¹ Yâuf-pez lex, Yaz oix phunz nyâuh yâuf-pez săngx tauv dlênh noib yaz lănv bux nyâuh woax đomc cuđ jeenx, woa cuđ jeenx phunz nyâuh yâuf-pez stipx zeen nongc ayx coonz tay yâuc zeen tuz Wăn. ² Nyâuh yâuf-pez tuz Njâuv six wâyc nyâuh zeen âyz yaz bux nyăngz jau, năngđ max têx, nyâuh hănđ zeen yâuc ayx huđ.” ³ Yaz lănv yaz stipx nyăngz tax hungđ bux nyâuh yâuf-pez, nongc seen quaix six năngđ nâyx, Njâuv Zâu tayc wâyc pănh nyăngz Stoif năngđ Canyx-Stâub nyăngz woac ja coong nâyx. ⁴ Nănh tuz plopx tauv tah stamz noib, Nănh năngx săngh phunb stengb taih năngđ Canyx-Stâub nyăngz woac ja Coong, ⁵ “Nănh tuz hynđ yangh seetb taih phunz Phê-e-rơ phătc, năngx cloon woax đomc săpc nyâyc lanh stâyb-Sây phătc nănh. ⁶ Quaix đangz Nănh năngx hynđ phunz woax đomc zeen nyăngz Munh ngâuf pez đungx lanh munh phătc nănh, naih Munh đungx tayc blătc nzof, six năngx naih Munh đungx max zengx tayc. ⁷ Quaix đangz nănh hynđ phunz Gia-cơ phătc nănh, Quaix đangz năngx hynđ phunz songx Munh phătc nănh. ⁸ Nzuf byăng woax hâyđ, Nănh hynđ phunz yaz phătc, Yaz six năngđ Munh ănz zayh stengb đangz. ⁹ Yeetx stong cumh pâuz Munh, Yaz six ayx năngx jeenz quaix muif lanh, Yaz max payh hipđ ayx cumh pâuz Munh, Wâyc zuc lôx noib yaz ayx peo Tênb-Hungh nyăngz Huyđ-toongh. ¹⁰ Six nănh nyăngz Pôz Stăngc yaz tuz năngđ nâyx noib nâyx đomc Pôz max zâyf max săngh nongc, Yaz ayx cumh pâuz năngx zâuđ quaix pitc tauh cumh pâuz Munh, Seenz max zâyf yaz cănh ayx, Six Tênb-Hungh nyăngz Pôz cănh stăngc yaz ayx. ¹¹ Max cun hănđ six yaz mah six pitc đomc cumh pâuz Munh lănv phunz nyâuh yâuf-pez ô stayx, woax đomc dlayc max nongc seen, nongc seen quaix, six stiz lănv cloon yaz songc ayx ah hungđ, nyâuh yâuf-pez zeen woax hungđ. ¹² Wâyc zuc yaz lănv coong Njâuv-Zâu tayc năngx săngh taih ha săngh laix nyâuh naih đomc yâuf-pez aox coong Munh tayc max hayh năngx săngh taih? ¹³ Six coong năngđ max naih munh tayc blătc bix năngx hayh săngh phunb stengb taih, Njâuv-Zâu tayc six max hayh năngx săngh phunb stengb taih nef. ¹⁴ Six coong Njâuv-Zâu tayc bix max năngx săngh phunb stengb taih, pănh Nzônh nyăngz woac, six max săngh nongc, nzof nyâuh yâuf-pez nyăngz seenz stymz lauf max săngh nongc. ¹⁵ Blătc nzuf, pănh nzâyz Stoif ayx za zanyx manyf puv maoh Coong, “Tênb-Hungh wâyc pănh coong, “Nănh ayx phunz Njâuv-Zâu Săngh phunb stengb taih, “Six coong Munh max hayh săngh phunb stengb Tênb-Hungh lauf max ayx phunz Njâuv-Zâu săngh phunb stengb taih nef.' ¹⁶ Six coong Munh tayc blătc bix max săngh phunb stengf taih têx Njâuv-Zâu lauf max hayh săngh phunb stengb taih đêh. ¹⁷ Six coong Njâuv-Zâu năngđ max zâyf săngh phunb stengb taih, nyâuh yâuf-pez nyăngz seenz stymz six max săngh nongc, nzof nyâuh yâuf-pez lauf năngx naih Stoif. ¹⁸ Zeen Njâuv-Zâu woax đomc Munh, tayc ninyh songđ zuc mêtc nzuf. ¹⁹ Pănh nyăngz njih Mungc six hungv Njâuv Zâu woax phanx pănh yămz nây yangh stâyv jic tuz năngx hâuđ lênh quaix yămz Gungh-đi nyăngz nyeenh mănh Six pănh. ²⁰ Six Njâuv Zâu tayc blătc seenz năngx săngh phunb stengb taih, Nănh six ayx zanyx manyf phunz