¹ Pablo, ang apostol-- Ako dili apostol nga gikan sa mga tawo ni pinaagi sa tawo, apan pinaagi kang Jesu-Cristo ug sa Dios nga Amahan, nga nagbanhaw kaniya gikan sa mga patay-- ² Uban sa tanang kaigsoonan nga uban kanako, ako nagsulat ngadto sa mga kasimbahan sa Galacia. ³ Ang grasya anaa kaninyo ug ang kalinaw nga gikan sa Dios nga atong Amahan ug ni Ginoong Jesu-Cristo, ⁴ nga naghatag sa iyang kaugalingon alang sa atong mga sala aron nga siya makahimo sa pagpahigawas kanato gikan niining kasamtangang daotan nga panahon, sumala sa kabubut-on sa atong Dios ug Amahan. ⁵ Alang kaniya ang himaya hangtod sa kahangtoran. Amen ⁶ Natingala ako nga dali ra kaayo kamong mitalikod kaniya nga nagtawag kaninyo pinaagi sa grasya ni Cristo. Natingala ko nga midangop ka sa laing ebanghelyo. ⁷ Wala nay laing ebanghelyo, apan adunay pipila ka mga tawo nga naghimo kaninyo ug kasamok ug gustong tuison ang ebanghelyo ni Cristo. ⁸ Apan bisan kung kami o usa ka anghel nga gikan sa langit magpadayag kaninyo sa ebanghelyo nga dili sama sa usa nga among gipadayag kaninyo, tungluha siya. ⁹ Sama sa among gisulti kaniadto, busa karon ako mosulti pag-usab, "Kung adunay usa nga magpadayag kaninyo sa ebanghelyo nga dili sama sa usa nga inyong nadawat, siya kinahanglang tunglohon." ¹⁰ Kay ako ba karon nagapangita sa pagtugot sa mga tawo o sa Dios? Ako ba nagapangita aron magpahimuot sa mga tawo? Kung ako sa gihapon nagasulay sa pagpahimuot sa mga tawo, ako dili usa ka sulugoon ni Cristo. ¹¹ Kay ako gusto nga kamo masayod, mga kaigsoonan, nga ang ebanghelyo nga akong gipadayag dili gikan sa tawo. ¹² Wala ko kini madawat gikan sa tawo, o ako natudloan niini. Hinuon, kini gipadayag kanako pinaagi kang Jesu-Cristo. ¹³ Kamo nakadungog mahitungod sa karaan nakong kinabuhi sa Judaismo, giunsa nako paglutos kaniadto sa simbahan sa Dios nga labaw pa sa sukdanan ug naningkamot ako pagbungkag niini. ¹⁴ Sa Judaismo labaw ako kay sa daghan nakong mga sama nako ang pangidaron. Ako hilabihan ka matinguhaon alang sa mga tulumanon sa akong mga amahan. ¹⁵ Apan sa dihang ang Dios, diin nagpili kanako gikan sa sabakan sa akong inahan, ug nagtawag kanako pinaagi sa iyang grasya ¹⁶ nahimuot sa pagpadayag sa iyang Anak kanako, aron nga ako siyang imantala sa mga Gentil, wala dayon ako nagpakisayod sa unod ug dugo ¹⁷ ug ako wala miadto sa Jerusalem niadtong nahimong mga apostoles nga nahiuna kanako. Hinuon, miadto ako sa Arabia ug unya mibalik sa Damascus. ¹⁸ Unya human sa tulo ka tuig ako miadto sa Jerusalem aron makaila kang Cephas ug ako mipuyo uban kaniya sa napulo ug lima ka mga adlaw. ¹⁹ Apan ako walay nakita nga laing apostoles gawas kang Santiago, ang igsoon sa Ginoo. ²⁰ Sumala sa akong gisulat kaninyo, ako nagpasalig atubangan sa Dios nga wala ako namakak. ²¹ Unya ako miadto sa mga rehiyon sa Siria ug Cilicia. ²² Ako wala gihapon mailhi sa panan-aw sa mga kasimbahanan sa Judea nga anaa kang Cristo. ²³ Sila nakadungog lamang, "Siya nga naglutos kanato karon nagpadayag sa pagtuo nga iya kanhing gipaningkamutang gub-on." ²⁴ Sila nagahimaya sa Dios tungod kanako.