¹ Ang panan-awon ni Obadia. Ang Ginoo nga si Yahweh miingon niini mahitungod sa Edomea: Nadungog namo ang sumbong gikan ni Yahweh ug usa ka ambasador nga gipadala ngadto sa mga nasod, nga nag-ingon, "Barog! Mobarog kita batok kaniya alang sa gubat!" ² Tan-awa, himoon ko ikaw nga gamay taliwala sa mga nasod, pagabiay-biayon ka gayod sa hilabihan. ³ Ang garbo sa imong kasing-kasing naglimbong kanimo, ikaw nga nagpuyo diha sa pangpang sa dagkong bato, sa imong habog nga puloy-anan; nga nag-ingon sa imong kasingkasing, "Kinsa man ang magdala kanako ngadto sa yuta?" ⁴ Bisan pa molupad ka sa hitaas sama sa agila ug ang imong salag nahimutang taliwala sa kabituonan, pukanon ko ikaw gikan didto, nag-ingon si Yahweh. ⁵ Kung ang kawatan moabot kanimo, kung ang tulisan moabot sa kagabhion - unsaon pag guba! - dili ba sila mangawat ug paigo alang sa ilang kaugalingon? Kung ang tigtapok sa ubas moabot kanimo, dili ba sila magbilin ug hagdawonon? ⁶ Giunsa pagkawat ang kabtangan ni Esau, ang iyang mga tinago nga bahandi gipangawat! ⁷ Ang tanang kalalakihan nga imong gikauban maoy maghatod kaninyo paingon sa utlanan. Ang kalalakihan nga nagpakamalinawon uban kaninyo maoy naglimbong kaninyo, ug modaug batok kaninyo. Sila nga mikaon sa inyong tinapay mihimo ug bitik alang kaninyo. Walay kaalam diha kaniya. ⁸ Dili ba nianang adlawa, si Yahweh miingon, "laglagon ang maalamong kalalakihan nga gikan sa Edom, ug ang panabot gikan sa bukid ni Esau? ⁹ Ang imong kusgang kalalakihan nawad-ag kadasig, Teman, aron ang matag-tawo mahanaw gikan sa bukid ni Esau pinaagi sa pagpatay. ¹⁰ Tungod sa kabangis nga imong gihimo sa imong igsoon nga si Jacob, maputos ka sa kaulaw, ug mahanaw ka hangtod sa kahangtoran. ¹¹ Sa adlaw nga ikaw motindog nga walay pagtagad, sa adlaw nga gidala sa mga dumuduong ang iyang katigayonan, ug nanulod ang mga langyaw sa iyang mga ganghaan, ug nag-ilogay sa Jerusalem, sama ra usab ikaw kanila. ¹² Apan ayaw paglipay sa adlaw sa imong igsoon, sa adlaw sa iyang kaalaotan, ug ayaw pagmaya taliwala sa mga katawhan sa Judah sa adlaw sa ilang pagkapokan; ayaw pagpanghambog sa adlaw sa ilang kalisdanan. ¹³ Ayaw pagsulod sa ganghaan sa akong katawhan sa adlaw sa ilang katalagman; ayaw paglipay sa ilang kasakitan sa adlaw sa ilang katalagman, ayaw kawata ang ilang kabtangan sa adlaw sa ilang pagkaguba. ¹⁴ Ug ayaw pagbarog diha sa nagsangang kadalanan, aron pagpatay sa iyang mga nangikyas; ug ayaw itugyan sa mga kaaway ang mga nakalahutay sa adlaw sa kalisdanan. ¹⁵ Kay ang adlaw ni Yahweh haduol na sa tanang kanasoran. Sama sa imong gibuhat, buhaton usab kini kanimo; ang imong mga binuhatan mobalik sa imong kaugalingon. ¹⁶ kay sama imong pag-inom sa akong balaang bukid, busa ang tanang kanasoran magpadayon usab sa pag-inom. Moinom sila ug motulon sama nga daw wala sila naglungtad. ¹⁷ Apan sa Bukid sa Sion anaa didto ang mga naka-ikyas ug mahimo kining balaan; ug ang panimalay ni Jacob maoy manag-iya sa ilang kaugalingon nga gipanag-iyahan. ¹⁸ Ang panimalay ni Jacob mahimong kalayo, ug ang panimalay ni Jose usa ka siga, ug ang panimalay ni Esau mahimong dagami, ug pagasunogon nila sila, ug magalamoy kanila. Walay makalingkawas ngadto sa panimalay ni Esau, kay si Yahweh mao ang nagsulti niini. ¹⁹ Ang mga tawo gikan sa Negeb mao ang manag-iya sa bukid ni Esau ug kadtong anaa sa patag sila ang manag-iya sa yuta sa mga Filistihanon. Sila manag-iya sa yuta ni Efraim ug yuta sa Samaria, ug si Benjamin mao ang manag-iya sa Gilead. ²⁰ Ang mga gihinginlan niining sundalo sa katawhan niining nasod sa Israel manag-iya sa yuta sa Canaan paingon sa Zarefat. Ang mga gihinginlan sa Jerusalem, nga anaa sa Sefarad, mao ang manag-iya sa siyudad sa Negeb. ²¹ Ang mga manluluwas motungas sa bukid sa Sion aron pagmando ang bukid ni Esau, ug ang gingharian ma-iya ni Yahweh.