phătc tah yeetx lanh tayc blătc nyăngz Munh năngx săngh taih. ²¹ Wâyc ah lanh Munh nzâyz zuc tayc nyăngz Sămz stâyz taih, lauf wâyc ah lanh bamh Munh nzâyz săngh phunb stengb nyăngz pôz taih. ²² Bamh munh wâyc năngđ laix songc A-Đamx zuc tayc, nzof Bamh Munh lauf wâyc Njâuv Zâu tinyh đoih tuz songc Mengc săngh phunb stengb taih. ²³ Six muif lanh Munh songđ tuz săngh phunb stengb âyz yeetx nyâyc, Njâuv Zâu six ayx tah yeetx lanh săngh phunb stengb nyăngz Munh, Quaix đangz Njâuv Zâu năngx taih woax zanyf, laiv lanh pênx nănh nyăngz Munh woax đomc lauf tuz năngx tuz săngh phunb stengb taih. ²⁴ Quaix đangz stêtb mâyv nyăngz săngx huđ songđ tauv gôh, tauv woax zanyf, Njâuv Zâu songđ Mêtc nzuf cun đamx Gungh naih quyênh naih lanyf, songđ zoz nănh nyăngz Côkz jaoz Phunz Nănh nyăngz Pha Tênb-Hungh. ²⁵ Njâuv Zâu six cun nzuf tauv zoz yeetx stong Yônz zaz ănz nănh nyăngz staux đi phunz nănh cun nzuf. ²⁶ Tauv stêtb mâyv Yônz zaz six zuc mêtc. ²⁷ Wâyc zuc Canyx-stâub ja coong, “Tênb-Hungh six zoz muif hungđ tăpx ănz nănh nyăngz staux đi, “Six coong tuz manyh woax zâux woac six max zâyf zuc Tênb-Hungh, “phunz muif hungđ yămz nănh nyăngz staux đi woax tauh six Njâuv Zâu. ²⁸ Six muif hungđ zuc buf Njâuv Zâu cun songf woax zanyf, Tênb-Hungh nyăngz toonz cănh zoz nănh jaoz yămz Tênb-Hungh nyăngz puf đi, woax zanyf Tênb-Hungh songđ cun nzuf muif hungđ. ²⁹ Six coong Munh tayc max hayh săngh phunb đangz taih, Quaix womz nyăngz Gâyf wâyc tayv Munh tayc naih laiv hungđ âyz Gâyf? Six coong Munh tayc blătc seenz max hayh săngh phunb đangz taih, Quaix womz nyăngz Gâyf tayv Munh tayc nongc ayx lungđ? ³⁰ Pănh wâyc săngh laix muif dlih zuc ênz ninyh cumh nzav nyăngz tync? ³¹ Yâuf-pez lex, Yaz muif noib zuc tayc, Yaz canx năngđ nâyx tanv nyâuh yâuf-pez, wâyc pănh tinyh đoih cloon Njâuv Zâu Yê-su songc Mengc Săngh, Yaz yâuc numđ nyađ nyâuh đomc yâuf pez. ³² Six coong yaz cungb nyâyh yămz Ê-phê-sô Stengv cloon njămh nzongh panx zax, Yaz tuz laiv hungđ gongx? Six coong Munh tayc yâuc max hayh săngh phunb đangz taih têx, pănh zuc Munh coong nâyx đomc woac, “phanv nhlync, phanv hopb, “wâyc zuc săngx đomz, “pănh six zuc tayc nzof. ³³ Năngx gâyf bây Munh jaf, Phunz munh gongx cloon Munh huđ Munh ayx toic, Munh gongx songđ paic nzuf. ³⁴ Nyâuh yâuf-pez six zuc coi nyâuđ phunb đangz taih, nongx gâyf năngx pamf Stoif gôh, yămz nyâuh yâuf-pez lâyc, naih đomc songđ max pâyz tuz Tênb-Hungh, Yaz coong nâyx phunz nyâuh yâuf-pez cănh zuc nyayz. ³⁵ Naih dlih naih Munh hayh naic, Tayc ninyh nyăngz munh ayx laix hayh săngh? Săngh taih woax zanyf, nănh stiz nyăngz stynb six năngđ lungđ? ³⁶ Munh oongx lex! nyâuh hav nhlimb, Nhlimb max yotz, nhlimb six max hayh bêux nyah nec. ³⁷ Nyâuh yâuf-pez songx ah nomz blauh nhlimb, mah six lungđ nhlimb, six cungb songx nhlimb cungv, blauh miuh cloon pitc hungđ miuh six max tinyh năngđ nef. ³⁸ Six Zâu Tênb-Hungh oonz phunz nănh stiz nyăngz miuh max tinyh năngđ, ah hungđ cănh naih ah hungđ njingf. ³⁹ Naih A nyăngz stanyb hauc, A max tinyh năngđ đêh, Bamh munh nyăngz A cănh ah hungđ, Noc