¹ Wâyc zuc Njâuv Zâu nyăngz stynb zuc tanyđ zâuđ, nyâuh yâuc zuc nongc nănh nâyx hungđ zâuđ nanc taih nongc ayx hungđ tungh zangc nongc tanyđ nyâuh, wâyc zuc laiv lanh stynb stayb pongh zuc zâuđ nanc, woax tauh songđ tuz catz gâyh stoif. ² Nyâuh năngx yămz nây stâyv sangc sax stoiz, six zuc ayx âyz Tênb-Hungh nyăngz zux ix. Max zâyf âyz bamh munh nyăngz nyâuđ nyâyh seetb taih nyăngz jau ayx. ³ Đangc dlih nyâuh ayx năngđ max zeen nyăngz munh ayx nyăngz dlayc caux nzof, woax zanyf nyâuh cungb oix ayx âyz nyâuh nyăngz stymz nyâyh seetb taih ayx okx nyăngz dlayc, oix văngf munh, hopb tyu mynz sêu munh lunc, max zâyf cungb mauh nhlync pêu hopb mynz, năngx ayx cloon cumh nzav nyăngz dlayc cloon congx miuc hanyh. ⁴ Six nâyx zanyf, max zeen nyăngz munh seen nyâyh ganc, nyâyh max tongb nyâuh, nyâuh max ninyh tac nănh stiz ayx huđ dlayc, nănh stiz songđ hănđ nâuh yâuc coong peo nyâuh yâuf pez. ⁵ Six naih ah noib nănh stiz six zuc lănv nzuf stiz ayx nyăngz dlayc bux Tênb-Hungh, six seenz zâyf bênc săngh stămđ munh tayc cloon munh săngh nyăngz stoif woax tauh Tênb-Hungh. ⁶ Wâyc năngđ nâyx, njynh tayc blătc woax đomc nyăngz mengc honh yămz woa yămz pâu lauf tuz numđ nzônh cuđ jeenx, nănh stiz zuc stămđ năngđ yămz stâyv sangc nyăngz munh zuc stămđ stoif nâyx, nănh stiz nyăngz mengc hoonh songđ tuz Tênb-Hungh săngh âyz nyăngz zux ix. ⁷ Bamh canz nyăngz stêtb mâyv noib taih tauv stătx nzof, nyâuh yâuf pez six zuc muif dlih canyz nyâuđ buôngh clo Zâu. ⁸ Nongc seen quaix six zuc joomz nyâuđ lanh stăngz lanh, wâyc zuc lanh stăngz lanh six hayh quanyf tuz munh đungx nyăngz stoif. ⁹ Six zuc lanh stipx lanh ayx zeb, yâuc năngx gâyf tuz lanh yônx lanh. ¹⁰ Nyâuh muif lanh yâuf pez tuz stipx Tênb-Hungh nyăngz pôz, six zuc lif năngx gongx, laiv lanh tuz stipx laiv hungđ sâuđ nyâyc six zuc nongc stăngc songx munh. ¹¹ Laiv lanh nzônh gâyf six seenz tâuc Tênb-Hungh nyăngz cuđ jeenx, laiv lanh seetb stymz stăngc munh, six zuc nongc Tênb-Hungh phunz taih nyăngz jab bokc dlic, năngđ naz nyâuh ayx nyăngz muif hungđ dlayc, songđ munh tingz Njâuv Zâu Yê-su tanv Tênb-Hungh gwăngz-eng nyăngz bux, tauv banc stâyv banc đaic A-men. ¹² Stăngz nyăngz yâuf pez lex, nyâuh năngx gâyf nyâyh max manyh pec nyâuh pongh zuc wăngh canyz cox cănh stâyv nyâuđ nyăngz dlayc, năngđ tâuf pu stâyv mangc nyâuh nyăngz nyâuđ, yâuc năngx gâyf stunx nyâuh pongh pitc hungđ dlayc njingc. ¹³ Six nyâuh zuc numđ nyađ, wâyc zuc nyâuh tuz cloon Njâuv Zâu songc tanyđ zâuđ buc laiv, nyâuđ songđ năngđ Njâuv Zâu, tuz gwăngz-eng hynđ seetb taih woax zanyf, nyâuh songđ tuz numđ nyađ buc woa. ¹⁴ Six coong wâyc nyâuh zeen Njâuv Zâu bix zuc munh coong peo, nyâuh songđ naih oonz loc gôh, wâyc zuc naih Tênb-Hungh singx lingh nyăngz gwăngz-eng cloon nyâuh yămz. ¹⁵ Năngx gâyf bây nyâuh toix laiv lanh yâuf pez tayx munh, ayx stac, pamf Đoouc lif gâyf, mah six phax munh nyăngz dlayc, bix zuc đauc huđ. ¹⁶ Six coong nyâuh wâyc zeen Njâuv Zâu bix zuc đaoc huđ, six năngx gâyf numđ nyayz, six zuc tanv Tênb-Hungh, wâyc zuc nyâuh tuz đamz Njâuv Zâu nyăngz manyh yangh. ¹⁷ Tênb-Hungh stămđ stoif nyăngz săngx huđ, Tênb-Hungh nyăngz pyau munh bix năngx zuc quef coonz zuc stămđ stoif đangc têx, max zeen Tênb-Hungh nyăngz cuđ jeenx woax đomc munh, tauv stêtb mâyv woax noib six năngđ laix? ¹⁸ Six coong pengh stymz nyăngz munh bix năngx buôngh max tuz Njâuv têx, max zeen Tênb-Hungh woax đomc stoif-munh six săngh laix?”* ¹⁹ Năngđ naz, âyz Tênb-Hungh nyăngz zux ix ayx bix zuc tanyđ đauc wâyb nyăngz munh, năngx zuc ayx gongx dlayc, yâuc jaoz mengc hoonh phunz seenz zâyf zâyx pănh taih yâuc hayh couv tuz wăn woax tauh.