¹ Max zengx tauv stêtz jođ noib quaix đangc, Zâu Yê-su ninyh Bê-ta-ni njăngv, Tayc blătc Zâu Yê-su bix ayx phunz săngh taih woax tauh La-sa-rơ yămz woax tyuh njăngv.” ² Yămz woa nănh stiz bênc ah tonx năngv hâuđ Zâu Yê-su, Ma-ta bênc njayz năngv, Six La-sa-rơ Cloon Yê-su songc hynh nhlync năngv.” ³ Woax zanyf, Ma-li-ya zoz ah nomz zaih ănz ah đam quaix nâyx Na-đa Yâuh đangz saix nzongf taih njămh ănz Zâu Yê-su nyăngz staux, năngx nongc nănh nyăngz pyây đongz stotb gaib, Yâuh siv đangz pong pyau nzuf.” ⁴ Naih ah tauh Zâu Yê-su nyăngz stâyb-sây Yu-đatc, ikv-sa-ca-li-ôtv, six oix maic nănh woax tauh taih coong, “ ⁵ ayx lungđ bix max pâyz nzâyz lâyc đomc yâuh đangz ninyh maic, nzâyz woax đomc nyanh ninyh patz phunz munh zâuđ munh? lâyc đomc yâuh saix nzongf, Năngđ maic têx, Stunx tuz stamx pez noib nyăngz congz stynh nef.” ⁶ Yu-đatc năngđ nâyx coong six max zâyf nănh naih nyâuđ hâuđ lênh munh zâuđ munh. Wâyc nănh six ayx stac, Nănh jămđ Zâu Yê-su buz nyăngz nyanh hoomh, Six nănh nymc lanyc nongc.” ⁷ Zâu Yê-su coong bux Nănh, “Max nongc coong nănh đêh! Nănh naih nyăngz dluyh pyenz nănh njâuh zu tauv nongc plopx yaz nyăngz stynb stayđ woax noib. ⁸ Nyâuh muif-dlih naih munh Zâuđ munh cloon nyâuh yămz, Six yaz max zâyf stâyv quâyx tuz cloon nyâuh yămz nef!” ⁹ Naih đomc Yiu-tai Munh đungx numđ lănv coong, “Zâu Yê-su năngx yămz Bê-ta-ni njăngv, Nănh stiz songđ ninyh woa, Six max zâyf cungb ninyh lov Zâu Yê-su cungđ, Six nănh stiz oix mangc njynh cloon tayc blătc, bix Yê-su ayx phunz nănh săngh taih woax tauh La-sa-rơ.” ¹⁰ Woax đomc stayb munh pyây ta zux ix oix tayx njynh cloon La-sa-rơ.” ¹¹ Wâyc zuc tăng La-sa-rơ nyăngz dlayc seetb taih, ayx bây Munh đungx quengx stayb Munh bix ninyh lêpc Zâu Yê-su.” ¹² Tah nyâyc noib, taih quaix stêtz woax đomc songx munh numđ lănv coong, “Zâu Yê-su taih cayx Tauv Yê-lu-sa-lem stengv gôh naz. ¹³ Nănh stiz songđ nzauf pangx noomh seetb ninyh stipx, Yâuc hamv êu coong, “Hô-sa-na!* Jođ sađ pôz phunz tingz Zâu nyăngz bux taih woax tauh. “Jođ Tênb-Hungh sađ pôz phunz I-sa-la-ên Munh nyăngz Hungh stix.” ¹⁴ Zâu Yê-su lov tuz ah tauh maf lih jeenz songđ zâyh taih năngđ Canyx-stâub ja coong nâyx, “ ¹⁵ Si-ôn Stengv lex! Mâyh max nongf Cumh nzav đêh! Mâyh nyăngz Hungh zâyh maf-lih jeenz taih nzof gôh”* ¹⁶ Lauh zanyf, ztâyb-sây buz max saz nâyx đomc dlayc, Six tauv Zâu Yê-su tuz Gwăngz-eng nănh stiz nzăngđ săngx tauv Canyx-stâub ja lănv tauv Zâu Yê-su, yâuc zuc munh ayx laix ănz nănh.” ¹⁷ Phătc Zâu Yê-su êu La-sa-rơ tăng stâu seetb taih woax đomc songx Munh lănv nzuf nănh ayx nâyx đomc