22 ¹ Si Jesus misulti pag-usab ngadto kanila sa mga sambingay, nga nag-ingon, ² "Ang gingharian sa langit sama sa usa ka hari nga naghimog usa ka kombira sa kasal alang sa iyang anak nga lalaki. ³ Nagpadala siya sa iyang mga sulugoon aron sa pagtawag niadtong dinapit aron moadto sa kombira sa kasal, apan wala sila nangabot. ⁴ Nagpadala na usab ang hari sa ubang sulugoon, nga nag-ingon, 'Sultihi ang mga dinapit, "Tan-awa, naandam ko na ang akong panihapon. Ang akong mga baka ug pinatambok nga nating mga baka naihaw na, ug naandam na ang tanang butang. Adto na sa kombira sa kasal."' ⁵ Apan kadtong mga tawo wala naminaw ug nagtagad sa iyang pagdapit. Milakaw ang pipila balik sa ilang kaugalingong kaumahan, ug ang uban milakaw balik ngadto sa ilang mga dapit sa pagpatigayon. ⁶ Gidapatan sa uban ang mga sulugoon sa hari, gipakaulawan sila, ug gipatay sila. ⁷ Ang hari nasuko ug Gipadala niya ang iyang kasundalohan, ug gipatay kadtong mga mamumuno, ug gisunog ang ilang siyudad. ⁸ Unya miingon siya sa iyang mga sulugoon, 'Ang kombira sa kasal naandam na, apan kadtong dinapit dili takos. ⁹ Busa adto sa mga kadalanan ug dapita ang daghang tawo kutob sa imong mahimo paingon sa kombira sa kasal.' ¹⁰ Milakaw ang mga sulugoon sa mga kadalanan ug gitigom ang tanang mga tawo nga ilang nakaplagan, daotan man o maayo. Busa ang tigomanan sa kasal napuno sa mga bisita. ¹¹ Apan sa dihang miabot ang hari aron sa pagtan-aw sa mga bisita, nakita niya didto ang usa ka tawo nga wala magsul-ob ug bisting pangkasal. ¹² Ang hari miingon ngadto kaniya, 'Higala, giunsa mo man pagsulod dinhi nga walay bisting pangkasal?' Ug ang tawo wala makatingog. ¹³ Unya ang hari miingon ngadto sa mga sulugoon, 'Gapusa ang kamot ug tiil niining tawhana, ug ilabay siya didto sa gawas nga mangitngit, diin adunay paghilak ug pagkagot sa mga ngipon.' ¹⁴ Kay daghang mga tawo ang gitawag, apan diyutay ra ang gipili." ¹⁵ Unya ang mga Pariseo miadto ug naglaraw unsaon nila pagbitik si Jesus pinaagi sa iyang kaugalingong pagsulti. ¹⁶ Unya gipadala nila ngadto kaniya ang ilang mga disipulo, kauban ang mga sakop ni Herodes. Miingon sila ngadto kang Jesus, "Magtutudlo, nakabalo kami nga ikaw matinud-anon, ug nga ikaw nagtudlo sa paagi sa Dios diha sa kamatuoran. Wala ikaw manginlabot sa pahayag sa uban, ug wala ikaw walay gidapigan taliwala sa mga tawo. ¹⁷ Busa sultihi kami, unsa ang imong hunahuna? Uyon ba sa balaod ang pagbayad ug buhis ngadto kang Cesar o dili?" ¹⁸ Apan nasabtan ni Jesus ang ilang pagkadaotan ug miingon, "Nganong sulayan man ako ninyo, kamong mga tigpakaaron-ingnon? ¹⁹ Ipakita kanako ang salapi sa buhis. "Unya sila nagdala ug usa ka dinaryo ngadto kaniya. ²⁰ Si Jesus miingon ngadto kanila, "Kang kinsang dagway ug ngalan kini?" ²¹ Sila miingon ngadto kaniya, "kang Cesar." Unya si Jesus miingon ngadto kanila, "Busa ihatag kang Cesar ang mga butang nga iya kang