¹ Mwize nomba, mweyakankhala, mwalila nukukolomoka umulandu ninthazi zino zikwiza pali mwemwe. ² Ivyuma vinu vyawola, nivizwalo vinu vyalika nimphenzu. ³ Golide winu na siliva winu vyawa imiloswa numuloswa wakwe wuliya uwukamboni pali mwemwe. Lulonona imyili yinu ngati umoto. Mwasunga ivyuma vinu mumanda yakunsilo. ⁴ Lolini, amalipilo yano mwasunzile ukufuma kuyawomvi yano yafumyanga ivyakulya muvyalo vinu yakuwalilila mwemwe. Ukulila kwa yakugowola kwafika mumakutwi yakwe Mwene wakwe vyonsi. ⁵ Mwikala umwakufwasa munsi yapansi nivyakuwasechelesya mwemwe. Mwinisya imyenzo yinu ukulindilila uwanda wakukomwa. ⁶ Mwasusya nukuwakoma ayanthu ayalungamane. Atakulwana namwe. ⁷ Tonthelelini, nupya, mweyanji, mphaka pano alizila mwene. lola muno kalima akalindilila ichikomwa ichakulondwa ukufuma mumusili nukuti akatonthela kuli cholicho, mphaka pano chikupochelela imvula yakutalika niyawumalilo. ⁸ Namwemwe, kwene, tonthelini. Pangini imyenzo yinu yiye na maka umulandu ukwiza kwakwe Mwene kuli papipi. ⁹ Mutayilizyanya, yakundwe, ukulwana wenga numuze, ukuti mutize mupingulwe. lolini, kapingula ayimilile pamulyango. ¹⁰ Musambililepo, yakundwe, ukufuma kuwuchuzi na kukutonthelela kwakwe ya kasowela, yano yakavwanjila mwizina lyakwe Mwene. ¹¹ Lolini, tukuwasunda yalya yano ayajimbe ngati ayalungamane. Muvwa ivyanthazi zyakwe Yobu, nupya mwamanya ukulonda kwakwe Mwene, muno wawasayila nkhani nuwaluse. ¹² Papela pali vyonsi, mweyanji, mutalapa, pamwi pavyamwiyulu pamwi pavyamunsi yapansi, pamwi ichilapo chilichonsi. Mumalo mwakwe, lekini ''Ukuzumila kwinu'' kwasula ''Ukuzumila'' nupya ''Ukukana kwinu,'' kwasula ''Ukukana,'' umwakuti mutize muponele muwulonzi. ¹³ Pali wumwi muli mwemwe wuno akuyimba? Apepe. Pali wumwi wuno akusechela? Ayimbila injimbo zyakutumvya. ¹⁴ Wuzye pali wumwi muli mwemwe wuno umulwale? Lekini ayame ayakalamba ya mapepo, nukuti lekini yamupepele. Muleke yamupakazye amafuta mwizina lyakwe Mwene. ¹⁵ Ipepo ilyasuwilo limamupozya umunthu umulwale, nukuti Mwene amamukatusya. Ndi wali umuyembu Leza amamutetela. ¹⁶ Achino mwawumbula amaluyembu yinu wensi kumuze nu kupepelana ukuti mupole. Ipepo lya munthu umulungamane lyaya namaka sana mumiwombele yakwe. ¹⁷ Eliya wali umunthu ngati asweswekwene. wapefile sana ukuti imvula itatonya, nukuti itatonyile munsi pamyaka yitatu nimyezi yisano na wonga. ¹⁸ Alino Eliya wapefile nakupya. Iyulu lyapile imvula, ninsi yapansi yamezizye ivikomwa. ¹⁹ Yakundwe yane, ndi wumwi muli mwemwe waponga ukufuma muwumolimo, nupya ndi wumwi wamuwezya, ²⁰ umunthu wiyo afwile amanye ukuti umunthu wensi wino akuwezya uwaluyembu munzila yakwe iyiyipe alimupususya ukumfwa nukuti amaluyembu ayavule wonsi yalimanyikwa.