¹ Yaz Gia-cơ, ayx Tênb-Hungh nyăngz pâuz, yâuc ayx Njâuv Zâu Yê-su nyăngz pâuz, ja jeenx zuyz phunz săpc nyâyc stingx yămz đanv I-sa-la-ên munh nyăngz yâuf pez. ² Yaz stăngz nyăngz yâuf pez lex, nyâuh pongh zuc muif hungđ staiz nanc nyăngz dlayc, six zuc stunx pênx hônb hiđ. ³ Wâyc zuc nyâuh yâuf pez pâyz tuz nyâuh pongh woax đomc stâyv nyâuđ nyăngz dlayc, six stâyv mangc nyâuh yâuf pez nyăngz seenz stymz, phunz nyâuh naih noic tuz gongx. ⁴ Six zuc nongc noic tanyđ tuz tauv tauh, wâyc phunz nyâuh pênx clakx clunh nyăngz munh, max yêmv laiv hungđ. ⁵ Six coong nyâuh yâuf pez toix laiv lanh naih tongb manyh max caux, six zuc jođ Tênb-Hungh, Tênb-Hungh songđ hayh sađ phunz nyâuh, wâyc zuc nănh nyâuđ quăng nzongf, oix phunz songx munh max zuc nzêmh. ⁶ Jođ nyăngz munh six zuc nongc seenz stymz clo Zâu, max tuz nyâuđ plungh blănb, wâyc zuc nyâuđ đengh stob, six năngđ nzaox sâyb womz bomf gapb loongc. ⁷ Woax tauh munh max zâuđ năngx mungc tuz Zâu sađ laiv hungđ phunz nănh. ⁸ Wâyc zuc woax hungđ munh naih iz tyuh nyâuđ, hănđ ayx laiv hungđ lauf max tingc. ⁹ Woax đomc yâuf pez, zuc yămz haiđ nyăngz tync, tuz Tênb-Hungh pâuh staox njangb six zuc numđ nyađ. ¹⁰ Woax đomc puv quâyx munh zuc Tênb-Hungh phunz nănh stiz tuz ayx jeenz yămz haiđ, lauf zuc numđ nyađ, wâyc zuc puv quâyx munh six năngđ mađ phăngh nâyx zuc jac nzuf. ¹¹ Wâyc zuc bah noib seetb taih joomz paz songđ njengh nzuf, phăngh yâuc platb jac nzuf, puv quâyx munh ayx nyăngz congz lekc six năngđ mađ phăngh nâyx, ah manc jac platb nzuf. ¹² Laiv tauh pongh zuc stâyv nyâuđ nyăngz dlayc, yâuc tanyđ tuz tauv tauh, woax tauh songđ tuz oonz loc gôh, wâyc zuc tanyđ nzuf Tênb-Hungh sađ săngh mengc phunz, six zâyf Tênb-Hungh nyunc phunz stăngz nănh woax đomc munh nyăngz săngb mengc. ¹³ laiv lanh pongh zuc jaf nănh pamf stoif nyăngz dlayc, năngx gâyf yônx coong Tênb-Hungh max jaf nănh pamf stoif, wâyc zuc okx njangh nyăngz dlayc, max hayh jaf tuz zuc Tênb-Hungh, nzof Tênb-Hungh yâuc jaf laiv lanh pamf stoif. ¹⁴ Wâyc zuc woax đomc munh zuc jaf pamf stoif, six yămz nănh nyăngz nyâuđ cănh hox nănh ninyh pamf stoif. ¹⁵ Stymz nyâuđ cănh nyâyh ayx nyăngz stoif, six pây năngđ munh nzif naih stynb, stoif stengb stâyv lub taih songđ ayx phunz nănh zuc tayc. ¹⁶ Yaz stăngz nyăngz yâuf pez lex, năngx gâyf bây nyâuh zuc munh jaf. ¹⁷ Yeetx stong gongx yâuc clakx clunh nyăngz dlayc, six tăng woa Tênb-toongh sađ taox nzac taih, six zâyf zâyx gungh sangc muif hungđ gwăngz woax tauh sađ phunz pănh, nănh stâyv quâyx max hayh coi wănc, cayx năngđ toongz hayh nzămc. ¹⁸ Tênb-Hungh âyz nănh nyăngz zux ix ayx nongc seenz gâyf yungf pănh taih, wâyc phunz pănh yămz nănh zâyx taih nyăngz tax yeetx hungđ zunb. ¹⁹ Yaz stăngz yâuf pez lex, nyâuh muif tauh pâyz tuz six zuc coonx mungv, ah manc coong, yâuc năngx siv nhleenx căn. ²⁰ Wâyc zuc munh siv đunh cănh six max hayh ayx tuz hopđ Tênb-Hungh nyăngz laiv hungđ zux ix. ²¹ Wâyc năngđ nâyx, nyâuh yâuf pez songđ zuc quanyf muif hungđ cah lôh, cloon okx njangh nyăngz dlayc, six zuc nongc dlênc stymz nyâuđ mungv Tênb-Hungh songx ănz nyâuh nyăngz nyâuđ njaf woax đomc gâyf, seenz hayh njâuv tuz nyâuh nyăngz mengc hoonh woax hungđ gâyf. ²² Năngx gâyf jaf cănh stynb coong yaz numđ nzuf Đoouc lif gâyf songđ caux nzof, quaix đangz six zuc ayx âyz. ²³ Laiv lanh numđ nzuf Đoouc lif gâyf yâuc max ayx âyz, six năngđ munh nongc munh sây canyx syux nănh nyăngz mynb nâyx. ²⁴ Mangc nzuf, songđ lênh dlih nyâuđ cob nănh nyăngz hanyh jangx, six năngđ laix. ²⁵ Tênb-Hungh clakx clunh nyăngz Đoouc lif gâyf, hayh ayx phunz munh tuz pungx goib dluyh stymz, laiv lanh zah mangc pâyz nzuf Đoouc lif gâyf, yâuc muif dlih ayx âyz, woax tauh six tuz pôz gongx. ²⁶ Laiv lanh cănh stunx nănh zeen tuz gongx, yâuc max cun tuz nănh nyăngz nzeetx gongx, woax tauh six cungb cănh jaf nănh cungv, nănh zeen nyăngz jau six max săngh nongc. ²⁷ Âyz nzangc Pha Tênb-Hungh mangc, pănh zeen tuz hopđ six ayx đăngb zengh năngđ nâyx, phătc canh sây cloon au qua pongh zâuđ nanc, yâuc zuc jămđ, yâuc max nongc phunz bamh canz nyăngz jau taih hox nyâuh ninyh bah lotb jau.