¹ Wâyc zuc pănh naih zanyx manyf munh đungx năngđ vănx nâyx wâyh pănh, pănh songđ zuc quanyf ayx saih nyăngz jau, six hayh wâyb pănh woax đomc stoif, yâuc zuc nongc noic tanyđ, hungv tyuv ninyh năngx tauv pănh tingc taih nyăngz tync. ² tyuv ninyh six zuc mangc tingc Yê-su, wâyc Yê-su ayx coonz phunz pănh zeen, yâuc phunz pănh tuz clakx clunh, nănh zuc yămz săpc đăngc zax, tanyđ zâuđ tanyđ nyayz, six max nongc seen, wâyc tuz cah đangz phanx songđ tuz oonz loc, nâyx zanyf nănh songđ tuz stâyv Tênb-Hungh nyăngz byaoh phanx. ³ Nyâuh yâuf pez nyâyh mangc jađ, nănh zuc tayv stoif-munh, cloon nănh tinyh tămx woax đomc, năngđ naz nyâuh max nongc numđ stauh bix nămx nyâuđ. ⁴ Nyâuh yâuf pez cloon stoif panx zax, six nyâuh max zengx zuc seetb samđ stêtb mengc tayc wâyc stoif. ⁵ Nyâuh yâuf pez nyâuđ cob Zâu Tênb-Hungh bux nyâuh woax đomc woac nzof? Nănh bux coong, “sây lex, yaz bopc nzaox nyăngz săngx huđ six zuc mungv năngx gongx, yaz panx nzaox nyăngz dlih, yâuc năngx gâyf nyâuđ nămx. ⁶ Wâyc zuc six bopc nzaox nănh stăngz munh, nănh stiz laiv lanh ayx nănh nyăngz toonz ⁷ pănh zuc tanyđ zâuđ nanc, six wâyc pănh zuc bopc nzaox, Tênb-Hungh ayx phunz nyâuh yâuf pez, ayx năngđ nănh nyăngz sây, max naih laiv lanh sây bix max zuc nănh nyăngz pha panx nzaox quaix?” ⁸ Six coong nyâuh yâuf pez max nyunc zuc panx nzaox năngđ nănh nyăngz toonz, pănh six max zâyf seenz sây, cungb pênx sây haov. ⁹ Năngx naih ah hungđ, pănh nyăngz seenz pha panx nzaox pănh, pănh lauf zuc buc nănh stiz, pănh songđ lauf zuc mungv pănh nyăngz Tênb-toongh pha, panx nzaox phunz pănh tuz mengc săngh. ¹⁰ Pănh nyăngz seenz pha panx nzaox pănh ah dlapc thơih gian, âyz pănh mangc hopđ zuc nzaox nyăngz gâyf, six Tênb-Hungh panx nzaox, wâyc phunz pănh tuz gongx, yâuc phunz pănh tuz đaox dlăngc pănh nyăngz stoif. ¹¹ Pănh zuc panx nzaox woax zanyf, seenz numđ munz nzongf, six nzaox blătc quaix đangz, pănh hođ tuz pâyz, ayx tuz hođ songđ naih pengh oonz. ¹² Năngđ nâyx, nyâuh yâuf pez, songđ zuc zaub nyâuh max naih jab nyăngz puf staox, phunz nănh năngx yongb taih. ¹³ Six zuc coib nyâuh yâuf pez nyăngz jau năngx yeenh, phunz staux quac nyăngz munh hayh yăngh jau, phunz nănh max zuc glinyf, taux woa hayh tuz gongx. ¹⁴ Oix nongc nyâuh cloon songx munh hopđ stymz dlongh âyx yămz, nongc stymz nyâuđ ayx pênx đăngb zengh nyăngz munh, laiv lanh max dlăngc, six max hayh tuz phătc Zâu. ¹⁵ Six nyâuh yâuf pez seenz zuc buôngh stymz, nongx gâyf bây naih laiv lanh pungx đutb Tênb-Hungh nyăgz pôz, yâuc năngx gâyf bây laiv naih imz nzongf nyăngz mađ đungh bêux seetb taih, lou phunz munh huđ nzuf, yâuc lunc nzuf. ¹⁶ Yâuc năngx gâyf bây laiv lanh ayx pongz lauh nyăngz dlayc, mah six max zanyb Tênb-Hungh