¹ Zâu Yê-su nzaox coong, “Yaz coong seenz bux nyâuh, “Toix laiv tauh taih nzac Pa-jiz yungh nyăngz đungc, Bix max zâyf nzac Singh jengh taih, Bix lêuz quaix pitc đoif nzac taih woax tauh six cungb taih ayx stac.” ² Six nzac singh jengh taih woax tauh nzăngđ zâyf zu pa-jiz yungh nyăngz munh.” ³ Zu singh nyăngz munh songđ coib jengh Phunz, Pa-jiz yungh yâuc mungv nănh nyăngz stingb. Nănh saox êu muif tauh yungh nyăngz bux. Songđ ênz Nănh stiz seetb singh ninyh.” ⁴ Pungx nănh stiz seetb ninyh nzuf, Nănh ninyh đangc, Pa-jiz yungh yâuc lêpc nănh ninyh, wâyc zuc nănh stiz saz tuz nănh nyăngz stingb. ⁵ Pitc tauh munh ninyh yungh max lêpc, Cungb oix tyuv cungv. Wâyc zuc yungh max saz nănh nyăngz stingb.” ⁶ Zâu Yê-su lănv nâyx tyuh woac pây bux nănh stiz, Six nănh stiz max saz âyz gâyf." ⁷ Zâu Yê-su songđ coong bux nănh stiz, “Yaz lănv seenz bux nyâuh, Yaz six nâyx đomc Pa-jiz yungh nyăngz singh jengh.” ⁸ Taih đangc yaz woax đomc yeetx stong cungb ayx stac nimc yungh, Zab yungh cungv. Six yungh max mungv nănh stiz.” ⁹ Yaz six singh jengh, Toix laiv tauh taih nzac yaz nâyx tungđ jengh six tuz Njâuv. yâuc tuz seetb ninyh nzac lauf lov nhlync.” ¹⁰ Stac munh taih cungb oix nimc oix tayx oix Mêtc, Yaz taih wâyc phunz bamh munh tuz săngh mengc, Yâuc oix phunz nănh stiz tuz mengc clakx-clunh.” ¹¹ Yaz six jămđ gongx Pa-jiz yungh nyăngz Zâu, Tex gongx Pa-jiz yungh woax tauh, Nănh nyunc sez nănh nyăngz Mengc wâyc tayv Pa-jiz yungh. ¹² Câux taih nyăngz congz munh max zâyf seenz jămđ Pa-jiz yungh nyăngz Zâu, Pa-jiz yungh yâuc max zâyf nănh nyăngz, Phătc njab clô taih zomf zeb, Pa-jiz yungh peob songđ tyuv đanv nzuf. ¹³ Tinyđ taih nyăngz congz munh lauf tyuv, Nănh max lif pa-jiz yungh. ¹⁴ Yaz six tex gongx Pa-jiz yungh nyăngz Zâu, Yaz pâyz tuz yaz nyăngz pa-jiz yungh, nzof pa-jiz yungh yâuc pâyz tuz yaz.” ¹⁵ Năngđ Pha pâyz yaz, Yaz yâuc pâyz Pha, Yaz yâuc wâyc nâyx đomc pa-jiz yungh sez stêtb yaz nyăngz mengc.” ¹⁶ Yaz zâyf cănh năngx naih pitc đomc Pa-jiz yungh, Six max zâyf yămz nâyx nomz gôh, Six yaz oix ninyh saox ênz yeenv nănh stiz lauf Nây, Nănh stiz songđ mungv yaz nyăngz stingb, Yâuc cloon Nâyx đomc pênx ah peob, Naih ah tauh Zâu tex nănh stiz.” ¹⁷ Nzangc Pha stăngz yaz, wâyc zuc yaz sez stêtb yaz nyăngz mengc tayc, wâyc năngx tuz yaz nyăngz mengc phunb đangz lauf. ¹⁸ Max naih laiv tauh zoz tuz yaz nyăngz mengc, Yaz pungx stymz stêtb yaz nyăngz Mengc, Yaz yâuc cănh naih gâyf zoz tuz yaz nyăngz Mengc phunb đangz lauf, Nâyx six nzangc Pha êu yaz ayx nyăngz cumh pâuz.” ¹⁹ Wâyc nâyx đomc woac, Yiu-tai munh năngx phunz đanv. ²⁰ Naih munh đungx coong, “Lâyc tauh munh blaz Manđ vutx, Cayx ninyh mungv Nănh nyăngz woac ayx lungđ nâyv? ²¹ Pitc tauh aox coong, “Naih toix laiv tauh blaz Manđ nyăngz munh bix hayh coib tuz Munh nyăngz mâyc Gwăngz năngđ lâyc tauh ya Munh? ²² Woax zanyf yămz