¹ Si Pablo ug si Timoteo, mga alagad ni Cristo Jesus, alang sa tanang katawhan sa Dios diha kang Cristo Jesus nga anaa sa Filipos, lakip ang mga pangulo ug mga diakono. ² Hinaot nga ang grasya maanaa kaninyo ug ang kalinaw nga gikan sa Dios nga atong Amahan ug sa Ginoong Jesu-Cristo. ³ Akong gipasalamatan ang akong Dios sa matag higayon nga mahinumdom ako kaninyo. ⁴ Kanunay, sa akong matag ampo alang kaninyong tanan, nag ampo ako uban sa kalipay ⁵ tungod sa inyong pagpakig-uban sa ebanghelyo gikan sa unang adlaw hangtod karon. ⁶ Ako masaligon niining butanga, nga siya nga nagsugod sa maayong buhat diha kaninyo mopadayon sa paghingpit niini hangtod sa adlaw ni Jesu-Cristo. ⁷ Husto alang kanako nga mobati niining paagiha mahitungod kaninyong tanan tungod kay ania kamo sa akong kasingkasing. Kamong tanan nahimong kaabag nako sa grasya sa akong pagkabinilanggo ug sa akong pagpannalipod ug pagpamatood sa maayong balita. ⁸ Kay ang Dios mao ang akong saksi, ako naghandom kaninyong tanan uban sa kalooy ni Cristo Jesus. ⁹ Mao kini ang akong pag-ampo: nga ang inyong gugma modagaya ug modako pag-ayo diha sa kahibalo ug sa tanang panabot. ¹⁰ aron inyong oyunan ang labing maayo, ug aron kamo magmatinudanon ug walay ikasaway hangtud sa adlaw ni Cristo,. ¹¹ puno sa bunga sa pagkamatarong nga miabot pinaagi kang Jesu-Cristo alang sa himaya ug pagdayeg sa Dios. ¹² Karon buot nako nga masayod kamo, mga igsoon, nga ang mga butang nga nahitabo kanako nakatabang gayod sa pagpa-uswag sa maayong balita. ¹³ Tungod niini, ang akong mga kadina kang Cristo nahimong naila sa tibuok guwardiya sa palasyo ug ngadto sa tanan. ¹⁴ Kadaghanan sa mga igsoon adunay labaw nga pagsalig sa Ginoo tungod sa akong mga kadena, ug sila adunay kaisug sa pagsulti sa pulong nga walay kahadlok. ¹⁵ Sa pagkatinuod ang pipila nagmantala kang Cristo tungod sa kasina ug panagbingkil, ug usab ang uban tungod sa maayong kabubut-on. ¹⁶ Ang naulahi naghimo tungod sa gugma, nasayod nga ako gibutang dinhi alang sa pagpanalipod sa maayong balita. ¹⁷ Apan ang nauna nagmantala kang Cristo tungod sa hinakog, ug dili tinud-anay. Sila naghunahuna nga makahimo ug kasamok alang kanako sa akong mga kadina. ¹⁸ Unya unsa? Bisan sa unsang paagi, kung sa sayup nga motibo o sa kamatuoran - si Cristo namantala, ug niini magmaya ako, Oo, ako magmaya. ¹⁹ Kay ako nasayod nga kini moresulta sa akong kaluwasan tungod sa inyong mga pag-ampo ug sa tabang sa Espiritu ni Jesu-Cristo. ²⁰ Kini sumala sa akong masaligon nga paglaom ug kasigurohan nga ako dili maulaw, apan uban sa tanang kaisog, karon sa kanunay , si Cristo mabayaw sa akong lawas, bisan sa kinabuhi o bisan sa kamatayon. ²¹ Kay alang kanako ang pagkinabuhi mao si Cristo, ug ang pagkamatay kadaugan. ²² Apan kung ang pagkinabuhi diha sa unod, kana nagpasabot nga mabungahon nga paghago alang kanako. Apan unsa ang pilion? Wala ako masayod. ²³ Kay ako naipit niining duha. Ako nagtinguha nga mobiya ug makig-uban kang Cristo, nga mas labing maayo, ²⁴ apan ang pagpabilin diha sa unod mas gikinahanglan alang sa inyong kaayohan. ²⁵ Ako kumbinsido man niini, ako nasayod nga ako magpabilin ug magpadayon uban kaninyong tanan, alang sa inyong pag-uswag ug kalipay diha sa pagtuo, ²⁶ tungod nii uban kanako aduna kamoy madagayaong rason aron ipasigarbo si Cristo Jesus sa akong pakig-uban kaninyo pag-usab. ²⁷ pag-gawi kamo sa paagi ingon nga takos sa maayong balita ni Cristo, bisan kung moanha ako sa pagpakigkita kaninyo o kung wala ako, madungog ko nga kamo nagbarog nga lig-on sa usa ka espiritu, sa usa ka huna-huna nga nagkahiusa sa pagpaningkamot alang sa pagtuo sa maayong balita. ²⁸ Ug ayaw kahadlok bisan unsa ang buhaton sa inyong mga kaaway. Kay timailhan kini alang sa ilang pagkalaglag, apan sa inyong kaluwasan-- ug kini gikan sa Dios. ²⁹ Kay gihatag kini kaninyo nga walay bayad alang- alang kang Cristo dili lamang sa pagtuo diha kaniya, apan usab ang pag-antos alang kaniya. ³⁰ Nga adunay samang pakigbugno nga inyong nakita kanako, ug karon inyong nadungog kanako .