Cesar, ug sa Dios ang mga butang nga iya sa Dios." ²² Sa dihang sila nakadungog niini, sila natingala. Unya mibiya sila kaniya ug milakaw palayo. ²³ Niadtong adlawa ang pipila ka mga Saduseo miduol ngadto kaniya, kadtong nagsulti nga walay pagkabanhaw. Nangutana sila kaniya, ²⁴ nga nag-ingon, "Magtutudlo, si Moises miingon, 'Kung ang usa ka tawo mamatay, nga wala makabaton ug mga anak, ang iyang igsoong lalaki kinahanglan nga makigminyo sa iyang asawa ug magbaton ug anak alang sa iyang igsoong lalaki.' ²⁵ Adunay pito ka managsoon. Ang nauna nakigminyo ug unya namatay, mibiya nga walay anak. Gibilin niya ang iyang asawa ngadto sa iyang igsoong lalaki. ²⁶ Unya ang ikaduhang igsoong lalaki naghimo sa samang butang, unya ang ikatulo, hangtod sa ikapito nga igsoon, ²⁷ Pagkahuman nilang tanan, namatay ang babaye. ²⁸ Karon diha sa pagkabanhaw, kang kinsang asawa siya sa pito ka managsoon? Kay silang tanan nakaangkon man kaniya." ²⁹ Apan si Jesus mitubag ug miingon kanila, "Nasayop kamo, tungod kay wala kamo masayod sa kasulatan ni sa gahom sa Dios. ³⁰ Kay diha sa pagkabanhaw dili na sila magminyoay, ni ihatag sa kaminyoon. Hinuon, mahisama na sila sa mga anghel sa langit. ³¹ Apan mahitungod sa pagkabanhaw sa mga patay, wala ba ninyo mabasa unsa ang giingon sa Dios kaninyo, nga nag-ingon, ³² 'Ako ang Dios ni Abraham, ang Dios ni Isaac, ug ang Dios ni Jacob'? Ang Dios dili Dios sa mga patay, apan sa mga buhi. ³³ Sa dihang ang mga panon sa katawhan nakadungog niini, natingala sila sa iyang pagpanudlo. ³⁴ Apan sa dihang ang mga Pariseo nakadungog nga si Jesus nagpahilom sa mga Saduseo, naghiusa sila sa pagtigom. ³⁵ Ang usa hanas sa balaod, nangutana kaniya ug usa ka pangutana, aron pagsulay kaniya- ³⁶ "Magtutudlo, unsa man ang labing dako nga kasugoan diha sa balaod?" ³⁷ Si Jesus miingon kaniya, "' higugmaa ang Ginoo nga imong Dios sa tibuok nimong kasingkasing, sa tibuok nimong kalag, ug sa tibuok nimong hunahuna.' ³⁸ Mao kini ang dako ug nauna nga kasugoan. ³⁹ Ug ang ikaduhang kasugoan sama niini-- higugmaa ang imong silingan sama sa imong kaugalingon.' ⁴⁰ Dinhi niining duha ka mga kasugoan nagdepende ang tibuok balaod ug ang mga propeta." ⁴¹ Karon samtang ang mga Pariseo nagpabilin nga nagtigom, si Jesus nangutana kanila . ⁴² Miingon siya, "Unsa ang inyong hunahuna mahitungod kang Cristo? Kang kinsa siyang anak?" Miingon sila kaniya, "Ang anak ni David." ⁴³ Si Jesus miingon kanila, "Unya giunsa man ni David diha sa Espiritu sa pagtawag kaniya ug Ginoo, nga nag-ingon, ⁴⁴ 'Ang Ginoo miingon sa akong Ginoo, "Lingkod sa akong tuong kamot, hangtod nga akong himuon ang imong mga kaaway nga imong tumbanan.'"?" ⁴⁵ Kung si David nagtawag kang Cristo nga 'Ginoo', giunsa paghimo kaniya nga anak ni David?" ⁴⁶ Walay usa nga nakahimo sa pagtubag kaniya sa usa ka pulong, ug wala nay tawo nga misuway sa pagpangutana kaniya sukad niadtong adlawa.