Yê-lu-sa-lem Stengv quaix hâuđ tanv layf-laix pyau nyăngz stêtz, Six toix tongz quayx noib. ²³ Zâu Yê-su yăngh woa layf paix pyau cah synh Sa-Llô-môn Hungh nyăngz Mem glomx njiuh quaix ninyh quaix lauf woa zanyf. ²⁴ Yiu-tai Munh taih nzomc woa naic nănh coong, “Mâyh cayx ayx phunz buz Thăngx măkx tauv laiv zanyf? Six coong Stênx-stengb năngđ seenz zâyf Njâuv Zâu bix lănv ac buxbuz geh! ²⁵ Zâu Yê-su tauz, “Yaz bêc lănv bux nyâuh quaix nzof, Six nyâuh lauf max zeen yaz nef! Yaz tingz yaz nyăngz Pha nyăngz bux ayx Jix-caox njingc nyăngz dlayc, woax đomc dlayc stăngc yaz ayx zanyx manyf.” ²⁶ Six nyâuh max zeen, wâyc zuc nyâuh six max zâyf yaz nyăngz pa-jiz yungh. ²⁷ Yaz nyăngz Pa-jiz Yungh cănh mungv yaz nyăngz stingb, Yaz yâuc pâyz tuz nănh stiz, Nzof Nănh stiz yâuc lêpc yaz ninyh.” ²⁸ Yaz phunz nănh stiz naih stâyv quâyx nyăngz Mengc, Stâyv quâyx max zuc tayc, Nănh stiz yămz yaz nyăngz puf đi, Max naih laiv tauh hayh zab zoz tuz seetb ninyh.” ²⁹ Yaz nyăngz Pha zoz Nănh stiz jaoz phunz yaz, Pha yâuc năngx lub quaix muif hungđ. Nănh stiz yămz yaz nyăngz puf đi, Max naih laiv tauh hayh zab zoz tuz seetb ninyh.” ³⁰ Yaz cloon yaz nyăngz Pha six pênx ah tauh.” ³¹ Yiu-tai Munh lumz zoz njauz pyây oix ôx nănh.” ³² Zâu Yê-su songđ lănv bux nănh stiz, “Yaz âyz yaz nyăngz Pha paiđ yaz taih ayx gongx dlayc Phunz nyâuh phătc. Six toix lungđ gongx dlayc nhlef phunz nyâuh oix zoz njauz ôx yaz?” ³³ Nănh stiz tauz, “Buz max zâyf wâyc mâyh ayx toix lungđ jix coax njingf nyăngz dlayc bix oix zoz njauz ôx mâyh nef. Six wâyc mâyh pib Tênb-Hungh. mâyh six bamh Munh, Six mâyh cănh zanyb mâyh six ayx Tênb-Hungh.” ³⁴ Zâu Yê-su tauz, “nyâuh nyăngz Đoouc-lif gâyf naih ja coong nâyx zâux woac max zâyf mah? Yaz coong nyâuh six dlănh.” ³⁵ Six coong Canyx-Stâub hipđ nyunc stipx Tênb-Hungh nyăngz woac woax đomc Munh hipđ ayx dlănh, Canyx-Stâub nyăngz woac max hayh coi wănc.” ³⁶ Ha Nzangc Pha sên paiđ yaz nzac bamh canz taih woax tauh ya? Yaz coong yaz ayx Tênb-Hungh nyăngz toonz. nyâuh yâuc coong six yaz coong peo Tênb-Hungh?” ³⁷ Six coong yaz năngđ max âyz Pha nyăngz âyx ayx têx, Six max nongc zeen yaz.” ³⁸ Six coong yaz ayx laiv lungđ lauf năngđ Pha ayx, Max cunv nyâuh hănđ max zeen Yaz, Six nyâuh oix zuc zeen yaz ayx nyăngz dlayc. nyâuh songđ hayh pâyz tuz Pha yămz yaz cah njaf, nzof yaz yâuc yămz Pha cah njaf.” ³⁹ Woax đomc munh năngx oix zoz Zâu Yê-su, Six nănh tyuv tuz đutb nănh stiz nyăngz puf đi.” ⁴⁰ Nănh năngx phunb đangz lauf Jo-đen coiđ tongz phanx woax Lepb wăngx synh. six lôx noib Giăng Stăngc munh ayx quaix womz nyăngz gâyf woax nomz tync yămz woa ah dlapc.” ⁴¹ Naih munh đungx taih lov nănh, :Nănh stiz lănv coong, “Giăng max ayx quaix toix laiv lungđ Jix-caox njingc nyăngz dlayc. Six Giăng lănv toix laiv lungđ nuz tauv woax tauh munh six seenz toix.” ⁴² Yămz woa naih munh đungx zeen lêpc Yê-su.”