¹ Wâyc năngđ nâyx, six zuc quanyf nzuf muif hungđ huđ dlayc, năngx gâyf puv maoh jaf munh, yâuc max cuyb coong woac peo munh, max tuz ayx pâyh zac nyâuđ ngokx stâyx munz munh nyăngz tax hungđ. ² Nyâuh six zuc năngđ munh sây ah yađ stengb stâyv taih, ngoc oix hopb nuz, nongc yungf nyâuh nyăngz mengc hoonh, songđ hayh lub taih tuz Njâuv. ³ Nyâuh yâuf pez yâuc tuz stâyv mungv, pâyz tuz Zâu six camz đămh. ⁴ six zuc sec stătx naih mengc săngh nyăngz njauz pyây, bamh munh nzêmh, six Zâu Tênb-Hungh sên taih stunx saix nzongf. ⁵ Nyâuh yâuf pez lauf năngđ săngh mengc nyăngz njauz pyây, nongc zâyv Tênb-Hungh nyăngz layf paix pyau, phunz đăngb zengh nyăngz singx lingh ayx stayb munh yămz nyâuh cah njaf, canyx bongc stanyb lanyh phunz Tênb-Hungh, nănh songđ nyunc stipx Njâuv Zâu Yê-su nyăngz stanyb lanyh. ⁶ Wâyc zuc Canyx-stâub ja coong, “mangc geh! Yaz oonz ah nomz saix nzongf nyăngz njauz pyây ănz Si-ôn stengv, nongc ayx pyau joongz, laiv lanh zeen woax nomz njauz pyây, six stâyv quâyx max hayh platb mynb mâyc. ⁷ Nâyx nomz njâuz pyây wâyc nyâuh zeen nyăngz munh six saix nzongf, six Canyx-stâub coong, “max zeen nyăngz munh ayx pyau stangc nyăngz munh nzêmh zoz seetb taih woax nomz njauz pyây nongc ănz pyau joongz six năngx gongx têx. ⁸ Nâyx nomz njauz six ayx phunz munh zuc tib njauz pyây, yâuc ayx phunz munh zuc tib glinyf nyăngz njauz pyây, nănh stiz săngh laix bix zuc tib glinyf? Wâyc zuc nănh stiz max zeen Tênb-Hungh nyăngz gâyf, nây six âyz Zâu Tênb-Hungh nyăngz zux ix bênc săngh phunz nănh stiz quaix đangc nzof. ⁹ Six nyâuh ayx Tênb-Hungh sên taih nyăngz pec stingx, yâuc ayx stayb munh canyx bongc Tênb-Hungh nyăngz pec stingx, yâuc ayx đăngb zengh nyăngz pec stingx, wâyc nongc nzônh Tênb-Hungh ayx jix caox njingc nyăngz gâyf, nănh êu nyâuh tăng nzămc mengh nyăngz tync seetb taih, nzac jix caox njingc nyăngz gwăngz-eng tync. ¹⁰ Cah đangc noib nyâuh max zâyf Tênb-Hungh nyăngz pec stingx, six nâyx zanyf nyâuh ayx nănh nyăngz pec stingx, cah đangc noib nyâuh max zengx tuz Tênb-Hungh hâuđ lênh, six nâyx zanyf nyâuh yâuf pez tuz Tênb-Hungh hâuđ lênh. ¹¹ Stăngz nyăngz yâuf pez lex, nyâuh yămz nâyx nomz bamh canz six năngđ yămz pitc nomz stâyz phangz taih nyăngz zeb munh nâyx, năngđ naz yaz songđ bux nyâuh, max tuz âyz stymz nyâuđ cănh nyâyh ayx, âyz stymz nyâuđ cănh nyâyh ayx nyăngz dlayc six cloon mengc hoonh tinyh bopc zax. ¹² Nyâuh yămz max zeen nyăngz munh