¹ Cah lof Tênb-Hungh nongc nănh nyăngz songx tâuc woac munh, yâuc nongc nănh nyăngz zux ix cloon pănh nyăngz stongz zez tâuh coong đungx hâyđ. ² Six yămz stătx nây stêtb mâyv nyăngz noib, Tênb-Hungh nongc nănh nyăngz toonz cloon pănh coong, "nâyx tauh toonz Tênb-Hungh nongc nănh zâyx muif hungđ, yâuc phunz nănh stipx muif hungđ pênx nănh nyăngz jax toongx. ³ Nănh cănh âyz nzuf Tênb-Hungh nyăngz gwăngz-eng, yâuc năngđ nzuf Tênb-Hungh nyăngz hanyh jangx, nănh năngx nongc naih lanyf nyăngz woac pâuh muif hungđ, nănh tâyv bamh munh đaox tuz stoif dlăngc, nănh năngx muf stâyv Tênb-Hungh nyăngz byaoh phanx. ⁴ Nâyx tauh toonz tuz ayx năngx lub têx Stynz-munh, Tênb-Hungh oonz phunz nănh woax nomz bux yâuc năngx saix têx Stynz-munh nyăngz bux. ⁵ Wâyc zuc Tênb-Hungh max naih laiv zanyf coong ănz laiv tauh Stynz-munh, mâyh ayx yaz nyăngz toonz, nâyx noib yaz ayx mâyh nyăngz pha,” yâuc max nuz quaix laiv tauh Stynz-munh coong, “yaz six mâyh nyăngz pha, mâyh six yaz nyăngz toonz. ⁶ Tênb-Hungh oix paiđ nănh nyăngz toonz coonz nzac bamh canz taih woax zanyf, nănh coong, “Tênb-Hungh nyăngz songx Stynz-munh six zuc paix mâyh. ⁷ Coong tauv Stynz-munh woax zanyf, Tênb-Hungh coong, “Tênb-Hungh oix phunz nănh nyăngz Stynz-munh pênx nzaox, yâuc phunz nănh stiz pênx tâuf byeetc. ⁸ Coong tauv nănh nyăngz toonz woax zanyf, Tênb-Hungh coong, “Tênb-Hungh nyăngz tync six stâyv quâyx yămz tauv banc stôix, mâyh yâuc zuc nongc pengh stymz cun mâyh nyăngz côkz. ⁹ Zâu stăngz pengh stymz nyăngz jau, yâuc hănđ ayx huđ nyăngz jau, Nănh coong Tênb-Hungh six mâyh nyăngz Tênb-Hungh, nongc oonz munh nyăngz nyâuđ năngđ yâuh hâuh ănz phunz munh numđ nyađ, mâyh yâuc ayx năngx lub quaix mâyh nyăngz toic.” ¹⁰ Tênb-Hungh yâuc coong, “Zâu lex, tăng coonz mâyh zâyx seetb nib mync nyăngz coonz tay taih, yâuc nongc Zâu nyăngz puf zâyx seetb muif tab gungh. ¹¹ Gungh nib songđ zuc mêtc, six mâyh stâyv quâyx yămz, gungh nib hayh lôx năngđ gwuyz quav hayh quaiz. ¹² Zâu coong nănh six zoz gungh nib taih glonc năngđ munh glonc gwuyz lub, yâuc wănc gungh nib năngđ munh wănc gwuyz quav, six mâyh stâyv quâyx yămz, mâyh nyăngz noib lav nyăngv stâyv quâyx max hayh zomc.” ¹³ Tênb-Hungh yâuc max zengx naih laiv zanyf, bux quaix laiv tauh Stynz-munh coong, “mâyh stâyv yaz nyăngz byaoh phanx, zu yaz zoz yônz zaz ănz nzac mâyh nyăngz staux đi ninyh nongc ayx mâyh nyăngz staux tungh tapc tync. ¹⁴ Stynz-munh six cungb naih hoonh, nongc bokc dlic Tênb-Hungh, Tênb-Hungh yâuc paiđ nănh stiz ninyh stăngc woax đomc tuz Njâuv nyăngz munh.