dlayc Phunz munh mungv.” ¹⁸ wâyc zuc songx munh numđ lănv Zâu Yê-su ayx nâyx hâyđ Jix-caox njingf nyăngz dlayc, Nănh stiz songđ seetb ninyh stipx Nănh hoongc nzongf.” ¹⁹ Pha-li-si Munh lanh bux lanh coong, “nyâuh mangc geh! nyâuh phătc max zengx? Pănh ayx max seetb laiv hungđ, Six Tênb-yaf Munh ninyh lêpc nănh nzuf nzof gôh yec!” ²⁰ Ninyh Yê-lu-sa-lem Stengv quaix pyeenv Mengc stêtz woax zanyf, Naih đomc hi-lapc munh lauf lêpc ninyh canyx-bongc. ²¹ Nâyx đomc hi-lapc Munh taih lov Phi-lipv, six yămz Ga-li-lê stengv, Bêtv-sai-đa njăngv taih woax tauh stâyb-sây, Bux nănh coong, “Tah lex! Buz oix pongh Yê-su.” ²² Phi-lipv ninyh lănv bux Any-rê, nzof nănh stiz iz lanh songđ lănv bux Zâu Yê-su.” ²³ Nănh bux coong, “Nâyx zanyf yaz bamh munh nyăngz toonz songđ tauv Săngx huđ tuz Gwăngz-eng gôh.” ²⁴ Yaz coong seenz bux nyâuh, “ah nomz zub max songx nzac nib phunz yotz Têx, Njynh leox lauf cungb woax nomz zub, Six coong năngđ songx nzac nib phunz nănh yotz, Bêux taih nzăngđ tuz zunx đungx nomz. ²⁵ Toix laiv tauh cănh stăngz nănh nyăngz mengc, woax tauh six zuc quanyf mengc, Six toix laiv tauh stêtb nănh nyăngz Mengc yămz nây stâyv sangc woax tauh six tuz mengc Săngh.” ²⁶ Toix laiv tauh oix stăngc yaz ayx yaz nyăngz Pâuz, six zuc lêpc yaz ninyh, Yaz yămz laiv pâuz yâuc cloon yămz woa, Toix tauh ayx yaz nyăngz pâuz, Yaz nyăngz Pha songđ oix pâuh Nănh.” ²⁷ Nâyx zanyf, Yaz numđ stauh stymz nzongf, Yaz cayx coong laix? Cayx coong Pha lex, Njâuv yaz max phunz pongh zuc nâyx đomc dlayc naz mah six? Max zâyf đêh, Yaz taih six zuc pongh nâyx đomc zâuđ nanc.' ²⁸ Ax Pha lex! Jođ phunz Pha nyăngz bux tuz Gwăngz-eng, “Naih stingb yămz woa gungh coong nzac taih, “Yaz songđ phunz yaz nyăngz bux tuz gwăngz-eng nzof, Six yaz năngx oix phunz tuz gwăngz-eng timb!” ²⁹ Songx munh stâuđ woax numđ nâyx đomc woac stingb, Naih đomc coong, “Bah congz haoh, Naih đomc coong, “Lâyc Six Stynz-munh cloon Nănh coong woac lêđ đêh.” ³⁰ Zâu Yê-su bux nănh stiz coong, “Nâyx đomc stingb seetb taih max zâyf wâyc yaz đêh, Six wâyc nyâuh.” ³¹ Nâyx zanyf tauv săngx huđ nây bamh canz zuc tingc Stoif, Six nzauf quyênh cun bamh canz woax tauh songđ zuc luiđ seetb ninyh.” ³² Six yaz bamh munh nyăngz toonz, zuc munh njăpf staox njăngb gâyh nib mync woax zanyf, Yaz six oix ninyv muif tauh munh taih lov Yaz.” ³³ Nănh lănv năngđ nâyx, Six phunz nănh six zuc tayc năngđ laix.” ³⁴ Songx munh naic coong, “Ha buz numđ đoouc-lif gâyf Stâub bux buz coong, “Njâuv Zâu six stâyv quâyx săngh, ha Stênx-stengb yâuc coong, “Bamh munh nyăngz toonz yâuc zuc njăpf staox