¹ Oix zuc âyz yaz nyăngz gao ayx, wâyc zuc yaz six âyz Njâuv-Zâu nyăngz gao ayx.” ² Yaz tanv nyâuh yâuf-pez, six wâyc zuc nyâuh yâuf-pez yămz muif hungđ dlayc, muif dlih săngx âyz yaz nzaox nyăngz woac ayx. ³ Six yaz oix nongc nyâuh yâuf-pez pâyz tuz nâyx tyuh Gâyf, Munh toonz six ayx munh nzif nyăngz pyây, Njâuv-Zâu six ayx munh Pha nyăngz pyây, Tênb-Hungh yâuc ayx Njâuv-Zâu nyăngz pyây. ⁴ Laiv tauh Munh toonz clo-Zâu mah six lănv đaof Gâyf, yâuc pongz pyây woax tauh six cănh ayx peo nănh nyăngz pyây.* ⁵ Six laiv tauh Munh nzif clo-Zâu mah six lănv đaof Gâyf, bix mah pongz pyây six lauf cănh ayx peo nănh nyăngz pyây, nănh six năngđ tâyv ayx pyây luf nyăngz Munh nzif. ⁶ Six coong munh nzif max pongz pyây, mah six jăpx đongz niny, mah six tâyv pyây luf six nyayz nzongf nyăngz dlayc, nănh six zuc pongz pyây. ⁷ Six munh toonz max hopđ zuc pongz pyây, wâyc zuc Munh toonz six zuyx taih âyz Zâu Tênb-Hungh Gwăngz-eng nyăngz hanyh jangx, Munh nzif yâuc ayx Munh Pha nyăngz Gwăngz-eng. ⁸ Yâuc max zâyf Munh toonz tăng Munh sab seetb taih, six Munh sab tăng Munh toonz seetb taih.” ⁹ Yâuc max zâyf zuyx Munh baox taih wâyc Munh Sab, six zuyx Munh sab taih wâyc nongc phanc Munh baox. ¹⁰ Wâyc năngđ nâyx Munh nzif wâyc pâuh Stynz-Munh, songđ zuc pongz pyây wâyc nongc ayx lokc jangx. ¹¹ Six pănh zeen Zâu nyăngz Munh nzif Munh pha, nyâuh six zuc păngc Yaz, Yaz yâuc zuc păngc nyâuh. ¹² Wâyc zuc Munh sab six tăng Munh baox zuyx seetb taih, nzof Munh toonz yâuc tăng Munh Sab seetb taih. Six muif hungđ yâuc tăng Tênb-Hungh zuyx seetb taih. ¹³ Nyâuh yâuf-pez nyâyh Mangc jađ, Munh toonz clo-Zâu Cloon Tênb-Hungh coong woac yâuc max pongz pyây six hođ max hođ? ¹⁴ Bamh Munh tongb hungb nyăngz jau max zâyf nzaox nyâuh Munh toonz pâyz tuz njâuh pyây đongz đao, Munh toonz njâuh pyây đongz đao six max zâyf nyayz nzongf nyăngz dlayc mah? ¹⁵ Six Munh nzif njâuh pyây đongz đao six vâyc nzongf, Tênb-Hungh phunz Munh nzif pyây đongz đao six wâyc nongc ayx bah nyaic đongx pongz pyây. ¹⁶ Six coong naih đomc Munh oix nzengz nâyx đomc dlayc, Yaz cungb oix coong, “pănh cloon Tênb-Hungh nyăngz songx Huyđ-toongh Munh max zâyf nongc pitc hungđ Gâyf. ¹⁷ Naih batz hungđ Yaz max hayh tanv nyâuh yâuf-pez, wâyc zuc nyâuh yâuf-pez căpx dlonf nyăngz săngx huđ, nyâuh yâuf-pez ayx huđ năngx nzongf têx, ayx gongx dlayc.” ¹⁸ Yaz numđ lănv coong nyâuh căpx dlonf nyăngz săngx huđ, nyâuh phunz goib ayx sax đomc, Yaz