¹ Yaz Phao-lô, âyz Zâu Tênb-Hungh nyăngz âyx ayx Njâuv Zâu Yê-su nyăngz cumh pâuz. Cloon pănh nyăngz yâuf-pez Ti-mô-thê. ² Ja jeenx zuyz phunz nyâuh yâuf-pez zeen Njâuv Zâu nyăngz Munh yămz Cô-lô-si stengv. Jođ Pănh nyăngz Nzangc Pha Zâu Tênb-Hungh sađ Pôz sađ pengh oonz phunz cloon Nyâuh yâuf-pez ô stayx yămz. ³ Yaz laiv zanyf Clo-Zâu stăngc nyâuh Yâuf-pez, Yaz yâuc muif dlih hâuđ Pănh nyăngz Nzangc Pha Njâuv Zâu Tênb-Hungh cloon Zâu Yê-su. ⁴ Wâyc zuc buz numđ Munh lănv Coong nyâuh yâuf-pez naih seenz stymz zeen Njâuv Zâu Yê-su. Yâuf stăngz Nzangc Pha Zâu Tênb-Hungh nyăngz pec stingx. ⁵ Cuđ jeenx nyăngz Seenz gâyf tauv nyâuh yâuf-pez woa woax zanyf, nyâuh numđ lănv coong Cuđ jeenx naih tync Mungc nyăngz tync six yămz woa Tênb-toongh, wâyc năngđ naz nyâuh songđ zeen gongx yâuc Stăngz Munh. ⁶ Nây cuđ jeenx naih Munh đungx zeen hongđ phutx pong nây Gungh đi muif đoif. Nây Cuđ jeenx nyăngz Pôz naih jab lub. Nyâuh numđ cuđ jeenx woax Noib. yâuf pâyz tuz Tênb-Hungh cuđ jeenx nyăngz seenz gâyf six saix năngđ laix. ⁷ Nyâuh tuz hođ pâyz Tênb-Hungh nyăngz Pôz six Tăng Ê-pa-Pha, hođ taih. Ê-pa-pha, six pănh Stăngz nzongf nyăngz yâuf cloon Yaz songc congz ayx nyăngz Munh. wâyc naih stymz Stăngc Yaz ayx Njâuv Zâu nyăngz cumh pâuz. ⁸ Nănh Lănv bux buz coong, “Singx-lingh seenz phunz nyâuh yâuf-pez naih tinyh Stăngz. ⁹ Wâyc năngđ nâyx, tăng yaz numđ lănv nyâuh yâuf-pez nyăngz jau woax Noib. Yaz njynh leox Clo-Zâu wâyc Stăngc nyâuh jođ Tênb-Hungh phunz nyâuh yâuf-pez naih tăng singx-lingh taih nyăngz tongb-Manyh. Cloon sting jaođ hayh pâyz tuz nzuf Tênb-Hungh nyăngz zux ix. ¹⁰ Phunz nyâuh yâuf-pez yămz nây stâyv sangc hayh ayx tuz muif hungđ gongx dlayc hopđ Zâu nyăngz nyâuđ. Phunz nyâuh hayh pâyz tuz Tênb-Hungh nyăngz Pôz muif hungđ nyăngz dlayc gongx nzuf yâuc Gwăngz-eng. ¹¹ Jođ Tênb-Hungh nongc Nănh Gwăngz-eng nyăngz lanyf phunz nyâuh yămz muif hungđ dlayc yongb taih. Nyâuh songđ naih noic tanyđ tuz muif hungđ Zâuđ nanc nyăngz dlayc songđ hônb-hiđ. ¹² Nyâuh yâuf-pez six numđ nyađ hâuđ Nzangc Pha. Wâyc zuc nănh phunz nyâuh payh tuz ayx nănh Đăngb zengh nyăngz Munh, Nănh bênc phunz nyâuh nyăngz phănc yămz woa Gwăngz-eng nyăngz Côkz. ¹³ Tênb-Hungh Njâuv pănh gâyh đutb nzămc nyăngz jab, ênz pănh nzac nănh toonz Stăngz nyăngz Côkz. ¹⁴ Nănh nyăngz Toonz suc pănh phunb đangz lauf, six quanyf tuz pănh nyăngz Stoif zaix. ¹⁵ Max zengx naih mănv phătc Quaix Tênb-Hungh. Njâuv Zâu Yê-su six Tênb-Hungh nyăngz hanyh jangx. Njâuv Zâu Yê-su yâuf ayx năngx lub quaix zâyx taih nyăngz muif hungđ. ¹⁶ Muif hungđ zâyx taih quaix Nănh nyăngz lanyf, yămz Gungh yămz Nib, Mangc tuz phătc cloon mangc max phătc nyăngz muif hungđ, Cloon yămz đamx Gungh naih lanyf ayx Hungh