njăngb? Ha bamh munh nyăngz toonz six toix laiv tauh?” ³⁵ Zâu Yê-su bux Nănh stiz coong, “Gwăngz-eng năngx cloon nyâuh yămz ah dlapc timb! Năngx naih Gwăngz-eng nyăngz Săngx huđ bix coonx yăngh jau zef gôh, Cumh nzav nzămc nyăngz săngx huđ taih tăng, Toix laiv tauh njynh nzămc yăngh jau, woax tauh songđ max pâyz jau ninyh laiv tix.” ³⁶ Năngx naih Gwăngz-eng nyăngz săngx huđ, nyâuh six zuc zeen couv Gwăngz-eng, nyâuh songđ pênx gwăngz-eng nyăngz munh.” coong nzuf nâyx đomc woac, Nănh songđ seetb ninyh Mem nănh stiz.” ³⁷ Max cunv Zâu Yê-su hănđ ayx Jix-caox njingf nyăngz dlayc tăng laiv đungx phunz Yiu-tai Munh phătc, Six nănh stiz lauf max zeen nănh.” ³⁸ Năngđ naz wâyc phunz I-sa-ya Stênx-stengb nyăngz woac seetb taih toix nzuf, “Ê-sai coong, “Zâu lex! Naih mănv zeen buz lănv nyăngz woac? “Zâu phunz toix laiv tauh tuz phătc mâyh nyăngz lanyf?”* ³⁹ Wâyc nâyx nănh stiz max hayh zeen, wâyc zuc Ê-sai coong, ⁴⁰ “Tênb-Hungh oix phunz Nănh stiz nyăngz mâyc buđ, “Yâuc phunz nănh stiz nyăngz nyâuđ nhlengc, “Six coong nănh stiz nyăngz mâyc năngđ hayh mangc tuz Phătc, “Nănh stiz nyăngz stymz nyâuđ yâuc hayh manyh pec, “Nănh stiz songđ phunb đangz taih phunz yaz zany gongx nănh Stiz.” ⁴¹ Ê-sai năngđ nâyx coong, “six wâyc zuc nănh tuz phătc Zâu Yê-su nyăngz Gwăngz-eng, “Yâuc ayx zanyx jênx lănv tauv Nănh.” ⁴² Naih ah po ayx lub nyăngz Yiu-tai munh zeen Zâu Yê-su, Six nănh stiz max nzađ toongx songx nhlimc Zâu Yê-su, wâyc zuc nănh stiz cumh nzav Pha-li-si munh hayh oix luiđ Nănh stiz seetb Huyđ-toongh.” ⁴³ Nănh stiz numđ nyađ tuz munh tanv nănh stiz năngx nzongf têx, Tuz Tênb-Hungh tanv.” ⁴⁴ Zâu Yê-su nongc stingb hamv lub coong, “Toix laiv tauh zeen taz, Max zâyf cungb zeen yaz cungđ, Nănh yâuc zeen njynh paiđ yaz taih woax tauh.” ⁴⁵ Laiv tauh phătc yaz, Nănh yâuc phătc cloon paiđ yaz taih woax tauh. ⁴⁶ Yaz nzac bamh canz taih ayx nomz Gwăngz, Laiv tauh zeen yaz max zuc yămz nzămc cah Njaf.” ⁴⁷ Laiv tauh numđ yaz nyăngz woac yâuc âyz ayx, Yaz lauf max tingc nănh nyăngz Stoif, Yaz max zâyf taih stămđ bamh munh nyăngz Stoif, Six yaz taih Njâuv nănh stiz.” ⁴⁸ Toix laiv tauh nzêmh max oix mungv yaz nzaox nyăngz woac, Cănh naih ah tauh oix tingc Nănh, Tauv Stêtb mâyv woax noib, Yaz nyăngz woac cănh oix tingc nănh nyăngz Stoif.” ⁴⁹ Wâyc zuc yaz nyăngz woac six max zâyf yaz nyăngz nyâuđ nyâyh seetb taih coong, “Nzangc Pha paiđ yaz taih bux toix lungđ, Yaz yâuc âyz woa lănv bux nyâuh.” ⁵⁰ Yaz pâyz tuz nănh nyăngz lanyf hayh phunz munh tuz Stâyv quâyx nyăngz Mengc, wâyc nâyx yaz âyz nyăngz Pha bux nyăngz woac lănv bux nyâuh.”