¹ Songx yâuf-pez lex! six coong pongh zuc laiv tauh ayx longđ laiv hungđ Stoif. nyâuh âyz Singx-lingh ayx nyăngz Munh six zuc nongc dlênc nyâuđ ênz nănh phunb đangz lauf ayx hopđ. Six nyâuh năngđ cayb buôngh pănh cănh zuc jaf ayx sai. ² Laiv lanh naih toix laiv hungđ dlayc six zuc tinyh stăngc đamz. Năngđ ha ayx songđ toix Jix-tuz nyăngz lanyf. ³ Laiv lanh max tongh yangc nyăngz Munh, nănh ayx năngđ nongc seen nyăngz Munh. woax tauh six cănh zuc jaf. ⁴ Coz munh six zuc cănh zah pănh ayx nyăngz dlayc, ayx tuz gongx nănh songđ hayh numđ nyađ max zuc nzâyz ninyh pây pitc tauh ayx nyăngz dlayc. ⁵ Coz munh cănh zuc đamz toongz mănv ayx nyăngz dlayc. ⁶ Laiv lanh tuz Munh nzaox Tênb-Hungh nyăngz woac bây, six zuc tanb pănh naih nyăngz tax hungđ cloon nănh nongc. ⁷ Nongx Gâyf zuc jaf, max naih laiv lanh hayh jaf tuz zuc Tênb-Hungh. Munh songx laiv hungđ songx sâub tuz woax hungđ. ⁸ Six coong Munh âyz Stoif-Munh nyăngz nyâuđ oix ayx nyăngz dlayc six năngđ Munh songx nhlimb nzac nib nâyx. sâub taih six hoiđ nănh. Six coong Munh âyz Singx-lingh songx nyăngz nhlimb, Singx-lingh six phunz nănh sâub taih tuz stâyv quâyx nyăngz Mengc. ⁹ Nongx gâyf nyâuđ nămx ayx gongx dlayc. six coong pănh pungx đutb têx, tauv săngx huđ pănh six tuz sâub Stâyv quâyx nyăngz Mengc. ¹⁰ Laiv zanyf naih congv Stăngc Munh bix nyămh dlongh ayx. nongc seen quaix six zuc jămđ zeen Yê-su nyăngz pyau Munh. ¹¹ Nyâuh nyâyh mangc jađ! Yaz cănh nongc puf ja nâyx zây jeenx lub phunz nyâuh yâuf-pez. ¹² Tâuh oix tuz Mynb mâyc woax đomc Munh oix yac nyâuh yâuf-pez ayx ( quaix catz nyăngz Gâyf.) năngđ nâyx ayx wâyc phunz Yiu-tai Munh zâpv nyânc, nănh stiz woangb âyz săpc đăngc zax nyăngz Munh phătc nănh stiz stanc. ¹³ Seenz ayx woax đomc ayx quaix catz nyăngz Gâyf woax đomc Munh nănh stiz lenf lôx max ayx âyz Đoouc-lif Gâyf, six Nănh stiz cungb oix nongc nyâuh yâuf-pez woax hungđ Gâyf phunz nănh stiz Naih lyv do nzeetx blangc tanv nyâuh cungh ngwoaic. ¹⁴ Seetb blătc Njâuv Zâu nyăngz săpc đăngc zax, Yaz max nzeetx blangc laiv hungđ, mangc taih yaz lauf năngđ tayc yămz săpc đăngc zax, six wâyc săpc đăngc zax bamh canz songđ zuc tayc, six pây cloon bamh canz Yaz lauf năngđ zuc tayc. ¹⁵ Quaix catz nyăngz gâyf cloon max quaix catz nyăngz gâyf six quan zongf, nongc seen quaix six Tênb-Hungh njăpf taih nyăngz săngb Mengc. ¹⁶ Jođ Tênb-Hungh Sađ pengh oonz cloon Stăngz Munh nyăngz jau phunz cloon âyz Tênb-Hungh nyăngz Gâyf woax đomc pec stingx I-sa-la-ên Munh. ¹⁷ Blătc nây laiv lanh nongx Gâyf zeenv yaz gôh, wâyc zuc yaz nyăngz stynb naih ah nomz paz, wâyc ayx zanyx Manyf yaz ayx Njâuv Zâu Yê-su nyăngz cumh pâuz. ¹⁸ Songx yâuf-pez lex! Jođ Njâuv Zâu Yê-su Sađ pôz phunz nyâuh yâuf-pez ô stayx. ( A-Men.)