^{2 1} Sa ika duhang tuig nga naghari si Darius, sa ika unom nga bulan, unang adlaw sa bulan, ang pulong ni Yahweh miabot pinaagi sa propeta nga si Hageo ngadto sa gobernador sa Juda, nga si Zerubabel ang anak ni Shealtiel, ug ngadto sa labaw nga pari nga si Josue ang anak ni Jehozadak, ug miingon, 2 "Yahweh sa mga panon nag ingon niini: Kini nga mga tao miingon,"Dili pa karon ang takna nga moadto kami o motukod pag-usab sa balay ni Yahweh.'"" ³ Busa ang pulong ni Yahweh miabot pinaagi sa kamot ni Hageo nga propeta,nga nag-ingon, ⁴ "Karon ba ang takna nga magpuyo kamo sa inyong nahuman nga mga balay, samtang kining balay nagpabiling guba? ⁵ Busa karon si Yahweh sa mga panon miingon niini: Pamalandongi inyong pamaagi! ⁶ Nagtanom kamo ug daghang mga binhi, apan diyutay ra ang abot; mikaon kamo apan wala nangabusog; miinom kamo apan wala nangahubog. Nagsuot kamo ug mga bisti apan gitugnaw gihapon kamo, ug ang nagadawat ug suhol nga salapi daw nagabutang lang niini sa usa ka panudlanan nga daghan ug buslot!' ⁷ si Yahweh sa mga panon miingon niini: "Pamalandongi imong mga pamaagi! ⁸ Tungas ngadto sa bukid, pagdala ug mga kahoy, ug tukora pag-usab ang akong balay; unya mahimoot ako niini, ug ako mahimaya! miingon si Yahweh." . ⁹ "Nagtinguha kamo ug daghan, apan tan-awa! diyutay lang ang inyong nadala sa panimalay, kay gihuypan ko kini! Ngano man?'— mao kini ang gipamulong ni Yahweh sa mga panon "Tungod kay ang akong balay nagpabiling guba,samtang ang matag-usa kaninyo nagtrabaho sa iyang kaugalingong balay. ¹⁰ Tungod niini ang kalangitan dili na mohatag ug yamog diha kaninyo, ug ang yuta dili na mohatag ug abot. ¹¹ Nagpadala ako ug huwaw ngadto sa kayutaan ug kabukiran, ngadto sa katrigohan ug sa mga bag-o nga bino, ngadto sa mga lana ug ngadto sa anihunon sa kalibotan, ngadto sa tawo ug sa mga mananap, ug ngadto sa tanan nga hinagoan sa inyong mga kamot!" ¹² Unya si Zerubabel nga anak ni Shealtiel, ug ang labaw nga pari nga si Josue nga anak ni Jehozadak, ug sa tanang nahibilin nga katawhan gikan sa pagkabihag, mituman sa tingog ni Yahweh nga ilang Dios, ug sa mga pulong ni Hageo nga propeta, tungod kay ang nagpadala kaniya mao si Yahweh nga ilang Dios. Ug ang katawhan nahadlok sa panagway ni Yahweh. ¹³ Unya si Hageo, ang mensahero ni Yahweh, misulti sa mensahe ni Yahweh ngadto sa mga katawhan ug miingon, "Magauban ako kaninyo! — mao kini ang gipamulong ni Yahweh!" ¹⁴ Busa si Yahweh ang nagtandong sa espiritu sa gobernador sa Juda, nga si Zerubabel ang anak ni Shealtiel, ug ang espiritu sa labaw nga pari nga si Josue ang anak ni Jehozadak, ug ang espiritu sa tanang nahibilin nga katawhan gikan sa pagkabihag, mao nga miadto sila ug nagtukod sa balay ni Yahweh sa mga panon, nga ilang Dios, ¹⁵ sa ika-bayenti kwatro ka adlaw sa ika-unom nga bulan, sa ika-duhang tuig sa paghari ni Darius.