¹ Đoouc lif gâyf max zâyf đangz noib oix seetb taih gongx dlayc nyăngz zez, Đoouc lif gâyf six cungb ayx đangz phanx oix hynđ seetb taih nyăngz hanyh jangx, cloon woax đomc bah cloiz, wâyc zuc năngđ naz, munh nzăngđ zuc muif nyăngv muif dlih, nzâyz tax hungđ stanyb lanyh ninyh congx, six woax đomc stanyb lanyh max hayh ayx tuz phunz taih lov Tênb-Hungh woax đomc munh tuz clakx clunh. ² Six Coong Đôuc lif gâyf năngđ hayh stav tuz nănh stiz nyăngz stoif dlăngc têx, nănh stiz max numđ stiz nyăngz nyâuđ naih stoif têx, nănh stiz songđ max năngx zuc nzâyz tax hungđ ninyh congx phunz Tênb-Hungh nongc stav stoif nzof gôh.” ³ Munh congx woax đomc stanyb lanyh, six cungb ayx phunz nănh stiz muif nyăngv săngx tauv nănh nyăngz stoif. ⁴ Wâyc zuc ngoongh wăngh câu, cloon yungh congz samđ, max hayh stav tuz nănh stiz nyăngz stoif đangđ. ⁵ Wâyc năngđ nâyx, Njâuv Zâu nzac bamh canz taih woax zanyf, Nănh coong bux Tênb-Hungh, “Zâu mâyh max zâyf oix nongc munh zoz stanyb lanyh congx, mah six pungx hođ sâuđ nyâyc, six mâyh bênc săngh phunz yaz ah nomz stynb.” ⁶ Zâu mâyh max zâyf oix nongc pu săngh tauh tax hungđ stanyb lanyh congx mâyh nongc stav stoif nzăngđ numđ quaix stymz. ⁷ Six nâyx zanyf nănh songđ coong, “Tênb-Hungh lex, nâyx zanyf yaz taih tauv nâyx, yaz taih ayx âyz mâyh nyăngz zux ix, songđ năngđ woax zây Đoouc lif gâyf stâub ja lănv tauv yaz nâyx. ⁸ Naih ah hâyđ Zâu coong, “munh nongc stanyb lanyh nzâyz ninyh pu congx nongc stav stoif, mâyh yâuc max numđ nyađ, wâyc zuc woax đomc six âyz Đoouc lif gâyf pungx hođ nyăngz gâyf. ⁹ Quaix đangz nănh năngx coong, “Tênb-Hungh lex, yaz taih yămz nâyx ayx âyz mâyh nyăngz zux ix, Tênb-Hungh songđ phunz woax đomc lôx nyăngz zux ix quaix nzuf, nănh songđ nongc Njâuv Zâu njăpf săngb nyăngz staox taih.” ¹⁰ Wâyc zuc Njâuv Zâu Yê-su ayx âyz Tênb-Hungh nyăngz zux ix, cănh nongc nănh nyăngz stynb ayx stanyb lanyh nongc congx stav wâyx ah hâyđ đokc, songđ stav tuz dlăngc stâyv quâyx. ¹¹ Muif tauh stayb munh muif noib ayx nănh stiz nyăngz cumh pâuz, nzâyz woax đomc tax hungđ stanyb lanyh ninyh congx nongc stav stoif, six max hayh stav tuz stoif dlăngc. ¹² Six Njâuv Zâu nyunc sez tuz nănh nyăngz mengc tayc nongc ayx stanyb lanyh wâyc stav stoif, ah hâyđ caux nzuf, blătc woa quaix đangz nănh songđ muf stâyv Tênb-Hungh nyăngz byaoh phanx. ¹³ Blătc woa taih, Nănh songđ zu yônz zaz nzac nănh nyăngz staux đi ninyh nongc ayx staux tungh tapc tync. ¹⁴ wâyc zuc Zâu cănh nongc nănh ayx stanyb lanyh congx ah hâyđ phunz Tênb-Hungh, phunz woax đomc munh nyăngz stoif songđ dlăngc stâyv quâyx clakx clunh. ¹⁵ Woax zanyf Singx lingh songđ stăngc ayx zanyx manyf coong nâyx đomc dlayc. Nănh coong woax zanyf, ¹⁶ Zâu coong tauv săngx huđ, yaz oix cloon nănh stiz njăpc nyunc woac, yaz oix zoz yaz nyăngz gâyf tăpx ănz nănh stiz nyăngz nyâuđ njaf, yâuc ja ănz nănh stiz nyăngz stymz tauh. ¹⁷ Blătc quaix đangz nănh năngx coong, “blătc nây ninyh yaz max năngx săngx tauv nănh stiz nyăngz stoif, cloon nănh stiz ayx huđ nyăngz dlayc. ¹⁸ Năngđ naz toix laiv đomc tuz quanyf stoif nzuf, songđ max năngx zuc nongc stanyb lanyh congx stav stoif ¹⁹ Songx yâuf pez lex, wâyc zuc pănh couv Yê-su nyăngz samđ, songđ tuz pungx