, tuz taih nyăngz tax hungđ. ⁷ Yâuf lex, mâyh tăng laiv stăngz munh phunz yaz numđ nyađ, wâyc zuc mâyh stăngc tuz Tênb-Hungh songx munh nyăngz nyâuđ yongb quaix taih. ⁸ Wâyc zuc pănh tinyh đoih six zeen Yê-su nyăngz yâuf pez, yaz songđ hayh naih gâyf paiđ mâyh ninyh ayx, hopđ zuc ayx nyăngz cumh pâuz. ⁹ Six wâyc zuc yaz stăngz mâyh, yaz songđ jođ mâyh cungv, yaz Phao-lô yâuc munh côx nzof, yaz nâyx zanyf wâyc Njâuv Zâu Yê-su năngx zuc yămz nây nzauh. ¹⁰ Yaz jođ tah stăngc yaz nyăngz toonz, Ô-nê-sim, yaz zuc yămz nzauh woax zanyf, yaz tuz Ô-nê-si-matv taih ayx yaz toonz. ¹¹ Cah đangc noib mâyh phătc nănh max săngh nongc, six nâyx zanyf nănh wâyc mâyh wâyc yaz, nănh săngh nongc nzof gôh. ¹² Nâyx zanyf yaz stungx nănh ninyh mâyh woa, six năngđ yaz stungx yaz nyăngz stymz nyâuđ ninyh phunz mâyh. ¹³ Yaz wâyc cuđ jeenx zuc yămz nzauh, yaz yâuc oix njâuh nănh cloon yaz yămz nây, tayv mâyh tex yaz. ¹⁴ Six yaz max oix êu tah ayx laiv hungđ bix tah max đôngh ix, six dluyh mâyh pungx stymz ayx max zâyf yaz yac. ¹⁵ Naih dlih Ô-nê-sim gâyh tah ah dlapc, năngx phunz mâyh nyunc stipx nănh phunz đangz lauf cloon mâyh stâyv quâyx yămz. ¹⁶ Six nâyx zanyf nănh max zâyf ayx nâuh, six nănh ayx năngx lub têx nâuh, nâyx zanyf nănh ayx zeen Zâu nyăngz yâuf pez, yaz seenz numđ stăngz nănh, mâyh yâuc zuc stăngz nănh, wâyc zuc nănh cloon mâyh six tinyh đoih ayx zeen Zâu nyăngz yâuf pez. ¹⁷ Six coong mâyh năngđ stunx yaz cloon mâyh songc congz ayx, mâyh six zuc stipx nănh năngđ stipx yaz nâyx. ¹⁸ Six coong nănh năngđ ayx laiv hungđ peo mâyh, mah six sămv mâyh laiv hungđ, mâyh phanv stunx bây yaz. ¹⁹ Yaz Phao-lô nongc puf ja nâyx đomc woac, yaz cănh clao phunz tah, nzof tah năngđ sămv yaz laiv hungđ, yaz lauf max đamf tauv. ²⁰ Tah lex, jođ mâyh stăngc yaz ayx phunz yaz numđ nyađ, wâyc zuc pănh tinyh đoih six zeen Njâuv Zâu nyăngz munh. ²¹ Yaz ja nâyx zây jeenx phunz tah, yaz zeen tingc coong tah six âyz yaz couv nyăngz woac ayx. ²² năngx naih ah hungđ dlayc tymb, yaz oix jođ mâyh stăngc yaz bênc ah nomz tync zu phunz yaz, yaz zeen coong Tênb-Hungh six tauz nyâuh yâuf pez clo Zâu nyăngz woac, phunz yaz max lauh năngx tuz ninyh tayđ nyâuh yâuf pez ô stayx. ²³ Ê-phapv-ra, lauf wâyc Njâuv Zâu Yê-su bix zuc cloon yaz songc yămz nây nzauh woax tauh, lauf cloon yaz zuyz woac zaoh tayđ nyâuh. ²⁴ Cloon yaz songc congz ayx nyăngz munh, Makv, A-ri-takc, Đê-ma, cloon Lu-ca lauf zuyz woac zaoh tayđ nyâuh. ²⁵ Jođ Njâuv Zâu Yê-su sađ pôz phunz cloon nyâuh yâuf pez ô stayx yămz.