¹ Mga igsoon, kung ang usa ka tawo madakpan sa bisan unsa nga paglapas, kamo nga mga espirituwal kinahanglan magpahiuli kaniya sa espiritu sa kalumo. Pagpakabana sa inyong kaugalingon, aron dili usab kamo matintal. ² Pagpinas-anay kamo sa kabug-aton sa usag-usa, ug aron inyong matuman ang balaod ni Cristo. ³ Kung si bisan kinsa nga naghunahuna nga siya labaw bisan siya dili, gilimbongan niya ang iyang kaugalingon. ⁴ Ang matag-usa kinahanglan magsusi sa iyang kaugalingon nga binuhatan, unya makapasigarbo siya sa iyang kaugalingon lamang ug dili kang bisan kinsa. ⁵ Tungod kay ang matag-usa magpas-an sa iyang kaugalingon nga palas-anon. ⁶ Ang usa nga natudloan sa pulong kinahanglan magpaambit sa tanan nga maayong mga butang uban sa magtutudlo. ⁷ Ayaw pagpalimbong. Ang Dios dili mabiaybiay, bisan unsa ang gitanom sa tawo, mao usab kana ang iyang paga-anihon. ⁸ Kay siya nga nagpugas sa liso diha sa iyang tawhanong kinaiya anihon ang kalaglagan. Siya nga nagpugas sa liso diha sa Espiritu, anihon ang kinabuhing walay kataposan gikan sa Espiritu. ⁹ Kinahanglan dili kita kapoyan sa pagbuhat ug maayo, kay sa hustong panahon mag-ani kita, kung dili kita moundang. ¹⁰ Mao nga, kung kita adunay kahigayonan, magbuhat kita ug maayo ngadto sa matag-usa, ilabina niadtong anaa sa panimalay sa magtotoo. ¹¹ Tan-awa ang mga dagko nga letra nga akong gisulat kaninyo sa akong kaugalingon nga mga kamot. ¹² Kadtong gustong daygon sa mga tawo diha sa unod nagpugos kaninyo sa pagpatuli. Sila nagbuhat lamang niini aron nga dili sila pagalutoson alang sa krus ni Cristo. ¹³ Bisan gani kadtong nagpatuli sa ilang kaugalingon wala nagtuman sa balaod, apan gusto nila nga matuli kamo aron nga sila magpasigarbo mahitungod kaninyo. ¹⁴ Dili gayod mahimo nga ako magpasigarbo gawas sa krus sa atong Ginoong Jesu-Cristo. Tungod kini kaniya nga ang kalibotan gilansang alang kanako, ug ako ngadto sa kalibotan. ¹⁵ Kay ang pagkatinuli o dili tinuli walay bili, ang pagkabag-ong binuhat maoy mahinungdanon. ¹⁶ Sa tanan nga magkinabuhi niini nga mando, ang kalinaw ug kaluoy maanaa unta kanila, bisan pa sa Israel sa Dios. ¹⁷ Gikan karon ayaw tugoti si bisan kinsa magsamok kanako, tungod kay akong gidala ang mga timaan ni Jesus sa akong lawas. ¹⁸ Ang grasya sa atong Ginoong Jesu-Cristo mag-uban sa inyong espiritu, mga igsoon. Amen.