stymz nzac tauv đăngb zengh woax hoongv. ²⁰ wâyc zuc Yê-su coib săngb mengc nyăngz jau phunz pănh yăngh ninyh clăngv tuz blătc woax lepz pongz jengh buyx, âyz gâyf six clăngv quaix nănh nyăngz stynz stayđ. ²¹ Pănh yâuc năngx naih ah lanh stayb munh lub nzongf cun Tênb-Hungh nyăngz pyau munh. ²² Pănh six zuc nongc naih stymz nyăngz nyâuđ zeen wăn, pănh nyăngz stymz nyâuđ tuz đaox dlayc đăngb zengh taih max naih tync nzêmh, pănh nyăngz stynb yâuc tuz đăngb zengh nyăngz womz đaox dlăngc nzof, pănh six zuc yămz năngx stătx Tênb-Hungh. ²³ Pănh six zuc zeen năngx wăn nhlimc pănh mungc oix tuz stipx nyăngz phănc, wâyc zuc nyunc woac phunz pănh woax tauh, six pănh couv tuz wăn woax tauh. ²⁴ Pănh nyâyh mangc jađ, ayx năngđ laix hayh lanh stăngz lanh, ayx gongx nyăngz dlayc. ²⁵ Six zuc vaic căpx dlonf ayx gâyf paix, nongx gâyf quanyf săngx huđ max căpx dlonf lanh bux lanh, ayx năngđ woax đomc munh njynh leox max căpx dlonf quyênx. Nyâuh lauf pâyz tuz Zâu stămđ stoif nyăngz noib taih tauv stătx. ²⁶ Six coong pănh pâyz tuz seenz gâyf, bix zâyf muif dlih năngx aox nhlengc ninyh ayx pamf stoif, six max hayh naih laiv hungđ stanyh lanyh hayh stav tuz nănh nyăngz stoif dlăngc nzof gôh. ²⁷ Cungb zuc cumh nzav hongđ nzongf woax lâuh tâuf, zu nongc pu Tênb-Hungh nyăngz yônz zaz woax hungđ tâuf. ²⁸ Laiv lanh ayx pamf Mô-sê nyăngz gâyf, yâuc năngx naih iz pôz lanh ayx zanyx manyf têx, woax tauh zuc tayx tayc yâuc max năngx naih mănv hâuđ lênh tauv nănh. ²⁹ Nyâuh yâuf pez nyâyh mangc jađ, laiv lanh ayx peo Tênb-Hungh nyăngz toonz, songđ mangc stam njăpc nyunc woac nyăngz samđ, six hayh đaox tuz nănh nyăngz stoif đăngb zengh woax hungđ samđ, nănh yâuc coong pib sađ pôz nyăngz singx lingh, nănh max zâyf jic tuz zuc tingc stoif năngx niđ têx mah?” ³⁰ Pănh zuc pâyz tuz nănh coong nâyx zâux woac woax tauh nănh coong, “clao yônz six yămz yaz cănh clao, “nănh năngx coong, “Zâu yâuc oix stămđ nănh nyăngz pec stingx. “ ³¹ Năngđ tuih zuc nzac săngh mengc nyăngz Zâu Tênb-Hungh nyăngz puf đi têx, seenz cumh nzav nzongf nyăngz dlayc. ³² Six zuc săngx tauv lôx noib, nyâuh yâuf pez pongh zuc woax đomc zâuđ nanc, nyâuh tuz Tênb-Hungh nyăngz gwăngz-eng syux nyâuh, nyâuh yâuc naih noic tanyđ tuz hingh. ³³ Naih lauh zanyf, nyâuh hayh pongh zuc munh coong zokb, ayx peo, nyâuh yâuc cloon nănh stiz tinyh stăngc tanyđ. ³⁴ Nyâuh lauf năngx naih stymz nyâuđ hâuđ lênh tauv zuc yămz nzauh nyăngz munh, nyâuh zuc munh zab zoz tax hungđ nzuf max numđ staoh, wâyc zuc nyâuh pâyz tuz, nyâuh năngx naih ah hungđ năngx gongx têx. Yâuc stâyv quâyx yămz.” ³⁵ Năngđ naz nyâuh yâuf pez songđ zuc pungx stymz nyâuđ zeen, năngx gâyf quanyf nyâuh cayx tuz stipx nyăngz sâuđ nyâyc. ³⁶ Nyâuh yâuf pez songđ zuc nongc noic tanyđ, ayx âyz Tênb-hungh nyăngz âyx, songđ tuz stipx Tênb-Hungh nyunc phunz nyăngz phănc.” ³⁷ Max naih lauh, oix taih woax tauh nănh seenz taih, nănh max ngaih lauh đêh. ³⁸ Laiv lanh cloon yaz hopđ nyâuđ, woax tauh yâuc wâyc zeen yaz tuz mengc săngh, six laiv lanh toiv phunb đangz, yaz songđ max numđ nyađ woax tauh gôh.” ³⁹ Six pănh max zâyf ayx toiv phunb đangz bix zuc mêtc nyăngz munh đêh, pănh six ayx zeen Tênb-Hungh, yâuc ayx tuz Njâuv nyăngz munh lêc đêh.”