¹ Tauv woax nomz layf paix yeetx noib, Bah đomz tonf njâu gungh max zengx gwăngz, Ma-đơ-len Muôngf nyăngz Ma-li-ya, Ninyh tayđ Stâu, ninyh tauv woa phătc woax nomz nongz stâu jengh njauz toiv seetb taih nzof.” ² Ma-li-ya coonx tyuv muf bux Si-môn Phê-e-rơ cloon Zâu Yê-su woax tauh stâyb-sây coong, “Nănh stiz zoz Zâu nyăngz stynb seetb stâu ninyh nzof gôh, max pâyz nănh stiz nzâyz ninyh ănz laiv tix.” ³ Phê-e-rơ cloon Zâu stăngz woax tauh stâyb-sây songđ ninyh mangc.” ⁴ Nănh stiz iz lanh tyuv ninyh, Six woax tauh stâyb-sây tyuv năngx căn têx, songđ ninyh tauv woa stâu đangc. ⁵ Nănh cah đong tex Mangc woa stâu ngamh cah njaf, Cungb phătc buyx yămz woa, Six nănh max nzac cah njaf ninyh.” ⁶ Si-môn ninyh tauv, Nănh ninyh zac đanyz nzac cah Njaf ninyh mangc phătc woax đomc buyx tăpx ănz woa, ⁷ Yâuc phătc pêuz nănh pyây woax cănv buyx Glonf tăpx lanyc ănz ah đoif, max songc cloon woax đomc ănz ah đomc. ⁸ Tauv đangc woax tauh stâyb-sây yâuc lêpc nzac ninyh, Nănh phătc nzuf songđ zeen.” ⁹ Woax zanyf nănh stiz iz lanh lauf max saz nâyx đomc Canyx-stâub nyăngz woac Ja lănv Zâu Yê-su tayc năngx săngh phunb stengb woax đomc woac.” ¹⁰ Nănh stiz iz lanh stâyb-sây songđ phunb đangz lauf nănh stiz nyăngz pyau.” ¹¹ Six Ma-li-ya Stâuđ woa Stâu cah synh haoh, Yâuc cah đong tex Mangc woa Stâu ngamh cah njaf.” ¹² Phătc iz lanh stynz Munh zuz gwuyz pec stâyv tăpx Zâu Yê-su woax tix tync, ah lanh stâyv limb woa pyây tauh, ah lanh stâyv staux saz.” ¹³ Nănh stiz naic Ma-li-ya coong, “ô lex! Săngh laix ô bix haoh weh?’ Nănh tauh, “max pâyz mănv nzâyz yaz nyăngz Zâu ninyh ănz laiv tix yaz yâuc max pâyz.” ¹⁴ Ma-li-ya coong nzuf nâyx đomc woac nănh wynb lauf phătc Zâu Yê-su stâuđ woa nib, Six nănh max saz tuz Zâu Yê-su.” ¹⁵ Zâu Yê-su naic nănh coong, “ô lex! Mâyh săngh laix bix haoah weh? mâyh taih lov laiv tauh weh? Ma-li-ya laic Stăngz Nănh six ayx jămđ lauđ wynb nyăngz Munh, Songđ naic nănh coong, “Tah lex! Mâyh nzâyz ninyh ănz laiv tix jođ lănv bux Yaz, Yaz nzăngđ hayh ninyh zoz nănh nzâyz lauf nef” ¹⁶ Zâu Yê-su coong, “Ma-li-ya lex! Ma-li-ya, Phanv wynb đangz lauf nongc Yiu-tai munh nyăngz woac coong, “Ya-bu-Ni! Âyz gâyf six stâyb Pha.” ¹⁷ Zâu Yê-su bux nănh, “Nongx gâyf zengx lumz tauv yaz, wâyc zuc yaz max zengx muf nzangc Pha woa, Mâyh muf lănv bux Yaz nyăngz stâyb-sây buz coong, “Yaz năngx zuc muf Nzangc Pha woa, Nănh ayx yaz nyăngz Tênb-Hungh Yâuc ayx nyâuh nyăngz Tênb-Hungh.” ¹⁸ Ma-đơ-len Muôngf nyăngz Ma-li-ya songđ ninyh lănv bux Stâyb-Sây buz coong, “Yaz tuz phătc Zâu nzuf