¹ Naih ah tauh munh bux hipđ ayx La-sa-rơ, Nănh săngh gumc, Nănh yămz Bê-ta-ni Njăngv, six Ma-li-ya, Cloon nănh nyăngz ô ma-ta yămz woax tyuh njăngv.” ² Nâyx tauh Ma-li-ya, Six nongc yâuh đangz lapc ănz Zâu Yê-su nyăngz staux, yâuc nongc mâyc womz đaox Zâu nyăngz staux, Yâuc nongc nănh nyăngz pyây đongz stotb tuz gaib. Săngh gumc woax tauh La-sa-rơ Six Ma-li-ya nyăngz tah.” ³ Nănh stiz iz ô stayx Ma-li-ya, Cloon Ma-ta pungx woac ninyh bux Zâu Yê-su, Zâu lex! Mâyh stăngz woax tauh săngh gumc nzof gôh.” ⁴ Zâu Yê-su numđ nâyx đomc woac nănh coong, “Nâyx tauh gumc max zengx tayc tuz munh đêh, Nănh săngh nâyx hâyđ gumc wâyc phunz munh pâuh Tênb-Hungh, Nâyx tauh gumc yâuc oix phunz Tênb-Hungh pâuh Nănh nyăngz toonz. ⁵ Zâu Yê-su stăngz nănh stiz iz ô stayx, Ma-Li-Ya, Ma-ta, Cloon La-Sa-rơ” ⁶ Nănh numđ munh lănv coong, “La-Sa-rơ săngh gumc naz, “Nănh lauf năngx yămz woa tuz iz noib.” ⁷ Nzof nănh nzăngđ taih bux stâyb-sây buz coong, “Pănh ninyh Yu-Đê stengv gôh.” ⁸ Stâyb-sây buz tauz, “Stâyb-Pha lex! nyax noib woa yămz woa nyăngz Yiu-tai munh oix zoz njauz ôx mâyh nzof, Mâyh zâyf năngx oix phunb đangz muf woa naz?” ⁹ Zâu Yê-su tauz, “ah noib max zâyf naih săpc nyâyc săngx huđ gungh gwăngz mah? Toix laiv tauh toongx bah noib zax yăngh jau six max zuc tib zomf. Wâyc zuc Nănh mangc tuz phătc bamh canz nyăngz gwăngz.” ¹⁰ Six coong toix laiv tauh njynh nzămc yăngh jau nef têx, Nănh six zuc tib glinyf, wâyc zuc max naih Gwăngz syux Nănh. ¹¹ Coong songf nâyx đomc woac, Nănh năngx coong, “Pănh nyăngz toic La-sa-rơ, mâyh njoomh nzof, Pănh ninyh êu nănh năngx đyub nyoongz quef gôh.” ¹² Stâyb-sây buz tauz, “Six coong nănh cungb mâyc njoomh têx, Nănh six năngx hayh gongx taih lef. ¹³ Zâu Yê-su coong nyăngz âyz gâyf six coong La-sa-rơ tayc nzof, Six stâyb-sây buz laic stăngz six seenz cungb mâyh njoomh cungv, ¹⁴ Wâyc năngđ nâyx Zâu Yê-su nzăngđ coong tuz yox, Coong La-sa-rơ tayc nzof gôh naz.” ¹⁵ Yaz numđ nyađ phunz nyâuh, wâyc zuc max naih yaz yămz woa phunz nyâuh zeen, Nâyx zanyf pănh ninyh nănh woa gôh sec?” ¹⁶ Thô-matv munh hipđ ayx sây toix woax tauh taih bux woax đomc stâyb-sây buz coong, “Pănh tinyh đoih lêpc stâyb-Pha ninyh gôh seb? Pănh ninyh songđ tuz cloon nănh tayc.” ¹⁷ Zâu Yê-su ninyh tauv Bê-ta-ni njăngv woax zanyf, Nănh numđ munh lănv coong, “La-sa-rơ Plopx tuz pôz noib nzof.” ¹⁸ Bê-ta-ni njăngv gâyh Yê-lu-sa-lem stengv pôz gâyf jau. ¹⁹ Yiu-tai munh đungx taih phanc Ma-li-ya, cloon Ma-ta, Phanc nănh stiz zay stauh, wâyc zuc nănh stiz nyăngz tah tayc.” ²⁰ Ma-ta numđ munh lănv coong, “Zâu Yê-su taih nzof, Nănh songđ seetb ninyh stipx, Six