¹ Zâu Yê-su quef coonz nongc woac pây coong ănz stiz: "Naih ah lanh munh songx ah totb tungh côh pyâu. Nănh yâuc ayx bah stab wâyh nzêux nzuf, woa lauđ wynb njaf nănh witb ah nomz cotb nongc ănz nzapc tungh côh pyâu toongh, nănh zâyv ah nomz coouz lauh nongc phunz munh yămz woa zu mangc lauđ wynb, yâuc êu cloon maic jab woax đomc munh yămz woa ayx congz, nzof nănh songđ seetb ninyh pitc nomz phâyz phangz. ² tauv zunb pyâu suc woax dlih, nănh paiđ ah tauh pâuz ninyh pongh jămđ lauđ wynb munh, zoz nănh nyăngz phănc pyâu. ³ Jămđ lauđ wynb munh zoz woax tauh pâuz ninyh bopc, songđ luiđ nănh cungb stynb phătb puf lauf. ⁴ Lauđ wynb Zâu zâyf paiđ pitc tauh pâuz ninyh, jămđ lauđ wynb munh bopc nâyx tauh pâuz nyăngz pyây, yâuc ayx peo phunz nănh nyayz. ⁵ Lauđ wynb Zâu zâyf năngx paiđ ah tauh pâuz ninyh tymb woax tauh zuc nănh stiz tayx; năngx naih đungx tauh lauf năngđ naz, ah phanx zuc stiz bopc, ah phanx zuc stiz tayx. ⁶ Lauđ wynb Zâu cungb năngx naih ah tauh toonz stăngz cungv, nzuf woax hâyđ, songđ paiđ Nănh nyăngz toonz ninyh yâuc coong: "Naih dlih stiz lauf năngx nyangc yaz nyăngz toonz!" ⁷ "Six jămđ tungh côh pyâu woax đomc munh lanh bux lanh coong: "Stipx nâyx nomz lauđ wynb Zâu six lâyc tauh gôh, taih pănh tayx nănh quanyf, nzof Nănh nyăngz jax toongx six săngh pănh nyăngz gôh!" ⁸ Stiz songđ zăpc zoz woax tauh toonz tayx tayc, đănx wătc ănz woa lauđ wynb cungh ngwoaic!" ⁹ Năngđ naz lauđ wynb Zâu ayx laix loz? Nănh songđ ninyh tayx woax đomc jămđ tungh côh pyâu munh nzuf, songđ jaoz woax nomz lauđ wynb phunz pitc tauh cun. ¹⁰ Nyâuh max toc quaix nâyx yămc canyx stâub nyăngz woac mah? 'ayx pyau stangc nzêmh woax noz njauz pyây, zoz seetb taih nongc ănz pyau joongz six năngx gongx têx. ¹¹ Nây six Zâu nyăngz cumh pâuz, âyz pănh nyăngz mâyc mangc six phătc njingc nzongf." ¹² Nănh stiz pâyz Zâu Yê-su coong woax đomc woac pây plaz zuc nănh stiz, songđ ta lov tayx Nănh, six nănh stiz cumh nzav songx munh, songđ dluyh pyenz phunz Nănh ninyh. ¹³ Quaix đangz, nănh stiz paiđ Pha-li-si munh cloon stăngc Hê-lôtv woax jau munh ninyh lov Zâu Yê-su, stiz oix jaf phunz Nănh coong woac longđ. ¹⁴ Stiz coong: "Stênx stengb lex, buz pâyz coong Mâyh six nyâuđ zac, max mangc toix laiv tauh nyăngz mynb mâyc, njăngb six hav. Zâu Tênb-hungh nyăngz gâyf Mâyh yâuc nzaox tuz seenz. Naz, buz seetb sôiv phunz Sê-sa Hungh tuz max loz?" ¹⁵ Buz seetb hođ six max seetb hođ?" Six Zâu Yê-su pâyz tuz stiz nyăngz nyâuđ ayx pâyh zac nyâuđ ngokx, Nănh songđ coong: "Nyâuh săngh laix bix taih coong woac stiv yaz? Zoz ah lepz nyanh taih phunz yaz mangc geh." ¹⁶ Stiz nzâyz ah lepz nyanh taih phunz Nănh, Nănh songđ naic coong: "Nâyx lepz nyanh naih toix laiv tauh nyăngz hanyh cloon toix laiv tauh nyăngz bux?" Stiz tauz: "Sê-sa nyăngz." ¹⁷ Zâu Yê-su coong ănz stiz: " Năngđ naz, toix laiv hungđ Sê-sa nyăngz six phunz Sê-sa, toix laiv hungđ Zâu Tênb-Hungh nyăngz six zuc phunz Zâu Tênb-Hungh!" nănh Stiz seenz numđ njingc nzongf Zâu Yê-su. ¹⁸ Naih đomc Sa-đu-sê nyăngz munh coong, munh tayc max hayh săngh phunb stengb taih. ¹⁹ Nănh stiz taih naic Zâu Yê-su coong: "Stênx stengb lex, Mô-se ja nâyx đomc gâyf bux buz: "Năngđ coong naih lanh munh zoz au max zengx naih sây bix tayc, nănh nyăngz yâuf six zuc zoz woax tauh au qua phunz nănh naih sây, stipx tah nyăngz six miuh. ²⁰ Naih nhlic yâuf pez, toonz coonz zoongz pyau max zengx naih sây bix tayc. ²¹ Yâuf lauđ nyâyc zoz nyamz qua, max zengx naih sây nănh lauf tayc. tah stamz tauh yâuf lauf năngđ naz. ²² Woa nhlic lanh yâuf pez max zengx naih sây tinyh đoih yâuc tayc nzuf, woa tauh au lauf