¹ Paulosi, umwamwe na Yesu ukya umu positoli mukulonda kwakwe Leza, na Sositeni uwunji, ² ukung'anda yakwe Leza ku kolinti, kuli yano yapawulwa na kilisitu Yesu ukwamwa nu kuya ayanthu ayatiswe, pali ponga na wonsi ukulikonsi yano yakayamwa umwizina lya mwene witu yesu kilisitu, wino amwene wawo nu witu. ³ Inkhumbu nu mutende viye kuli mwemwe ukufuma kuli Tata Leza witu na mwene Yesu Kilisitu. ⁴ Nkhasalifya manda pee kuli Leza wane pali mwemwe pamulandu wa nkumbu zyakwe Leza zino Kilisitu Yesu wawapa mwemwe. ⁵ Wawapanga mwemwe ukuya mwe yakankhala munzila zyonsi, mumivwanjile yonsi na mano wonsi, ⁶ ndi vino uwusimisi wakwe Kilisitu wazumilizikwe ukuti uwachumi pali mwemwe. ⁷ Pano mukusowelwa ichawupi ichawuzimu pano mukulindilila kumaka uwuwmbuli wa mwene Yesu Kilisitu. ⁸ Nupya aliwapa amaka ukufichila pawumalilo, ukuti pa wanda wa mwene witu Yesu Kilisitu mutize muzanwe nichifukwa. ⁹ Leza umusuwilwa, wino wawamile muwuponga wa mwanakwe, Yesu kilisitu mwene witu. ¹⁰ Nomba nkuwalenga mwemwe, mwe yanji, mwizina lya Mwene witu Yesu Kilitu, ukuti mwensi muvwane, ukuti pataya ukupusana pakasi pinu. Nkhuwalenga ukuti muyi paliponga na melengwi wonga ni fundo yonga. ¹¹ Pakuti kuli nene kulola ukuti vyuvwika, mwe yanji na yanthu ya kukolowe muli mwemwe muli ukupawunkhana. ¹² Nkhusula chii: Ali wensi wakwe mwemwe akati, ''Indi na Paulosi,'' pamwi ''Indi na Apolosi,'' pamwi ''Indi na Kefasi,'' pamwi ''Indi na Kilisitu.'' ¹³ Wuzye Kilisitu wapawunkhana? Wuzye Pawulosi wapamanthilwe pa wuchingane pamulandu wakwe mwemwe? Wuzye mwawatizwa mwizina lyakwe Pawulosi? ¹⁴ Nkhutayizya Leza pakuti nthawatizya nanthi wumwi wakwe mwemwe, nkhandi Kilisipasi na Gayasi. ¹⁵ Chali ndi vikwene ukuti nanthi wumwi wino angati nawatizwe mwizina lyane. ¹⁶ (Nawatizye na yamung'anda yakwe Sitefanasi. Ukuchila papo, nthakumanya ndi nawatizyapo yawuze.) ¹⁷ Pakuti Kilisitu atanthumile pakuwatizya kweni pakutanda izwi --nakavwanjile akakuchenjela pole, ukuti uwuchingane wakwe Kilisitu utaya uwawula amaka. ¹⁸ Pakuti ilandwe ilyauchingane ilyawupuwa ku yanthu yano ya kononeka. Kweni kuli yano yakupusuka, amaka yakwe Leza. ¹⁹ Pakuti kwawalikwa, ''Ndonona amano yaya mano ndivulunganya ukuvwichisya kwa yamanyi.'' ²⁰ Umunthu uwamano alikwi? Alikwi umusambilile? Alikwi uwakususya insi yii? Wuzye Leza atachinja amano yansi ukuya ayawupuwa? ²¹ Pakuti insi mumano yakwe yitamumanyile Leza, Leza chamuzipile ukupususya yano yasuwile mwizwi lino lyatandwanga muwupuwa. ²² Pakuti a Yuda yakalenga ivmanyikwilo ivyakuzungusya nawo a Giliki yakalonda amano. ²³ Kweni tukukosola ukupamanthilwa kwakwe kilisitu, chino ichikome kuya Yuda ni chawula amano kuya Giliki. ²⁴ Kweni kuli yano Leza wawama, wonsi a Yuda naya Giliki, tukukosola Kilisitu ngati amaka na mano yakwe Leza. ²⁵ Pakuti uwupuwa wakwe Leza uwamano ukuchila anthu, uwupotwe wakwe Leza uwamaka ukuchila anthu. ²⁶ Yanji, lolini ulwamo lwino. Sayavule muli mwemwe yano yali na mano ukuyana ukuyana nu kuveichisya kwa ku mwili. Simweyavule mweyano mwali na maka. Simweyavule mweyano mwapafilwe muwukankhala. ²⁷ Kweni Leza wasozile ivyamwalwe ivyamunsi ukuti visonzye insonyi ayamano. Leza wasozile ivyawula amaka munsi ukuti visonzye insonyi vino ivyamaka. ²⁸ Leza wasozile ivyasile nivisulwe munsi. Kupya wasozile vino insi yikati ivyasilesile, ukuti ivyakulondwa viye ivya mwalwe. ²⁹ Wachisile ndi vino ukuti pataya nanthi wumwi uwakuti aye nu mulandu wakuyikwezezya pa manso yakwe. ³⁰ Pamulandu navino Leza wawomvile, Nomba muli muli Kilisitu Yesu, wino wizile kuli sweswe mumano yakwe Leza. Wino wali uwulungumane, utiswe nu wupususi witu. ³¹ Ukuyana na chii, ndi vino kwawalikwa ukuti, ''Mulekini wino akuyikwezya, ayikwezye muli Mwene.''