¹ Ako magasulti nga ang manununod, usa pa ka bata, siya walay kalainan sa usa ka ulipon, bisan tuod siya ang tag-iya sa tibuok katigayonan. ² Hinuon, siya nailalom sa mga magbalantay ug sa mga piniyalan hangtod sa panahon nga gitagal sa iyang amahan. ³ Mao usab, sa mga bata pa kita, naulipon kita ngadto sa mga binatang pagtulon-an sa kalibotan. ⁴ Apan sa dihang ang hustong panahon niabot, ang Dios nagpadala sa iyang Anak, gipakatawo sa usa ka babaye, gipakatawo ilalom sa balaod. ⁵ Iya kining gibuhat aron sa paglukat niadtong nailalom sa balaod, aron nga kita makadawat sa pagkasinagop nga mga anak. ⁶ Tungod kay kamo mga anak, ang Dios nagpadala sa Espiritu sa iyang Anak sa atong mga kasingkasing, nga nagtawag, "Abba, Amahan." ⁷ Tungod niini nga hinungdan kamo dili na ulipon, apan usa na ka anak, ug kon anak, unya kamo manununod na usab pinaagi sa Dios. ⁸ Apan niadtong higayona, sa dihang kamo wala nasayod sa Dios, kamo mga naulipon niadtong usa nga anaa pinaagi sa natural nga gahum, dili gayod mga dios. ⁹ Apan karon nga kamo nasayod na sa Dios, o hinuon, karon nga kamo nailhan na sa Dios, nganong mibalik man kamo pag-usab sa huyang ug walay kapuslanan nga mga nag-unang pagtulon-an? Buot ba ninyong maulipon pag-usab? ¹⁰ Kamo mabinantayon nga nagsaulog sa mga adlaw, sa mga bag-ong bulan, mga panahon, ug katuigan. ¹¹ Ako nahadlok alang kaninyo nga tingalig ako namuhat diha kaninyo sa walay kapuslanan. ¹² Ako naghangyo kaninyo, mga igsoon, mahimong sama kanako, kay ako usab nahimong sama kaninyo. Kamo walay nabuhat nga sayop kanako. ¹³ Apan kamo nasayod niana nga tungod sa lawasnong balatian nga akong gimantala ang ebanghelyo kaninyo sa unang higayon. ¹⁴ Bisan ug ang akong lawasnong kahimtang nabutang kaninyo sa pagsulay, kamo wala nagtamay o nagsalikway kanako. Hinuon inyo akong gidawat ingon nga anghel sa Dios, ingon nga ako gayod si Cristo Jesus. ¹⁵ Busa, hain karon ang inyong panalangin? Kay ako magpamatuod kaninyo niana, nga kung kinahanglanon, inyo gayong lugiton ang inyong mga mata ug ihatag ngari kanako. ¹⁶ Busa unya, nahimo ba ako nga inyong kaaway tungod kay ako misulti man kaninyo sa kamatuoran? ¹⁷ Sila nagmadasigon sa pag agni kaninyo, apan sa walay kapuslanan. Buot nila nga ibulag kamo gikan kanako aron nga kamo magmadasigon kanila. ¹⁸ Maayo kanunay nga mahimong magmadasigon alang sa maayong katuyoan, ug dili lamang sa dihang ako anaa kauban ninyo. ¹⁹ Akong gagmay nga mga anak, ako nag-antos sa kasakit alang kaninyo pag-usab hangtod nga si Cristo mahulma diha kaninyo. ²⁰ Buot ko nga makig-uban diha kaninyo karon ug usbon ang akong tono, tungod kay nalibog ako mahitungod kaninyo. ²¹ Sultihi ako, kamo nga nagtinguha nga mailalom sa balaod, wala ba kamo mamati sa balaod? ²² Kay kini nahisulat nga si Abraham adunay duha ka mga anak nga lalaki, ang usa pinaagi sa ulipon nga babaye ug ang usa pinaagi sa gawasnon nga babaye. ²³ Apan, ang usa nga pinaagi sa ulipon nga babaye natawo pinaagi sa unod, apan ang usa nga pinaagi sa gawasnon nga babaye natawo pinaagi sa usa ka saad. ²⁴ Kining mga butanga mahimong hubaron sa pasumbingay, kay kining mga babaye nagrepresentar sa duha ka mga pakigsaad. Ang usa kanila gikan sa Bukid sa Sinai. Siya naghimugso sa mga bata nga mga ulipon. Kini si Hagar. ²⁵ Karon si Hagar mao ang Bukid sa Sinai nga anaa sa Arabia. Siya nagsimbulo sa kasamtangang Jerusalem, kay siya naulipon uban sa iyang mga anak. ²⁶ Apan ang Jerusalem nga atua sa taas gawasnon, mao kana, ang atong inahan. ²⁷ Kay kini nahisulat, "Pagmaya, ikaw nga baog nga wala manganak, Pagtiyabaw ug pagsinggit alang sa kalipay, ikaw nga wala makasinati sa pagpanamkon; Kay ang mga anak sa babayeng biniyaan, labaw pa niadtong mga babayeng adunay bana." ²⁸ Karon kamo, mga igsoon, sama kang Isaac, mga anak sa saad. ²⁹ Niana nga higayon ang usa nga natawo sumala sa unod milutos sa usa nga natawo sumala sa Espiritu. Kini sama gihapon karon. ³⁰ Unsa ang giingon sa kasulatan? "Ipalayo ang babayeng ulipon ug ang iyang anak nga lalaki. Kay ang anak nga lalaki sa babaye nga ulipon dili gayod makapanunod uban ang anak nga lalaki sa babaye nga gawasnon." ³¹ Busa, mga igsoon, kita dili mga anak sa babaye nga ulipon, apan hinuon sa babaye nga gawasnon.