năngđ Ê-sau, nâyx cungb wâyc ah tonf năngv, maic nănh nyăngz toonz coonz, stungđ dlaih nyăngz gâyf. ¹⁷ Nyâuh yâuf pez lauf pâyz tuz, oix nongc nănh nyăngz pha pou woac phunz nănh woax tauh, six max tuz nănh nyăngz pha pou woac phunz, Ê-sau numđ nhleenx, seetb jab haoh lov tuz mâyc womz tuih, six lov max tuz pongh nănh nyăngz phănc. ¹⁸ Nyâuh yâuf pez max zâyf năngđ lôx noib I-sa-la-ên munh, ninyh lumz tuz tauv Si-nai zoongz, naih tâuf sac, yâuc naih tâuf sâuv mătb jaz nzămc mengh, yâuc naih nzaox. ¹⁹ Naih blungh blex stingb buib, yâuc numđ naih woac stingb coong, numđ woac nyăngz munh, nănh stiz seetb jab jođ coong, nongx gâyf năngx cloon nănh stiz coong woac gôh. ²⁰ wâyc zuc nănh stiz max jiuc mungv zăpx nănh stiz nyăngz woac, njynh stanyb hauc ninyh stătx zuc woax nomz zoongz, songđ zuc zoz njauz pyây ôx tayc. ²¹ Nănh stiz phătc nâyx đomc dlayc, seenz numđ cumh nzav nzongf, njynh cloon Mô-sê năngx coong, “yaz seenz cumh nzav tuz stynb synx nzuf. ²² Nyâuh yâuf pez ninyh, six ninyh Si-ôn zoongz, ninyh tauv yămz Tênb-toongh côkz nyăngz Yê-lu-sa-lem stengv, yâuc naih sax tynb sax panc lanh stynz-munh yămz woa. ²³ Nyâuh yâuf pez ninyh tauv Tênb-Hungh toonz coonz nyăngz huyđ toongh, six naih bux ja yămz woa tênb toongh, căpx dlonf hônb hiđ nyăngz tync, nyâuh ninyh tauv Tênb-Hungh stămđ nyeenh mănh nyăngz stoif quanz Hungh nyăngz tync, yâuc ninyh tuz tauv Tênb-Hungh nyăngz munh gongx munh mengc hoonh tuz clakx clunh yămz woax nomz tync. ²⁴ Nyâuh yâuf pez yâuc tuz ninyh tauv Yê-su woa, six njăpc săngb nyunc woac woax tauh mungh tongx munh woa, yâuc ninyh tauv stav wâyx nyăngz samđ woa, Yê-su nyăngz samđ coong nyăngz jau, six năngx gongx têx, A-bên nyăngz samđ. ²⁵ Six zuc stêu stymz buôngh, năngx gâyf aox max mungv coong woac woax tauh, six coong woax đomc max mungv bamh canz munh bux nyăngz woac, yâuc tyuv max đutb têx, six coong zâyf năngx max mungv yămz tênb toongh woax đomc munh bux nyăngz woac tymb, nănh njynh phav cangf tyuv max tuz đutb. ²⁶ Woax zanyf, nănh nyăngz stingb đănz tuz nib tongf nzuf, six nâyx zanyf, nănh năngx nyunc coong, “năngx naih ah hâyđ yaz max zâyf cungb ayx phunz nib tongf cungv, njynh năngx đănz tuz tongf tauv gungh stymz. ²⁷ Coong năngx naih ah hâyđ woax zâux woac nyăngz âyz gâyf six năngđ nâyx, laiv hungđ zâyx taih hayh đănz tongf, six zuc mêtc nzuf, laiv hungđ max hayh đănz tongf, nzăngđ tuz stâyv quâyx yămz. ²⁸ Năngđ naz pănh six zuc hâuđ Zâu Tênb-Hungh, wâyc zuc pănh tuz ah nomz max hayh đănz tongf nyăngz côkz, pănh six tanv hâuđ Tênb-Hungh nyăngz pôz, cumh nzav nănh yâuc ayx hopđ nănh nyăngz nyâuđ. ²⁹ Wâyc zuc pănh nyăngz Zâu Tênb-Hungh, six ah lâuh yongb nzongf nyăngz tâuf, hayh pu tuz sac muif hungđ.”