¹ Wuzye mutamanyile, mwe yanji (kuno inkuvwanga uku yantu yano yamanya isunde), kuno isunde likasunda umuntu pali chonsi apasita yino ali kuwumi? ² Alino umukolochi umutwalwe wanyepwa nisunde lya mulume wakwe pano ali kuwumi, kwene ndu mulume wakwe wafwa, akaya umusapuke ukwi sunde lya ntwalwa. ³ Apano lyene, ndu mulume wakwe ali kuwumi, ndi angazanika ali numonsi muze, alikuti alitwa umuzelele. Kwene ndumulume wafwa, akaya umusapuke ukwi sunde, alino atalitwa umuzelele ndi angazanika numonsi muze. ⁴ Alino, mweyanji, mwazanike kuno mweyafwe ukwi sundwe ukupitila mu mwili wakwe Kilisitu. Chili vikwene kuno munyepenkane wenga na muze, apali ponga na wino wazguka uku yafwe, alino tungamanya ukupapa ivikomwa vyakwe Leza. ⁵ Alino lyo tuchili tuli ukuchimwili, uluyembu ulwa kukumbuchila, lwalolekanga ukupitila umwisunde, akuno kwawombanga umumyili yitu alino twali nivikomwa ivya wufwe. ⁶ Kwene kasita wino twasapululwa umwisunde. Alino sweyafwe nomba kuli vilya vino twanyefilwe. Alino chilivikwene ukulikuti tuwombele umupasi uwansita yino, tutawombela umuli kalata uwakali. ⁷ Wuzye tulavwanga chani? Wuzye isunde apalyonga uluyembu? Asavino chingaya foo. Kwene ngali ntamanyile uluyembu, nanti litaliko isunde. Alino ngali ntamanya nukukumbuchila ndi isunde litavwanzile, ''kuno utakumbuchila.'' ⁸ Alino uluyembu lwasenda insambu ukupitila umumasunde nukundetela ulunkhumbwa lonsi muli nene. Alino ndikutaliko isunde, uluyembu ngali lwafwa. ⁹ Insita iya kuchisila nali nemumi chisita isunde, lino lamulo liza, uluyembu lwasenda uwumi, alino nafwile. ¹⁰ Ilamulo chino chali kuno chingaleta uwumi achino chizile chawelela ukuya imfwa kuli nene. ¹¹ Alino uluyembu lwasenda insambu ukuyana ni lamulo achino chankopike nene. Ukupitila mwilamulo achino chankomile nene. ¹² Lyene isunde itele, nakupya nilamulo itele, ilungamane kupya isuma ¹³ Alino wuzye uwusuma wasenwike ukuya uwufwe kuli nene? Asavino chili foo. Kwene uluyembu, aluno lwalanjizya kuno uluyembu, aluno lukupapa imfwa umuli nene nukupitila umuwusuma, nupya ukupitila umwilamulo uluyembu lwizile lwaya uluyembu ukuchila ichipimo. ¹⁴ Alichino tumayile kuno isunde ilya mumupasi, kwene nemo ndukumwili. Nemo ya akazya kuwuzya wa luyembu. ¹⁵ Vino nkuwomba, ntakuvwichisya akawombele. Vino nkulonda ukuviwomba, asavino nkuviwomba, vino navipata, avino nkuviwomba. ¹⁶ Nanti nkuwomba vino ntakulonda, nkuzumilizya ukuyana nisunde ali kuti isunde ilisuma. ¹⁷ Kwene nomba asanene ne muno nkuwomba, kwene aluyembu luno lwikala muli nene. ¹⁸ A muno manyile kuno muli nene, umu mwili wane mutikala nantichimwi ichisuma. Muno ivya kukumbuchila ivisuma ivisuma vi vili muli nene, kwene ntakuwomba. ¹⁹ Pakuti ichisuma chino nkulonda, nkuvilwa apa kuchiwomba, kwene ichiyipe chino ntakulonda apa kuchiwomba, alichino nkuzanika nkuchiwomba. ²⁰ Kwene nkuzanika nkuwomba vino ntakulonda pa kuchiwomba, kwene uluyembu luno lukwikala muli nene. ²¹ Alino, inkuzana imwisunde: Alipano nkulonda apa kuwomba ichisuma, ichiyipe nacho kwene chikuzanika umuli nene. ²² .Ali chino nemo inkusechela umwi sunde lyakwe Leza apali pamwi nu muntu wane uwa mukasi. ²³ Kwene inkulonda ukupusana isunde nimisango yuze yino yili muli nene. Vikulwisyanya ni sunde ipya ilya mumwenzo wane. Alipano chikusendela nene ukuwuzya mwisunde lya luyembu umumisango yane. ²⁴ Nene nkuyilelenjela uluse nemo nenga! Wuzye aweni wino alansapula nene uku mwili wawufwe? ²⁵ Kwene ulusalifyo kuli Leza, ukupitila muli Kilisitu mwene witu! Alichino, nene nenga, nkuwombela isunde lyakwe Leza mumelenganyo yane. Alipano, ukuyana nu mwili inkuwombela isunde lya luyembu.