A cănh ah hungđ, byauf A cănh ah hungđ. ⁴⁰ Yămz Gungh nyăngz hanyh jangx, Cloon yămz nib nyăngz hanyh jangx max tinyh năngđ, Yămz Gungh nyăngz hanyh jangx cănh quai ah hungđ, yămz Nib nyăngz hanyh jangx cănh vâyb ah hungđ. ⁴¹ Bah noib cănh Gwăngz ah hungđ quai, Lav cănh Gwăngz ah hungđ vâyb, Stingz tau cănh Gwăngz njingf, Stingz tau ah nomz cănh naih hungđ Gwăngz max tinyh năngđ. ⁴² Munh tayc năngx săngh taih nyăngz jau six năngđ nâyx, Plopx nyăngz stynb hayh yotz yiuc nzuf, Six tayc blătc năngx săngh taih nyăngz stynb six max hayh quaiz. ⁴³ Zuc plopx nyăngz Stynb six hayh huđ, six săngh phunb stengb taih nyăngz stynb six max hayh quaiz, zuc plopx nyăngz stynb lanz, săngh taih phunb stengb taih nyăngz stynb six yongb. ⁴⁴ Zuc plopx six stynb A, săngh taih nyăngz stynb six Singx-lingh. Phunz naih mengc nyăngz stynb, six coong naih stynb A songđ naih Singx-lingh phunz naih Mengc nyăngz stynb A. ⁴⁵ Năngđ Canyx-Stâub coong, “A-Đam six pênx tah yeetx tauh naih Mengc nyăngz Munh, “Six cah đangz woax tauh A-Đam six phunz Munh naih săngh Mengc. ⁴⁶ Max zâyf naih singx-lingh nyăngz Munh taih đangc, Six naih stynb A nyăngz Munh taih đangc, Quaix đangz Singx-lingh nzăngđ phunz Munh naih săngh Mengc. ⁴⁷ Tah yeetx tauh six tăng Nib bungb seetb taih, tah nyâyc tauh six tăng Tênb-toongh nzac taih. ⁴⁸ Tăng nib seetb taih woax tauh six săngh bamh canz nyăngz Munh, laiv tauh săngh yămz gungh, six năngđ yămz Gungh nyăngz Munh. ⁴⁹ Pănh năngđ nongc Nib zuyx taih nyăngz Munh, pănh lauf tuz zuyx năngđ yămz gungh woax tauh. ⁵⁰ Yâuf-pez lex! Yaz lănv bux nyâuh, naih A naih samđ nyăngz stynb six max hayh tuz hươngz Tênb toongh Côkz, hayh huđ hayh quaiz nyăngz stynb, six max hayh songc max hayh huđ hayh quaiz nyăngz phănc. ⁵¹ Mungv gongx yaz oix lănv max zengx plongx yangh nyăngz dlayc, pănh tinyh đoih max zâyf tayc nzuf, Six tinyh đoih pyênv wav nzuf. ⁵² Blungh blex buib cah đangz woax hâyđ, pănh tinyh đoih coi wănc căn năngđ Munh nzipx Mâyc nâyx, wâyc zuc blungh blex buib woax zanyf, Tayc blătc nyăngz Munh songđ săngh phunb stengb taih, Stâyv quâyx max tayc, năngx săngh nyăngz Munh yeetx stong coi wănc nzuf. ⁵³ Wâyc zuc hayh huđ nyăngz stynb, zoongz zuz max hayh huđ nyăngz stynb, hayh tayc nyăngz stynb, zoongz zuz max hayh tayc nyăngz stynb. ⁵⁴ Hayh huđ nyăngz stynb tyuv pênx max hayh huđ nyăngz stynb, Hayh tayc nyăngz stynb tyuv pênx max hayh tayc nyăngz stynb woax zanyf, songđ toix nzuf Canyx-Stâub coong nâyx đomc woac, Canyx-Stâub Coong, “Zuc tayc nyăngz jab zuc mêtc nzuf, “Tuz hingh nyăngz jab songđ seenz Cun, ( “ê-sai 25:8-) ⁵⁵ Zuc tayc nyăngz jab lex! Mâyh yămz laiv? “Hoiđ munh zuc tayc nyăngz mađ đôkc lex! “Mâyh yămz laiv nzof weh? (Ô-sê 13:14-) ⁵⁶ Hoiđ Munh zuc tayc nyăngz jab six Stoif, Stoif nyăngz quyênh six Đoouc-lif Gâyf. ⁵⁷ Six hâuđ Tênb-Hungh, Nănh phunz Njâuv Zâu Yê-su pănh tuz hingh. ⁵⁸ Yâuf-pez ô stayx lex! nyâuh six zuc zeen wăn, nongx bây tuih, six zuc muif dlih seetb jab ayx Zâu nyăngz cumh pâuz, wâyc zuc nyâuh yâuf-pez pâyz tuz nyâuh wâyc Zâu nyăngz cumh pâuz max stâyb Congz.