tayc. ²³ năngđ naz, tauv săngh phunz stengb taih woax noib, woax tauh au six săngh mănv nyăngz au? songđ wâyc stiz nhlic lanh tinyh đoih tuz zoz nănh quaix" ²⁴ Zâu Yê-su tauz coong: "Nyâuh longđ nzof gôh, nyâuh six max saz canyx stâub mah six yeh, yâuc max pâyz Zâu Tênb-Hungh nyăngz gâyf mah. ²⁵ Tauv munh tayc săngh phunb sengb woax dlih, six năngđ tynb toongh nyăngz stynz munh nâyx, max zuc zoz au zoz langh. ²⁶ Coong tauv munh tayc năngx săngh phunb stengb taih, nyâuh max tuz toc quaix Mô-se ja coong, tâuf sac njăngx jeenz plungz woax yămc canyx stâub mah? Zâu Tênb-Hungh coong bux mô-se: "Yaz six Apc-la-ham nyăngz Zâu, I-sakv nyăngz Zâu, Ya-côpv nyăngz Zâu Tênb-Hungh. ²⁷ Nănh six munh săngh nyăngz Zâu Tênb-Hungh, max zâyf munh tayc nyăngz Zâu. Nyâuh seenz longđ lub nzongf gôh!" ²⁸ Naih ah tauh nzaox gâyf stênx stengb taih tauv numđ stiz tinyh nzengz gâyf, numđ Zâu Yê-su tauz woax đomc munh tuz hođ nzongf, woax tauh munh songđ naic zâu Yê-su coong: "Yeetx stong đoouc lif gâyf, toix laiv tyuh nongc seen quaix?" ²⁹ Zâu Yê-su tauz: "Nongc seen quaix nyăngz gâyf six năngđ nây: "I-sa-la-ên munh lex, mungv năngx gongx bex! Pănh nyăngz Zâu Tênb-Hungh, six ah tauh Zâu cungv. ³⁰ Six zuc nongc nzuf stymz nyâuđ, nongc nzuf zux ix, nongc nzuf tongb manyh, nongc nzuf jab stăngz mâyh nyăngz Zâu Tênb-Hungh!" ³¹ Tah nyâyc tyuh six năngđ nâyx: "yâuc zuc stăngz munh cayx năngđ cănh stăngz pănh nâyx! Max naih toix laiv tyuh gâyf năngx lub quaix nâyx iz tyuh gôh!" ³² Woax tauh nzaox gâyf stênx stengb tauz coong: "Stênx stengb lex, Mâyh seenz coong tuz hođ nzongf! Zâu Tênb-Hungh seenz năngx lub quaix, seetb blătc Nănh, max năngx naih pitc tauh Zâu. ³³ Munh nongc nzuf nyâuđ, nongc nzuf tongb manyh, nongc nzuf jab stăngz zâu Tênb-Hungh, yâuc stăngz munh cayx năngđ cănh stăngz pănh nâyx, âyz nâyx iz tyuh gâyf ayx six năngx gongx têx pu congx nyăngz stanyb lanyh." ³⁴ Zâu Yê-su phătc nănh tauz tuz jaođ nzongf, songđ coong: "Mâyh gâyh Zâu Tênb-Hungh nyăngz côkz max côz nzof gôh!" Tăng woa taih max naih mănv nzađ naic Nănh toix laiv hungđ. ³⁵ Yămz congx Zâu Tênb-Hungh nyăngz pyau nzaox munh woax dlih, Zâu Yê-su naic coong: "Săngh laix nzaox gâyf stênx stengb bix coong jix-tuz săngh Đa-vitv nyăngz sây stunz? ³⁶ Singx-lingh cănh phunz Đa-vitv coong: "Zâu coong bux Yaz nyăngz Zâu: Stâyv Yaz byaox phanx cah synh bex!, Zu Yaz phunz mâyh nyăngz yônz zaz ănz nzac mâyh nyăngz staux đi.' ³⁷ Đa-vitv hipđ Nănh ayx Zâu gôh, năngđ naz Nănh ayx laix hayh săngh Đa-vitv nyăngz stunz neh?" woax đomc munh songđ numđ nyađ mungv Nănh nzaox. ³⁸ Nănh nzaox stiz coong: "Six zuc bôngh nzaox gâyf stênx stengb, nănh stiz oix zuz gwuyz đao yăngh quaix ninyh quaix lauf, max yâuf ninyh woa caiz sangc njaf oix nongc munh đeh, yaf nănh stiz. ³⁹ Ninyh huyđ toongh nănh stiz yâuc sên tync gongx stâyv, nzac hynh nănh stiz sên stâyv cah zâyc phanx hynh coonz. ⁴⁰ Nănh stiz yauc munh nzif qua nyăngz jax toongx nhlinc, yâuf ca đanyc clo năngx đao yauc munh. Nâyx đomc munh six zuc tingc stoif năngx niđ têx!" ⁴¹ Zâu Yê-su stâyv stătx pungx hođ nyanh hoomh mangc munh pungx hođ, naih munh đungx puv quâyx pungx hođ nyanh đungx nzongf. ⁴² Yâuf naih ah tauh munh nzif qua zâuđ zomc taih pungx iz noz tongh stynh, cox ah su nyanh nâyx. ⁴³ Zâu Yê-su êu stâyb sây buz taih bux stiz coong: "Yaz bux nyâuh, nâyx tauh munh nzif qua nănh pungx hođ nyăngz nyanh năngx đungx têx muif lanh. ⁴⁴ Woax đomc munh naih đungx, nănh stiz cungb pungx ah tikx cah đany lêc, six nâyx tauh munh nzif qua zâuđ nzuf, six nănh nzâyz njynh yungf mengc nyăngz nyanh taih pungx hođ nzuf."