Ma-li-ya, Yămz woa pyau. ²¹ Ma-ta coong bux Zâu Yê-su, “Zâu lex! Six coong mâyh năngđ yămz nây têx, Yaz nyăngz tah max zuc tayc.” ²² Six nâyx zanyf yaz pâyz tuz mâyh jođ Tênb-Hungh toix laiv lungđ, Tênb-Hungh yâuc oix sađ woax hungđ phunz mâyh.” ²³ Zâu Yê-su bux nănh coong, “Mâyh nyăngz tah năngx săngh lêđ.” ²⁴ Ma-ta tauz, “Yaz pâyz tuz tauv stêtb mâyv woax noib nănh lauf năngx tuz săngh.” ²⁵ Zâu Yê-su bux tauh munh sab, “Yaz six phunz munh naih Săngh Mengc woax tauh, Toix laiv tauh zeen yaz max Cun nănh hănđ tayc Blătc, Nănh lauf năngx tuz Săngh phunb stengb taih. ²⁶ Toix laiv tauh năngx săngh bix zeen yaz, woax tauh stâyv quâyx max tayc, năngđ naz mâyh zeen maz max?” ²⁷ Ma-ta tauz, Zâu lex! Yaz zeen lêđ, Mâyh seenz zâyf ayx Njâuv Zâu Tênb-Hungh nyăngz toonz, Payh zuc nzac bamh canz taih woax tauh.” ²⁸ Ma-ta coong songf nănh pinyx lauf bux nănh nyăngz stayx Ma-li-ya, coong, “Stênx-stengb taih tauv nzof gôh, Nănh oix naic mâyh.” ²⁹ Ma-li-ya numđ nâyx đomc woac, Nănh songđ coonx nyoongz quef ninyh Zâu Yê-su woa.” ³⁰ Woax zanyf, Zâu Yê-su max zengx nzac njăngv, Nănh lauf năngx yămz nănh pongh Ma-ta woax tix tync.” ³¹ Cloon Ma-ta yămz pyau stăngc nănh stiz zay stauh woax đomc Munh, Phătc Ma-li-ya coonx nyoongz quef seetb ninyh, Nănh stiz songđ lêpc nănh ninyh, Nănh stiz laic stăngz six nănh ninyh woa stâu haoh. ³² Ma-li-ya ninyh tauv Zâu Yê-su woax. Songđ quâyc nzac nănh nyăngz cah đangc ninyh coong, “Zâu lex! Six coong mâyh năngđ yămz nây têx, Yaz nyăngz tah six max zuc tayc nef.” ³³ Zâu Yê-su phătc Ma-li-ya haoh, nzof lêpc Ma-li-ya woax đomc Munh lauf tinyh đoih haoh, Nănh songđ numđ munz stymz nzongf.” ³⁴ Zâu Yê-su naic, “nyâuh nzâyz Nănh ninyh plopx ănz laiv? Nănh stiz tauz, “Zâu lex! Mâyh phanv taih mangc geh!” ³⁵ Zâu Yê-su songđ haoh.” ³⁶ Woax đomc Yiu-tai Munh lanh bux lanh coong, “Mangc geh! Nănh seenz stăngz La-sa-rơ nzongf gôh.” ³⁷ Woax đomc munh naih ah phanx coong, “Nănh ayx tuz mâyc buđ munh hayh mangc tuz phătc jau, Nănh max hayh ayx tuz La-sa-rơ max zuc tayc mah?” ³⁸ Nănh numđ munz stymz nzongf songđ ninyh woa Stâu, woax nomz stâu six njauz bengx cotb, Yâuc naih njauz pyây lub zeetx woa cotb nzeetx. ³⁹ Zâu Yê-su bux coong, “Clinyx lâyc njauz seetb laih jađ!” tayc woax tauh La-sa-rơ nyăngz muc Ma-ta coong, “Zâu lex! stâyx mengh nzof, buz bêc plopx Nănh tuz pyâyz noib nzof.” ⁴⁰ Zâu Yê-su bux nănh stiz coong, “Yaz max zâyf bux nyâuh quaix nzof mah? six coong mâyh năngđ zeen yaz, Mâyh six tuz phătc Tênb-Hungh nyăngz Gwăngz-eng.” ⁴¹ Nănh stiz zoz woax nomz njauz pyây seetb taih, Zâu Yê-su zaub mynb mangc staox gungh ninyh yâuc