nyăngz Zâu. Tuz zâyx taih quaix Njâuv Zâu. yâuf Wâyc Njâuv Zâu nyăngz puf tauh zâyx taih. ¹⁷ Nănh naih năngx đangc quaix muif hungđ. Muif hungđ yâuf păngc nănh yămz. ¹⁸ Nănh six ayx stynb nyăngz pyây, Huyđ-toongh six ayx stynb, muif hungđ tăng nănh seetb taih. Nănh six ayx tah yeetx lanh tayc Ninyh bix năngx săngh phunb Stengb nyăngz Munh. năngđ ha nănh songđ hayh ayx muif hungđ nyăngz pyây. ¹⁹ Tênb-Hungh songđ numf nyađ yămz nănh cah njaf. ²⁰ Tênb-Hungh songđ phunz Njâuv Zâu nzâyz muif hungđ taih cloon nănh hopđ nyâuđ. Max cun yămz gungh six yămz nib. Nănh nongc nănh nyăngz toonz tayc yămz săpc đăngc zax njâuc nănh nyăngz samđ seetb taih phunz muif hungđ cloon Nănh naih pengh oonz. ²¹ Đangc dlih nyâuh yâuf-pez nyâyh cloon ayx nyăngz huđ dlayc nzez nyâuh gâyh Zâu Tênb-Hungh côz. Yâuf cloon nănh săngh yônz zaz. ²² Six nâyx zanyf Tênb-Hungh phunz nyâuh yâuf-pez cloon nănh hopđ nyâuđ. Wâyc zuc Njâuv Zâu nyăngz stynb A zuc Tayc ênz nyâuh yâuf-pez đăngb zengh nyăngz Munh ninyh yămz Zâu Tênb-Hungh Đăngb zengh nyăngz tync. Phunz nyâuh yâuf-pez max naih wâyx, max naih tync nzêmh. Max zuc tingc stoif. ²³ Six coong nyâuh yâuf-pez năngđ naih seenz stymz zeen gongx nyâuh lêpc nyăngz Gâyf, njăpf wăn coonz tay. Six tuz (sangđ) muif hungđ. Nyâuh max tuz Quanyf nyâuh tuz numđ nyăngz Cuđ jeenx. nây cuđ jeenx songđ nzônh phunz Gungh đi Munh muif đoif tuz numđ. Yaz Phao-lô yâuc ayx Cuđ jeenx nyăngz cumh pâuz Munh. ²⁴ Yaz tuz numf nyađ zuc dlauc huđ wâyc nyâuh yâuf-pez. Năngđ Njâuv Zâu zuc dlauc huđ wâyc nănh nyăngz stynb. Six Huyđ-toongh. Yaz tuz phănc pong nyâuđ dlauc huđ wâyc yaz nyăngz stynb. ²⁵ Tênb-Hungh paiđ phunz Yaz ayx Huyđ-toongh cumh pâuz. Phunz Yaz naih nâyx hungđ cumh pâuz ayx wâyc stăngc nyâuh yâuf-pez. Yaz ayx nyăngz cumh pâuz six zuc lănv Tênb-Hungh nyăngz gâyf tongb zu sâuz. ²⁶ Nâyx đomc Gâyf six tăng cah loc banc stâyv banc đaic Tênb-Hungh pinyx max phunz plongx yangh nyăngz dlayc. six nâyx zanyf plongx yangh taih phunz nănh nyăngz đăngb zengh pec stingx pâyz. ²⁷ Zâu Tênb-Hungh nyăngz zux ix six oix phunz Nănh nyăngz đăngb zengh pec stingx pâyz tuz Nănh pinyx vâyv puv quâyx nzongf nyăngz Gwăngz-eng max zengx plongx yangh nyăngz dlayc. nâyx đomc max zengx plongx yangh nyăngz dlayc six Njâuv Zâu yămz nyâuh yâuf-pez cah njaf, phunz nyâuh naih tync mungc, yâuf tuz Gwăngz-eng nyăngz phănc. ²⁸ Yaz lănv Njâuv Zâu nyăngz gâyf phunz Munh mungv. Yaz nongc muif hungđ tongb-manyh quynb Munh nzaox Munh phunz pênx munh lub. Wâyc phunz muif tauh Munh ninyh tauv Tênb-Hungh nyăngz Đăngb zengh tync. Clakx-clunh nzuf yămz Njâuv Zâu. ²⁹ Wâyc nây yaz nongc Zâu Tênb-Hungh phunz Yaz nyăngz lanyf ayx congz Zâuđ. Nâyx zanyf yămz Yaz nyăngz nyâuđ nongc nyăngz jab.