¹ Quaix đangz Zâu Yê-su ninyh Yê-lu-sa-lem Stengv, quaix Yiu-tai munh nyăngz ah nomz stêtz. ² Yămz Yê-lu-sa-lem Stengv cah synh naih ah nomz womz glangh, woa glangh synh naih pyaz sênz Mem glomx njiuh, woax nomz womz glangh hipđ ayx ( Bêtv-sa-tha.) Yiu-tai Munh nyăngz woac, hipđ ayx Pa-jiz yungh nyăngz jengh.” ³ Naih săngh gumc munh đungx phâyx woa zu womz tongf, mâyc buf, Mâyc blâuf, puf staux quac, Săngh gumc lênc yâuc naih.” ⁵ Wâyc zuc naih lauh zanyf, Yâuc hayh naih tauh Zâu nyăngz stynz-munh taih lou phunz glangh womz tongf. womz tongf blătc, Toix tauh nzac ninyh yomf đangc, Max cun hănđ six săngh toix laiv hungđ gumc, Yâuc tuz gumc gongx nzuf.” Yămz woa naih ah tauh munh săngh tuz stamx săpc pêtz nyăngv gumc. ⁶ Zâu Yê-su phătc nănh phâyx woa, Pâyz tuz nănh săngh gumc lauh nzongf songđ naic nănh, Mâyh oix nongc gumc gongx max?” ⁷ Woax tauh gumc munh tauz nănh coong, “Tah lex, womz tongc nyăngz săngx huđ, Max naih mănv ênz yaz ninyh nzac womz glangh, dluyh yaz cănh ninyh max zengx tuz tauv woa, Pitc tauh bêc nzac ninyh blătc nzof gôh. ⁸ Zâu Yê-su bux nănh coong, “Claof lex, Mâyh phanv nyoongz quef glonc mâyh nyăngz siu muf gôh.” ⁹ Woax tauh gumc munh lênh dlih tuz gumc gongx, Songđ nyoongz quef glonc nănh nyăngz stongv sic yăngh jau ninyh. Woax noib six toix tingc congz noib.” ¹⁰ Yiu-tai Munh coong bux woax tauh tuz gumc gongx nyăngz munh, nâyx noib six toix tingc congz noib, Mâyh jom stongv sic ninyh laiv six longđ pănh nyăngz gâyf nec.” ¹¹ Nănh tauz coong, “Zany gumc gongx phunz yaz woax tauh êu yaz Glonc stongv sic nzâyz ninyh lef.” ¹² Woax đomc munh naic nănh coong, “Toix laiv tauh êu mâyh nzâyz stongv sic ninyh? ¹³ Six tuz gumc gongx woax tauh munh max pâyz tuz toix lanh zany nănh nyăngz gumc gongx. Six wâyc zuc Zâu Yê-su yâuc gâyh nănh ninyh zanb woax đomc munh đungx nzof.” ¹⁴ Blătc woa Zâu Yê-su năngx pongh nănh zany gumc gongx woax tauh munh yămz woa layf paix pyau. Songđ coong bux nănh, Mâyh tuz gumc gongx nzuf nzof, blătc nây nongx gâyf năngx pamf stoif gôh bef, Sangx max đanyf zâyf hayh pongh zuc tix hungđ năngx huđ têx timb đev.” ¹⁵ Woax tauh munh muf lănv bux ayx lub nyăngz Yiu-tai munh coong, “Zany gumc phunz yaz woax tauh six Zâu Yê-su.” ¹⁶ Wâyc zuc nănh nongc tingc congz noib ayx nâyx đomc, Yiu-tai munh songđ oix lov jau ayx peo nănh.” ¹⁷ Six Zâu Yê-su bux nănh stiz, “Yaz nyăngz pha muif-dlih ayx cumh pâuz tauv nâyx zanyf, Yaz lauf muif dlih ayx cumh pâuz. ¹⁸ Zâu Yê-su coong nâyx đomc woac, ayx phunz Yiu-tai munh oix tayx nănh năngx nzongf têx timb, Nănh stiz coong, “Cah đangc noib, “Nănh ayx pamf tingc congz noib nyăngz Gâyf. Nâyx zanyf nănh yâuc năngx nzađ coong Tênb-Hungh six nănh nyăngz Pha. Nănh songđ cănh pâuh nănh cloon Tênb-Hungh tinyh lomc.” ¹⁹ Zâu Yê-su bux nănh stiz, “Yaz coong seenz bux nyâuh, Nzangc pha nyăngz toonz max hayh dluyh âyx ayx toix lungđ, Toonz phătc pha ayx toix lungđ, Nănh cungb ayx woax hungđ cungv, Pha ayx laiv hungđ, Nănh nyăngz toonz yâuc ayx woax hungđ.” ²⁰ Nzangc Pha stăngz nănh nyăngz toonz, Songđ zoz yeetx stong nănh ayx nyăngz muif hungđ jaoz phunz Nănh nyăngz toonz mangc, nyâuh mangc songđ phătc njingf.” ²¹ Wâyc Nzangc Pha phunz tayc ninyh nyăngz munh săngh phunb stengb taih, yâuc sađ săngh mengc phunz Nănh stiz. Nănh nyăngz toonz lauf năngđ woa nâyx, oix sađ săngh mengc phunz Nănh oix phunz woax đomc munh.” ²² Nzangc Pha yâuc max Stămđ toix laiv tauh nyăngz Stoif, Six nănh jaoz quyênh phunz Nănh nyăngz toonz stămđ Stoif.” ²³ Wâyc phunz munh pâuh nănh nyăngz toonz, Năngđ nănh stiz zanyb Nzangc Pha nâyx, Laiv tauh max zanyb toonz, Yâuc max zanyb paiđ nănh nyăngz toonz taih woax tauh. ²⁴ Yaz coong seenz bux nyâuh, Laiv tauh mungv yaz nyăngz woac yâuc zeen couv paiđ yaz taih woax tauh, Songđ tuz stâyv quâyx nyăngz mengc, Max zuc tingc Stoif, Tyuv tuz đutb zuc tayc nyăngz jau tuz mengc Săngh. ²⁵ Yaz coong seenz bux nyâuh, Săngx huđ oix tauv seenz tauv tayc ninyh nyăngz munh tuz numđ Tênb-Hungh nyăngz toonz nyăngz Stingb, Songđ tuz săngh phunb Stengb taih. ²⁶ Nzangc Pha năngđ laix nây ayx Săngh mengc nyăngz coonz tay, Nănh yâuc jaoz phunz Nănh nyăngz toonz ayx Săngh Mengc nyăngz coonz tay năngđ nănh nâyx.” ²⁷ Nzangc Pha jaoz quyênh phunz sănh nyăngz toonz stămđ Stoif, wâyc zuc nănh nyăngz toonz six bamh Munh.” ²⁸ Nyâuh max nongc nyâyh ganc Nâyx đomc dlayc, Tauv săngx huđ, tayc yămz stâu cah njaf nyăngz munh tuz numđ nănh nyăngz Stingb. ²⁹ Nănh stiz songđ tuz seetb stâu taih, ayx gongx woax đomc tuz săngh Mengc, ayx huđ woax đomc săngh phunb stengb taih zuc tingc Stoif.” ³⁰ Yaz max zâyf cănh âyz yaz nyăngz nyâuđ nyâyh ayx toix lungđ, Paiđ yaz taih woax tauh bux yaz ayx laix, Yaz nongc pengh stymz stămđ, Yaz max zâyf âyz yaz nyăngz âyx ayx, Six âyz paiđ yaz taih woax tauh ayx tuz hopđ nănh nyăngz nyâuđ.” ³¹ Six coong yaz cănh ayx zanyx manyf phunz yaz six max naih stuyh muc.” ³² Six coong năngđ naih ah tauh stăngc yaz ayx zanyx manyf, Nănh nyăngz woac six seenz naih stuyh muc.” ³³ Nyâuh bix paiđ munh ninyh Giăng woa, Nănh six phunz nyâuh pâyz tuz seenz” ³⁴ Yaz max zâyf sămv zuc munh stăngc yaz ayx zanyx-manyf, yaz coong năngđ nâyx six wâyc phunz nyâuh tuz Njâuv.” ³⁵ Giăng six năngđ ah zây toongz pu sac Gwăngz-eng. nyâuh cungb numđ nyađ nănh nyăngz Gwăngz yămz ah dlapc.” ³⁶ Yaz yâuc naih ah hungđ ayx zanyx manyf năngx lub têx Giăng ayx nyăngz zanyx manyf, Six nzangc Pha paiđ yaz taih ayx nyăngz cumh Pâuz, ³⁷ Nzangc Pha paiđ yaz taih, Nănh cănh stăngc yaz ayx zanyx manyf, Max zengx naih mănv nuđ quaix Nănh nyăngz stingb, Yâuc phătc quaix nănh nyăngz hanyh jangx.” ³⁸ Nyâuh nyăngz nyâuđ max sangh nănh nyăngz woac, wâyc zuc nyâuh max zeen paiđ nănh nyăngz toonz taih woax tauh.” ³⁹ Nyâuh seetb jab zah Canyx-Stâub, Laic stăngz six mungc Canyx-stâub stăngc nyâuh tuz stâyv quâyx nyăngz Mengc, Six nây Canyx-stâub ayx zanyx-manyf phunz yaz.” ⁴⁰ Six nyâuh max canx taih lov yaz nyăngz săngh Mengc.” ⁴¹ Yaz max zâyf taih lov bamh munh tanv yaz.” ⁴² Six yaz pâyz tuz yămz nyâuh nyăngz nyâuđ, Max naih Tênb-Hungh nyăngz stăngz.” ⁴³ Yaz đamz yaz nyăngz Pha nyăngz manyh yangh taih lănv, nyâuh max stipx yaz, Six năngđ naih pitc tauh taih lănv, nyâuh songđ oix stipx nănh.” ⁴⁴ Nyâuh numđ nyađ tuz munh tanv, Six nyâuh max oix lov gongx quaix woax tauh Tênb-Hungh tanv Nănh?” ⁴⁵ Nyâuh max nongc laic Stăngz six yaz yămz Nzangc Pha nyăngz cah đangc oix coux nyâuh. coux nyâuh woax tauh Six nyâuh pangc couv woax tauh Mô-sê.” ⁴⁶ Six coong nyâuh năngđ zeen Mô-sê, nyâuh lauf zeen Yaz, wâyc zuc Mô-sê ja nuz lănv tauv Yaz.” ⁴⁷ Six coong nyâuh năngđ max zeen Mô-sê têx, nyâuh ayx laix hayh zeen yaz nyăngz woac?”