¹ Pauli, umutumwa-yo atakatumiwa na banthu pamo nu munthu pakuba mutumwa loli ukwendela mwa Yesu kilisitu nu chala utata, yo akamuzusya kubufwe-- ² naba wamwitu ghosi ku ma chalichi gha Galatiya. ³ Ichisa nu mutende wakufuma kwa chala witu nu mwene u Yesu kilisitu vibe numwe, ⁴ yo akayipa chifukwa cha mbibi zyitu ukuti atupoke kukabalilo aka akambibi ukuyana nu bwighane ubwa chala nu tata, ⁵ kukwache kube ulwimiko ulwa bwila na bwila. Ameni ⁶ Nkhuswigha pakuti mukufumako lubilo; kwa yo akabitizya muchisa cha kilisitu. Nkhuswigha pakuti mukung'anamukila ku mazyu aghanji bwaka, ⁷ techifukwa chakuti pali amazyu aghanji, loli balipo abanthu bamo bobakuleta inthamyo sona bakulonda pakunyongania amazyu amiza agha kilisitu. ⁸ Loli napo uswe pamo umu ngelo wakufuma kumwanya alumbilile amazyu amiza kukwinu ukulusya gho tuka lumbilila kukwinu, awuniwenge. ⁹ Ngati mo twanenela kale, po nkhunena sona, '' Pala yumo akulumbilila kukwinu amazyu ukulusya gho mukapokela, awuniwenge.'' ¹⁰ ka nkhulonda amapalo gha banthu pamo agha chala? nkhulonda pakuti hobosye abanthu? pala nchili nkhulonda pakuhobosya abanthu, te ne mubombeli wa kilisitu. ¹¹ Pakuti nkhulonda ukuti mumanye bawamwitu, ukuti amazyu amiza gho nkhalumbilila teghamunthu. ¹² Nthakaghapokela ku munthu nayumo, pamo ukumanyisiwa. Ghakavumbuliwa nu Yesu kilisitu kukwane. ¹³ Mwivwa izya bumi bwane ubwakale mu chiyuda, mo nkhavwimilanga ama chalichi gha chala akabibi nukughakomania. ¹⁴ Une nkhabachila mu chiyuda abanyane abinji bo nkhakulanga nabo, ukufuma mu banthu bane. Momo nkhabukilila pakubikapo umoyo pa myiko iya batata bane. ¹⁵ Loli bo uchala, yo akansalaukufuma munthumbo ya mama, sona yo akanitizya muchisa chache, ¹⁶ akaba wakuhoboka pakuvumbula umwana wache kukwane, ukuti mulumbilile kubakunzi, nthakalalusya lubilo nu mubili nibanda. ¹⁷ Nthakabuka ku yerusalemu kubo bakaba batumwa bonthizite. Mumalo mwache, nkhaya ku Alebiya nukunyokela ku Damasikasi. ¹⁸ Po bo pendapo imyaka yitatu nkhaya ku Yerusalemu ukuti inje manye u Sefasi po nkhikala nawe amasiku fifitini. ¹⁹ Loli nthakalinga nayumo uwabatumwa ukupatula u yakobo, uwamwabo wa mwene. ²⁰ Pavyo nkhabalembela nkhubasimikizya pa chala ukuti nthakubepa. ²¹ Po nkhaya mu twaya twa siliya nu silisya. ²² Nkhaba pakuti nchili nthamanyikizwe paminso ku ma chalichi gha Yudeya gho ghali mwa kilisitu. ²³ Bakivwa bwaka zikuneniwa, '' umunthu yo akatuvwimanga lumo, ilelo akulumbilila ngati amazyu amiza, ulusubilo lo akayezyanga pakulukomania lumo.'' ²⁴ Po bakamuchindika uchala chifukwa cha une.