lauf zeen coong naih nâyx đomc dlayc. ¹⁹ Nyâuh yâuf-pez pongh zuc nâyx đomc dlayc, nzăngđ pâyz tuz laiv lanh săngh laiv lanh sai. ²⁰ Nyâuh căpx dlonf nyăngz săngx huđ, nyâuh yâuf-pez max zâyf seenz nhlync Zâu njăpf taih săngx nănh woax tonf năngv đêh. ²¹ Wâyc zuc Nhlync woax zanyf, coz Munh lanh max zu lanh, ah phanx yâuc nyâuđ sab, ah phanx yâuc pêu tuz bynz. ²² Nyâuh yâuf-pez max hayh cănh yămz nyâuh nyăngz pyau nhlync mah? mah six nyâuh yâuf-pez mangc stam Tênb-Hungh nyăngz Huyđ toongh Munh, nyâuh yâuf-pez ayx phunz Munh zâuđ Munh zuc nyayz? nyâuh oix nongc yaz năngđ laix nâyx cloon nyâuh yâuf-pez coong? Hayh tanv nyâuh max? maiv đêh! seenz max hayh tanv nyâuh yâuf-pez ayx nâyx đomc dlayc đêh. ²³ Wâyc zuc Zâu jaoz phunz Yaz nyăngz Gâyf, Yaz stipx taih yâuc oix jaoz phunz nyâuh yâuf-pez ô stayx, six Zâu Yê-su zuc maic woax munf Nănh zoz nomz nzu taih. ²⁴ Hâuđ Zâu nzuf watz taih yâuc coong, “nây six yaz nyăngz stynb a, Yaz zuc stêtb Mengc tayc wâyc nyâuh yâuf pez* nyâuh six zuc ayx năngđ nây nâyx wâyc săngx tauv Yaz! ²⁵ Nhlync nzu nzuf, Nănh zoz nomz zan taih yâuc coong, “nâyx nomz zan six pây tauv yaz nyăngz samđ, wâyc nongc njăpf quaix nyunc Woac. nyâuh laiv zanyf hopb nâyx nomz zan six zuc săngx tauv Yaz! ²⁶ Wâyc năngđ nâyx nyâuh laiv zanyf nhlync nzu yâuc hopb nâyx nomz zan, nyâuh yâuf-pez six zuc lănv tauv Zâu zuc tayc, năngđ nâyx ayx zu tauv Zâu năngx taih. ²⁷ Wâyc năngđ nâyx, laiv lanh tinyh phanv nhlync Zâu njăpf taih nyăngz nzu, nongc Zâu nyăngz zan hopb, woax tauh songđ pamf Zâu nyăngz stynb, Cloon Zâu nyăngz samđ. ²⁸ Muif lanh Munh six zuc zah cănh nyăngz nyâuđ đangc, nzof mănc nhlync nâyx nomz nzu, hopb nâyx nomz zan. ²⁹ Laiv lanh nhlync hopb yâuc max saz tuz Zâu nyăngz stynb, nănh Nhlync hopb songđ phunz nănh zuc tingc Stoif. ³⁰ Wâyc năngđ nâyx, nyâuh đomc yâuf-pez songđ naih Munh đungx zuc săngh gumc, naih phanx yâuc zuc tayc.* ³¹ Six coong pănh pâyz zah pănh nyăngz nyâuđ đangc, songđ max zuc Tênb-Hungh tingc Stoif. ³² Six Zâu stămđ pănh nyăngz stoif, Zâu bopc nzaox pănh, wâyc max phunz pănh zuc tingc Stoif cloon Gungh-Đi Munh. ³³ Yaz nyăngz yâuf-pez lex, nyâuh căpx dlonf nhlync nzu nyăngz săngx huđ six zuc tinyh zu. ³⁴ Laiv tauh nyâub sab, six zuc yămz pyau nhlync đangc, tauv Căpx dlonf nyăngz săngx huđ nyâuh yâuf-pez nzăngđ max zuc tingc Stoif. Six năngx naih woax đomc pitc hungđ dlayc, zu yaz ninyh tauv nzof mănc lănv bux nyâuh tymb.