¹ Ang pagpahayag sa pulong ni Yahweh ngadto sa Israel pinaagi sa kamot ni Malaquias. ² Miingon si Yahweh, "Gihigugma ko kamo". Apan miingon kamo, "Giunsa mo man kami paghigugma?" "Dili ba si Esau man ang igsoon ni Jacob?" nag-ingon si Yahweh. "Apan gihigugma ko si Jacob, ³ apan gikasilagan ko si Esau. Gihimo ko nga biniyaan ang iyang mga kabukiran ug gihimo ko ang iyang napanunod nga dapit alang sa ihalas nga mga iro sa kamingawan." ⁴ Kung ang Edom moingon, "Gibun-ug kami, apan tukoron namo pagbalik ang mga naguba," Moingon si Yahweh sa panon, "Matukod nila pagbalik apan gun-obon ko gihapon kini pag-usab. Pagatawagon sila sa uban nga 'Ang nasod sa kadaotan' ug 'Ang tinunglo ni Yahweh nga katawhan hangtod sa kahangtoran.' ⁵ Makita kini sa inyong mga mata, ug moingon kamo, 'Daku si Yahweh lapas pa sa mga utlanan sa Israel.''' ⁶ "Magpasidungog ang anak nga lalaki sa iyang amahan, ug ang sulugoon sa iyang agalon. Unya, kung ako, usa ka amahan, asa man ang akong pasidungog? Kung ako usa ka agalon, asa man ang balaang pagtahod alang kanako?" Nag-ingon si Yahweh sa panon ngadto kaninyo nga mga pari, nga nagpasipala sa akong ngalan. "Apan miingon kamo, 'Giunsa man namo pagpasipala ang imong ngalan?' ⁷ Pinaagi sa paghalad sa mga daot nga tinapay diha sa akong halaran. Apan miingon kamo, 'Giunsa man namo sa paghugaw kanimo? Pinaagi sa pagsulti nga ang lamesa ni Yahweh talamayon. ⁸ Sa paghalad ninyo ug buta nga mga mananap, dili ba daotan man kana? Sa paghalad ninyo sa mga piang ug mga masakiton, dili ba daotan man kana? Ihatag kana ngadto sa inyong gobernador! Dawaton ba niya kamo o mahimuot ba siya kaninyo?" miingon si Yahweh. ⁹ Karon nagpadayon kamo sa pagtawag diha sa atubangan sa Dios, nga magmaluloy-on siya kanato. Apan si Yahweh sa panon nag-ingon nga sa maong mga halad nga anaa sa inyong mga kamot, dawaton ba niya kini? ¹⁰ "O, kung adunay usa lamang unta kaninyo nga magasira sa mga pultahan sa templo, aron nga dili na kamo maghaling ug kalayo nga walay pulos diha sa akong halaran! "Wala akoy kalipay diha kaninyo Miingon si Yahweh sa panon, ug dili ko dawaton ang bisan unsa nga halad gikan sa inyong mga kamot. ¹¹ Sukad sa pagsubang sa adlaw hangtod sa pagsalop niini ang akong ngalan mahimong bantogan ngadto sa kanasoran ug diha sa matag dapit ang insenso ug ang putli nga mga halad ihalad sa akong ngalan. Kay ang akong ngalan mahimong bantogan sa kanasoran," nag-ingon si Yahweh sa panon. ¹² "Apan gitamay ninyo kini sa dihang miingon kamo nga nahugaw na ang lamesa sa Ginoo, ug ang mga bunga niana, ang pagkaon, talamayon usab. ¹³ Nag-ingon usab kamo, 'Pagkakapoy ba niini,' ug giyam-iran ninyo kini," nag-ingon si Yahweh sa panon."Gidala ninyo kung unsa ang nakuha sa ihalas nga mananap o ang piang o ang masakiton; ug mao kini ang gidala ninyo ingon nga inyong halad. Dawaton ko ba kini gikan sa inyong mga kamot?" nag-ingon si Yahweh. ¹⁴ "Matinunglo unta ang malimbongon nga adunay usa ka laki nga mananap diha sa iyang kahayopan ug nagsaad nga ihatag kini kanako, apan ang mga sakripisyo hinuon kanako, ang Ginoo, ang mananap nga masakiton! Kay bantogan ako nga hari," nag-ingon si Yahweh sa panon, "ug pasidunggan ang akong ngalan ngadto sa kanasoran."