¹ Yakobo, umuwomvi wakwe Leza na wakwe Mwene Yesu Kilisitu, kumitundu ikumi nayili iyisalangane: Nawalamuka! ² Chisendini chonsi ukuya ichansansa mweyanji, pano mukukomenkhana ninthazi zyakulekanalekana. ³ Mwamanya ukuti amezyo yisuwilo linu yakaleta ukujimba. ⁴ Lekini ukujimba kumalizyw imilimo yakwe umwakuti mungize muye mweyakukula nukukwana. ⁵ Kweni ndichakuti wumwi muli mwemwe akulonda amano, lekini alenge kuli Leza, wino akatupa umwakusapuka ukwawula ukukana kuli wensi wino akulenga, nukuti alimupa. ⁶ Kwene alenge mwisuwilo, atakayikila. Pakuti wensi wino akukayikila ali ngati amawimbi ayamuli yemba yano umuza wukatuta nukuzinguluka. ⁷ Achino umunthu wiyo atayelenganya ukuti alipochela chimwi ukufuma kuli Mwene; ⁸ umunthu wamelenganyo - yayili, nsumulingane munzila zyakwe zyonsi. ⁹ Lekini umupina ayuvwa ukuyana navino ali, ¹⁰ kwene umukankhala ayiisya ukuyana navino ali, amuno alipita ngati amaluwa yamphanga mwisote. ¹¹ Pakuti ilanzi likafuma nichikayililwa chakocha nukuumisya isote. Amaluwa yakapona, nukuzipa kwawo kukasila. Munzila iyiliyimwi, umukankhala alitchujuka pakasi kawulendo wakwe. ¹² Uwalongo umunthu wino akajimba mumezyo. Pakuti ndi wachila amezyo, alipochela imphumphu ya wumi, yino yalaywa kuli yano yakunda Leza. ¹³ Lekini wino akweziwa atati ati, ''Inkhweziwa na Leza,'' amuno Leza asiyezyeka na chiwa, pamwi weliwe wenga ukwezya wumwi. ¹⁴ Kwene umunthu wensi akayeziwa nivyakukumbuchila vyakwe, vino vikamufumya nukumuzinguluka. ¹⁵ Apano ndi ikumbuchila likukula, likapapa uluyembu, nukuti ndi uluyembu lwakula sana, lukapapa imfwa. ¹⁶ Mutakopekwa, mweyakundwe yanji. ¹⁷ Ichawila ichisuma chonsi nichawila ichenecho ichakufuma kwiyulu. Chikayika ukufuma kuli tata uwamaluswepo. Muli weliwe mutaya ukupiliwuka pamwi ichizungwani pamulandu nukupiliwuka. ¹⁸ Leza wasozile ukutupa ukupapwa mwizwi ilyachumi, umwakuti tuye swevikomwa vyakutalika pavinthu vyonsi vino wawumba. ¹⁹ Mwamanya chii, yakundwe yanji: Lekini umunthu wensi aye zuwa pakuvwa, nukuya uwakuchelwa pakusoka. ²⁰ Pakuti ukusoka kwamunthu kusiwomba uwulungamane wakwe Leza. ²¹ Achino fumyinipo uwuchononyi wonsi nuwuvule uwamaluyembu. Umwakuyichefya pochelelini izwi ilyakwikalana, lino lingakwanisya ukupususya imipasi yinu. ²² Muye mweyakachita yizwi nukuti mutaya mweyakuvwa sile, ukuyonona mwenga. ²³ Pakuti ndi wumwi uwakuvwa izwi ukwawula ukuwomba, ali ngati umunthu wino akalolechesya imiyele yachinso chakwe pigalasi. ²⁴ Akalolechesya wenga nukupita ukufumapo nukuti insita yiyokwene akayilila muno ayelile. ²⁵ Kwene umunthu wino akalola umwakusakamala isunde ilyenecho ilyamutende, nukuwomba vino likutaka, ukunthaya uwakuvwa sile wino akayilila, umunthu wii aliya uwalongo muvichitwa vyakwe. ²⁶ Ndi wumwi akayelenganya ukuti akapepa nukuti asiyilema ululimi lwakwe, akachuzya umwenzo wakwe nukupepa kwakwe ukwasile. ²⁷ Ukupepa kuno ukwenecho na kuno kusiwononeka pamanso yakwe Leza witu ali kwavwilizya yano yasi nayayisi na yafwilwe munthazi zyawo, nu kuyisunga pali wenga ukwawula ukononeka ninsi.