¹ Đăngb zengh nyăngz yâuf pez lex, nyâuh pênx Tênb-Hungh sên taih nyăngz munh, six zuc nyâyh tauv Yê-su, âyz pănh nhlimc nyăngz jau ayx cumh pâuz, yâuc ayx stayb munh woax tauh. ² Yê-su naih stymz ayx paiđ nănh taih woax tauh nyăngz cumh pâuz, Năngđ Mô-sê naih stymz ayx Tênb-Hungh pyau munh nyăngz cumh pâuz. ³ Yê-su tuz munh zanyb năngx njangb têx Mô-sê, cayx năngđ ayx pyau stangc nyăngz munh, tuz munh zanyb năngx đungx têx woax sênz pyau. ⁴ Muif sênz pyau songđ naih munh zâyv, nzof muif hungđ six lauf zâyf Tênb-Hungh zâyx taih. ⁵ Mô-sê naih stymz stăngc ayx pâuz phunz Tênb-Hungh nyăngz pyau munh, wâyc ayx zanyx manyf coong Tênb-Hungh oix coong đangz phanx nyăngz dlayc. ⁶ Jix-tuz naih stymz năngđ Tênb-Hungh nyăngz pyau sây, pănh six nănh nyăngz pyau, six coong pănh năngđ pungx stymz zeen wăn pănh naih tync mungc oix tuz stipx nyăngz phănc, pănh songđ tuz pênx Tênb-Hungh nyăngz pyau munh. ⁷ Songđ năngđ singx-lingh coong, “six coong nyâuh nâyx noib numđ Tênb-Hungh bux nyăngz woac, max tuz ayx stymz nyâuđ nhlengc. ⁸ Max tuz ayx stymz nyâuđ nhlengc năngđ nyâuh nyăngz stongz zez tâuh yămz stâyz phangz blănf, stâyv Zâu woax zanyf. ⁹ Nyâuh nyăngz claof jex buz phătc yaz ayx nyăngz cumh pâuz stâyx săpc nyăngv cah njaf, six nănh stiz lauf năngx stâyv yaz yâuc yônx yaz. ¹⁰ Yaz numđ nhleenx woax nzêuh munh songđ coong, “nănh stiz nyăngz nyâuđ muif dlih max lêpc yaz, yâuc max pâyz tuz yaz nyăngz jau. ¹¹ Yaz numđ nhleenx songđ tôn coong, “nănh stiz stâyv quâyx six max nzac yaz nyunc phunz nyăngz hitb conv tync. ¹² Songx yâuf pez lex, nyâuh six zuc canyz nyâuđ buôngh, yămz nyâuh woa nongx gâyf bây laiv lanh naih okx stymz, max zeen naih săngh mengc nyăngz Zâu Tênb-Hungh. ¹³ Nyâuh muif noib six zuc lanh bux lanh, tinyh phanv năngx naih munh coong hipđ ayx nâyx noib nyăngz noib, wâyc max phunz laiv lanh zuc stoif jaf nănh nyâuđ nhlengc. ¹⁴ Six coong pănh năngđ zeen tuz wăn tauv tauh tauv mâyv, năngđ tăng coonz zeen woa nâyx têx, pănh songđ tuz cloon Njâuv Zâu songc phănc. ¹⁵ Canyx-stâub coong, “six coong nyâuh nâyx noib numđ Tênb-Hungh coong bux nyăngz woac, six max tuz ayx nyâuđ nhlengc năngđ nyâuh nyăngz claof buz ayx stymz nyâuđ nhlengc zengv Tênb-Hungh woax hâyđ nâyx. ¹⁶ Numđ Tênb-Hungh bux nyăngz woac bix năngx nyâuđ nhlengc woax đomc six mănv? Max zâyf Mô-sê ênz seetb I-yiêpv-tô stâyz phangz woax đomc munh mah? ¹⁷ Tênb-Hungh siv nhleenx stâyz săpc nyăngv woax đomc munh six mănv? Max zâyf pamf stoif bix zuc quanyf quătx stêtz yămz woa stâyz phangz blănc woax đomc munh?” ¹⁸ Tênb-Hungh nyunc woac coong, “nănh stiz stâyv quâyx max nzac yaz phunz nănh stiz sec hitb conv woax nomz six coong mănv? Six aox max mungv nănh woax đomc munh. ¹⁹ Pănh tuz phătc nănh stiz max tuz nzac Tênb-Hungh nyunc phunz nyăngz hitb conv tync, six wâyc nănh stiz max zeen.