coong, “Pha lex! yaz hâuđ mâyh, wâyc zuc mâyh mungv yaz nyăngz woac.” ⁴² Yaz pâyz tuz Pha muif dlih mungv Yaz, Yaz coong năngđ nâyx six wâyc phunz stâuđ nây cah synh nyăngz munh zeen tingc Pha paiđ yaz taih.: ⁴³ Cong songf nănh hamv stingb lub coong, “La-sa-rơ lex! seetb taih zef gôh!” ⁴⁴ Woax tauh munh tayc Pletx seetb taih, Nănh nyăngz puf staux naih buyx sênh woa, woa mynb lauf naih buyx pongz woa, Zâu Yê-su bux nănh stiz coong, “căn nyâuh ninyh zay phunz nănh yăngh zef.” ⁴⁵ Năngđ nâyx taih phanc Ma-li-ya woax đomc Yiu-tai Munh phătc Zâu Yê-su ayx nâyx đomc dlayc, Songđ naih munh đungx zeen nănh.” ⁴⁶ Six naih ah po Munh muf lănv Zâu Yê-su ayx nyăngz dlayc bux phunz Pha-li-si Munh mungv.” ⁴⁷ Stayb munh pyây cloon Pha-li-si Munh căpx dlonf, êu cun dlayc munh taih sangv gwoangh lanh naic lanh coong, “Nâyx zanyf pănh cayx ayx laix? Lâyc tauh munh ayx Jix-caox njingf nyăngz dlayc đungx nzongf.” ⁴⁸ Six coong pănh năngđ dluyh Nănh ayx năngđ nâyx, Munh songđ ninyh lêpc nănh nzuf gôh, Năngđ ha Lô-ma nzêuh Quanz songđ pangc nâyx nomz congv taih ayx huđ ănz pănh nyăngz layf paix toongh, Yâuc zab nzuf pănh nyăngz stâyz-Phangz.” ⁴⁹ Nâyx đomc munh naih lanh munh bux hipđ ayx Cai-pha, woax nyăngv nănh ayx stayb munh pyây, Nănh (lănv) coong, “nyâuh seenz max pâyz lungđ gôh!” ⁵⁰ Nyâuh max âyz mah? Phunz ah lanh munh tayc tayv pec stingx six năngx gongx têx, ah stingx munh zuc mêtc nzuf.” ⁵¹ Cai-pha coong Nâyx đomc woac six max zâyf nănh cănh nyâyh seetb coong, “Six wâyc zuc woax nyăngv six toix zuc nănh ayx stayb munh pyây, Nănh songđ coong stênx stengb quaix đangc nyăngz woac nuz tauv Zâu Yê-su zuc tayc tayv pec stingx Yiu-tai Munh.” ⁵² Yâuc max zâyf cungb wâyc woax stingx cungđ, Nănh yâuc oix sâub dlonf Tênb-Hungh nyăngz Namh-nyâuf, nzêux nây gungh đi zuc gaih jêmh nyăngz Munh pênx ah peob.” ⁵³ Tăng woax noib staox ninyh, Nănh stiz ta zux ix tayx Zâu Yê-su.” ⁵⁴ Wâyc năngđ nâyx Zâu Yê-su songđ max năngđ cah đangc noib toongx songx yâuh Yu-đê Stengv phunz Yiu-tai Munh phătc Nănh, “ Nănh ninyh yămz ah tyuh njăngv bux hipđ ayx êpv-pha-im, cloon nănh nyăngz stâyb-sây buz sec yămz woa stătx stâyz-phangz blănf.” ⁵⁵ Cayx tauv Yiu-tai munh nyăngz pyeenv Mengc stêtz, Munh đungx tăng stâyz Zâuv ninyh Yê-lu-sa-lem stengv stav wâyx đangc, Nzăngđ ninyh quaix stêtz. ⁵⁶ Nănh stiz ninyh yămz woa layf paix pyau lov Zâu Yê-su, lanh naic lanh coong, “nyâuh nyâyh mungv geh? Nănh nzađ taih nây quaix stêtz max?” ⁵⁷ Woax zanyf stayb munh pyây cloon Pha-li-si Munh seetb lanyf coong, “Toix laiv tauh pâyz Zâu Yê-su Yămz laiv tix, six zuc bux nănh stiz ninyh zoz Nănh.”