munh tongx congv, cungb zuc ayx gongx nyăngz dlayc cungv, nănh stiz năngđ coong nyâuh ayx huđ dlayc nyăngz munh, nănh stiz năngx hayh saz tuz nyâuh ayx gongx dlayc, tauv Tênb-Hungh taih woax noib, nănh stiz songđ tanv Tênb-Hungh. ¹³ wâyc nyâuh zeen Zâu, nyâuh songđ zuc mungv bamh canz nyăngz Hungh pâu cun, nănh stiz pênx nzêuh Hungh songđ naih lanyf lub nzongf. ¹⁴ Yâuc zuc mungv zanyx pâu nyăngz woac, wâyc zuc Hungh pha njăpc quanz pâu taih nongc tingc ayx longđ woax đomc munh nyăngz stoif, yâuc tanv ayx gongx woax đomc munh. ¹⁵ Tênb-Hungh nyăngz zux ix six oix nongc nyâuh yâuf pez ayx gongx dlayc, yâuc tăng munh oongx coong nyăngz plix plaiz woac. ¹⁶ nyâuh tuz ayx pungx stymz nyăngz munh, yâuc zuc yămz năngđ pungx goib nyăngz nyăngz munh, six max tuz dluyh stymz ayx huđ dlayc, cungb zuc ayx Tênb-Hungh nyăngz nâuh. ¹⁷ Six zuc zanyb muif lanh munh, yâuc zuc stăngz zeen Yê-su nyăngz yâuf pez, six zuc cumh nzav Tênb-Hungh, yâuc zanyb Hungh pâu. ¹⁸ Nyâuh yâuf pez ayx nâuh nyăngz munh lex, six zuc buc nyâuh nyăngz Zâu, yâuc pâuh nănh, max zâyf cungb buc nyâuđ gongx, nyâuđ đao woax đomc munh cungv, six zuc buc cloon nyâuđ đokc woax đomc munh. ¹⁹ Six coong munh tanyđ tuz max hopđ zuc tanyđ nyăngz zâuđ nanc, six wâyc pâyz tuz Tênb-Hungh, yâuc âyz Tênb-Hungh nyăngz âyx ayx, Tênb-Hungh songđ tanv woax tauh ya munh. ²⁰ Six coong nyâuh ayx longđ nyăngz dlayc, bix zuc bopc zuc tanyđ zâuđ yâuc nongc noic tanyđ, bix naih lungđ hayh săngh tanv, six nyâuh ayx gongx nyăngz dlayc bix zuc tanyđ Zâuđ nanc têx, Tênb-Hungh songđ tanv nyâuh yâuf pez. ²¹ Tênb-Hungh êu nyâuh năngđ nâyx ayx, Njâuv Zâu wâyc nyâuh zuc tanyđ zâuđ nanc ayx jix caox phunz nyâuh nyâuh hođ, nyâuh songđ zuc âyz nănh nyăngz staux vac yăngh. ²² Nănh max zengx pamf quaix laiv hungđ stoif, yâuc max zengx naih coong woac jaf munh. ²³ Nănh zuc coong woac zaux nănh, nănh yâuc max coong woac zaux clao nănh stiz, nănh zoz nănh nyăngz dlayc jaoz phunz Tênb-Hungh, six pengh stymz stămz munh woax tauh. ²⁴ Njâuv Zâu nongc nănh nyăngz stynb đamz pănh nyăngz pănh nyăngz stoif yămz săpc đăngc zax, phunz pănh tyuv tuz gâyh tayc nyăngz jab, săngh wâyc ayx hopđ nyăngz jau, wâyc zuc Yê-su zuc tanyđ munz, tayv nyâuh yâuf pez tuz zany gongx. ²⁵ Cah đangc noib, nyâuh six năngđ pa-jiz yungh ninyh longđ jau, six nâyx zanyf nyâuh phunb đangz lauf lov pa jiz yungh nyăngz Zâu, six jămđ nyâuh nyăngz mengc hoonh woax tauh Zâu.