nzof gôh, Nănh năngx lănv Zâu Yê-su bux nănh woax đomc woac, Lănv bux phunz stâyb-Sây buz mungv.” ¹⁹ Woax noib six toix layf paix yeetx noib, Gungh nzămc blâuf têx woax zanyf, Stâyb-sây buz căpx dlonf Yămz woax hoongv pyau, Ja muif tungh jengh nzuf, wâyc zuc nănh stiz cumh nzav ayx lub woax đomc Yiu-tai munh, Max laic nyâyh Zâu Yê-su hynđ yangh seetb taih stâuđ nănh stiz woa mungh tongx congv, Coong bux Nănh stiz pengh oonz phunz muif lanh.” ²⁰ Zâu Yê-su coong nzuf, Nănh yăngf puf staux tungh tingz paz phunz Stâyb-Sây buz mangc, Nănh stiz phătc nzuf Zâu songđ seenz numđ nyađ nzongf.” ²¹ Nănh năngx coong bux nănh stiz, “Pengh oonz phunz nyâuh đomc, Yaz nyăngz Pha, Paiđ yaz ninyh năngđ laix, Yaz yâuc paiđ nyâuh ninyh năngđ woa Nâyx.” ²² Coong songf nănh wynb muf Stâyb-sây buz woa hob siv ănz quaix nănh stiz cah zâyc ninyh yâuc coong, “nyâuh stipx Singx-lingh gôh!” ²³ Six coong nyâuh quanyf toix laiv tauh nyăngz Stoif, nyâuh nyăngz Stoif songđ tuz quanyf Nzuf, Six coong nyâuh năngđ max quanyf Stoif phunz toix laiv tauh, woax tauh nyăngz Stoif lauf max tuz quanyf.” ²⁴ Săpc nyâyc tauh Stâyb-sây naih ah tauh bux hipđ ayx Thô-ma, Munh hipđ ayx sây toix woax Tauh, Zâu Yê-su taih woax zanyf, Thô-ma max cloon stiz yămz woa.” ²⁵ woax đomc stâyb-sây buz lănv bux Nănh, Buz tuz phătc Zâu nzof gôh, Thô-ma coong, “six coong yaz max tuz Phătc Nănh nyăngz puf staux tungh tingz paz, Six coong yaz max tuz zoz bah đoz zob nănh nyăngz puf staux tungh tingz cotb, Yaz max tuz zob nănh nyăngz lauđ tam wif nzopb nyăngz cotb yaz bêc max zeen.” ²⁶ Ah jeetb quaix đangz, Stâyb-Sây buz năngx căpx dlonf yămz ah sênz pyau, ja jengh seen nzuf, woax hâyc Thô-ma cloon nănh stiz yămz woa. Zâu Yê-su hynđ yangh nzac taih stâuđ nănh stiz nyăngz mungh tongx congv coong bux nănh stiz, “Pengh oonz phunz nyâuh yâuf pez.” ²⁷ Zâu Yê-su coong bux Thô-ma, Nongc mâyh nyăngz puf lumz yaz nyăngz puf staux mangc geh! Zoz mâyh nyăngz bah đoz zob yaz nyăngz lauđ tam wif nzopb nyăngz paz Mangc geh! Max nongc nyâyh ganc, Phanv zeen gôh.” ²⁸ Thô-ma hamv coong, “Yaz nyăngz Zâu Tênb-Hungh lex!” ²⁹ Zâu Yê-su coong bux Thô-ma, wâyc zuc mâyh tuz phătc nzuf Yaz, Mâyh nzăngđ zeen Yaz? Max phătc quaix Yaz, Yâuc zeen yaz woax đomc naih pengh oonz.” ³⁰ Zâu Yê-su năngx toongx stâyb-sây buz ayx Jix-caox njingf đungx nzongf, six max tuz ja ănz nâyx pun stâub. ³¹ Ja nâyx đomc six wâyc phunz nyâuh zeen Yê-su six ayx njâuv Zâu, * Yâuc ayx Tênb-Hungh nyăngz toonz. Wâyc zuc nyâuh zeen nănh. nyâuh songđ tuz stâyv quâyx nyăngz Mengc.”