¹ Yaz Phao-ô, Sin-la, Cloon Ti-mô-thê, ja jeenx zuyz phunz yămz Tê-sa-lô-ni-ca stengv Njâuv Zâu Yê-su pănh nyăngz Nzangc Pha Zâu Tênb-Hungh nyăngz huyđ toongh Munh. Jođ Zâu sađ pôz sađ pengh oonz phunz nyâuh yâuf-pez ô stayx. ² Yaz muif dlih wâyc nyâuh yâuf pez jođ Zâu Tênb-Hungh. Yaz laiv zanyf Couv-Zâu yâuc đamv tauv nyâuh yâuf pez ô stayx. ³ Buz muif dlih yămz Nzangc Pha Zâu Tênb-Hungh nyăngz cah đangc săngx tauv nyâuh yâuf pez ô stayx wâyc zeen Njâuv Zâu Yê-su ayx nyăngz cumh pâuz, nyâuh wâyc stăngz nănh songđ naih seenz stymz ayx congz zâuđ, muif dlih zeen tingc pănh nyăngz Njâuv Zâu Yê-su naih tync mungc. ⁴ Songx yâuf pez lex! Buz pâyz tuz Zâu Tênb-Hungh stăngz nyâuh yâuf pez, songđ sên nyâuh seetb taih. ⁵ Wâyc zuc buz ninyh tauv nyâuh woa nzônh cuđ jeenx, buz max zâyf cungb nongc woac coong cungv, yâuc naih cloon Singx-lingh nyăngz jab phunz nyâuh yâuf pez pâyz tingc nây cuđ jeenx six seenz nyăngz. Nyâuh yâuc cănh pâyz tuz buz yămz nyâuh mungh tongx woax zanyf, buz năngđ laix nâyx yămz yâuc phunz nyâuh pâyz tuz gongx. ⁶ Nyâuh yâuf-pez âyz năngđ yaz nyăngz gao, lauf năngđ Zâu nyăngz gao. Max cun nyâuh yâuf-pez zuc dlauc huđ, nyâuh yâuc naih Singx lingh phunz taih nyăngz hônb hiđ stipx nây cub jeenx. ⁷ Wâyc nâyx nyâuh yâuf-pez ayx caox gao phunz Munh yămz Ma-xê-đoan cloon miênh nam Hi-lapc Munh hođ. ⁸ Zâu nzaox nyăngz gâyf tăng nyâuh yâuf-pez lănv đanv seetb cungh ngwoaic ninyh max si cungb nzêux Ma-xê-đoan cloon Miênh Nam Hi-lapc, muif đoif numđ lănv coong nyâuh yâuf-pez naih seenz stymz zeen gongx Zâu Tênb-Hungh yaz songđ max zâuđ năngx coong laiv hungđ pâu tymb. ⁹ Yămz muif đoif Munh tanv nyâuh yâuf-pez Coong, “Buz ninyh tauv nyâuh yâuf-pez woa nyâuh stipx yaz năngđ laix, Nănh stiz lănv coong nyâuh yâuf-pez quanyf nzuf paix Miuc hanyh phunb đangz taih canyx bongc seenz gâyf săngh Mengc nyăngz Zâu Tênb-Hungh. ¹⁰ Pănh yâuf-pez lauf zuc zu Zâu Tênb-Hungh nyăngz Toonz, six tayc blătc năngx săngh phunb stengb tăng Tênb-Toongh Côkz nzac taih woax tauh six Zâu Yê-su, tongh hayh Njâuv pănh gâyh đutb zuc Tênb-Hungh tingc stoif nyăngz jau, zăkv zeenx nănh six taih.