¹ Yaz Huyđ toongh nyăngz munh côx, ja jeenx phunz yaz seenz numđ stăngz nyăngz Gai-utv. yaz seenz stăngz mâyh. ² Yaz stăngz nyăngz pyeoz toic lex, yaz clo Zâu pou phunz mâyh ayx muif hungđ, mengc hoonh tuz yămz gongx, stynb a yâuc tuz yămz zoongx. ³ Yaz numđ nyađ, naih ah đomc yâuf pez taih ayx zanyx manyf lănv bux yaz, "mâyh laiv zanyf, yâuc naih stymz lêpc seenz gâyf, ayx âyz seenz gâyf. ⁴ Max naih laiv hungđ hayh ayx phunz yaz năngx numđ nyađ têx nây gôh. yaz numđ munh lănv coong, "yaz nyăngz sây muif dlih zeen gongx seenz gâyf. ⁵ Yaz stăngz nyăngz pyeoz toic lex, mâyh seenz stăngc tuz zeen Yê-su nyăngz yâuf pez gongx nzongf. hănđ six max phătc quaix nyăngz munh, mâyh yâuc nongc nyâuđ stăngc nănh stiz. ⁶ Nănh stiz yămz nâyx nomz huyđ toongh ayx zanyx manyf lănv coong, "mâyh tăng laiv stăngz nănh stiz, jođ mâyh stăngc nănh stiz năngx hayh seetb jau payh tuz Tênb-Hungh paiđ ninyh nyăngz munh. ⁷ Stiz wâyc Njâuv Zâu nyăngz manyh yangh seetb ninyh, yâuc max zâuđ nongc max zeen nyăngz munh stăngc nănh stiz toix laiv hungđ. ⁸ Wâyc năngđ nâyx, pănh songđ zuc stăngc nâyx hungđ ya munh, pănh tuz songđ tuz cloon stiz ayx seenz gâyf cumh pâuz. ⁹ Yaz tuz ja jeenx bux quaix huyđ toongh, six Đi-ô-tê-phêtv, nzenggz ayx lub max oix mungv yaz bux nyăngz woac. ¹⁰ Six coong yaz năngđ ninyh tauv nyâuh woa, yaz six ngwâyz lănv nzuf nănh nyăngz coonz tay. nănh cungb coong woac zokb, coong woac huđ, yâuc taux cah đangz lănv pyb yaz nyăngz manyh yangh. buc nâyf lauf max zengx quaix nănh stymz, nănh yâuc max oix stipx quaix jau nyăngz munh. yâuc cangđ max phunz stipx, năngx luiđ munh nănh stiz nănh nyăngz seetb huyđ toongh. ¹¹ Stăngz nyăngz pyeoz toic lex, năngx gâyf âyz huđ nyăngz dlayc. six zuc âyz gongx nyăngz dlayc. woax tauh six Tênb-Hungh nyăngz munh, laiv lanh ayx huđ dlayc, woax tauh six max tuz phătc Tênb-Hungh. ¹² Songx munh tanv Đa-mêt-jiu ayx tuz gongx. mâyh songđ pâyz tuz pănh coong nyăngz woac six seenz nyăngz. ¹³ Yaz năngx naih đungx hungđ oix lănv bux nyâuh, six yaz max oix nongc pătx nongc mac ja. ¹⁴ Yaz nyâyh taih max naih lauh, yaz năngx tuz cloon nyâuh toix mynb coong woac. ¹⁵ Jođ Zâu phunz nyâuh naih pengh oonz. yămz nây songx yâuf pez yâuc đamf tauv nyâuh. jođ mâyh stăngc bux yămz nây yeetx stong nyăngz yâuc-pez, yaz songđ lauf săngx tauv nănh stiz tinyh đoih.