¹ Mao kini ang pulong ni Yahweh nga miabot kang Hosea nga anak nga lalaki ni Beri sa mga adlaw nila Uzia, Jotam, Ahaz, ug Hezekia, mga hari sa Juda, ug sa mga adlaw ni Jeroboam nga anak nga lalaki ni Joash, hari sa Israel. ² Sa dihang nakigsulti si Yahweh pinaagi kang Hosea, miingon siya kaniya, "Lakaw, pangasawa ug usa ka babaye nga nagbaligya ug dungog. Makabaton siya ug mga anak tungod sa iyang pagbaligya ug dungog. Tungod kay kining yutaa nagbuhat ug hilabihan nga pagbaligya ug dungog pinaagi sa pagbiya kang Yahweh." ³ Busa milakaw si Hosea ug gipangasawa niya si Gomer nga anak nga babaye ni Diblaim, ug siya naburos ug nanganak siya ug batang lalaki. ⁴ Miingon si Yahweh kang Hosea, "Nganli siya ug Jezreel. Kay sa dili madugay silotan ko ang panimalay ni Jehu alang sa dugo nga nag-agas didto sa Jezreel, ug pagatapuson ko ang gingharian sa panimalay sa Israel. ⁵ Mahitabo kini sa adlaw nga akong balion ang pana sa Israel didto sa Walog sa Jezreel." ⁶ Naburos na usab si Gomer ug nanganak ug batang babaye. Unya miingon si Yahweh kang Hosea, "Nganli siya ug Lo Ruhama, kay dili ko na kaluy-an ang panimalay sa Israel, nga kinahanglan ko silang pasayloon. ⁷ Apan kaluy-an ko ang panimalay ni Juda, ako mismo ang moluwas kanila, Yahweh nga ilang Dios. Dili ko sila luwason pinaagi sa pana, espada, gubat, mga kabayo, o sa mga lalaki nga nagkabayo." ⁸ Karon human malutas ni Gomer si Lo Ruhama, siya naburos ug nanganak ug laing batang lalaki. ⁹ Unya si Yahweh miingon, "Nganli siya ug Lo Ammi, kay dili kamo ang akong katawhan, ug dili ako ang inyong Dios. ¹⁰ Sanglit ang gidaghanon sa katawhan sa Israel sama sa balas sa baybayon, nga dili masukod o maihap. Ug isulti kini kanila, 'Kay dili kamo ang akong katawhan,' 'Kamo ang katawhan sa buhing Dios.' ¹¹ Ang katawhan sa Juda ug ang katawhan sa Israel pagatigumon. Magpili sila ug usa ka pangulo alang sa ilang kaugalingon, ug sila mosaka gikan sa yuta, kay dako ang adlaw sa Jezreel.