¹ Hanu nangati kuti kute kwaazya oku nyansa a avantu vena kwa Jesu Kiresite. ² Ko murawo we cimoya co buharo bwa Jesu Kiresite ninda rukururwa ku mulawo we cibbi no rufu. ³ Ezo kali kawowora kutenda o murawo kevaka lyo kutiye kali kawu gorete ke nyama, Nyambe naatenda. Naa tuma Mwane mwi nyama ye cibbi okutiye ave mwi e newu ye chibbi, mi naa nyansa ovubbi mwi nyama. ⁴ Natenda vulyena okutiye o murawo u vumbilizwe komo ku votere kwetu, eswe tuyenda kali ke nyama, kono ko Ruho. ⁵ Avo vahara kokuya ko muvili vavika engana kuzintu zo muvili, kono avo vahara kokuya ko Ruho vavika engana kuzintu zo Ruho. ⁶ Avo vavika engana zavo kuze fasi ndufu, mi engana zivikitwe kucimoya mbuharo ne mpore. ⁷ Engana ivikitwa ku muvili kai yendereli kwa Nyambe, mi kazi yendereli ne mirawo ya Nyambe kapa kuwora kutenda vulyena. ⁸ Avo vena mwi nyama kavawoli kutemba Nyambe. ⁹ Kavulyaho, mwaazya kwina mwi nyama kono muchi moya, ati nji niti o Ruho rwa Nyambe ruhara kwako. Mi ati o muntu azya o Ruho rwa Kiresite, kali muntu wakwe. ¹⁰ Ati Kiresite ena kwako, o muvili wako ufwite kevaka lye cibbi, kono o ruho ruhara kokuya koku ruka. ¹¹ Ati o Ruho rozyu navuza Kesu kuvafu ruhara kwakwe, ozyu navuza Kiresite kuvafu naraha vuharo ku mivili yenu ifwa ko Ruho ruhara kwenu. ¹² Cware, bakwangu, tukorota, kono kali ke mivili ihara kokuya ke mivili. ¹³ Mi kutiye no hara okuya ko muvili, shokere hafwihi nokufwa, kono ati ko Ruho ovika o rufu kuzi tendantu zo muvili, nora hara. ¹⁴ Vana vungi avo vayendeswa ko ruho rwa Nyambe mbaana va Nyambe. ¹⁵ Kali nemwa tambura o ruho ro mukana o kutiye muhare mwi ntiya hape; kono nimwa tambura o Ruho roku hinda, oro rureta ye tulire, ''Abba, Tata!'' ¹⁶ O Ruho oro rwini rutha ovupaki koruho rwetu ye tuli vana va Nyambe. ¹⁷ Kuti tuli vana, shetuli avehwa, avehwa va Nyambe. Hape shetwa ngungani navehwa ne Kiresite, ati twa shandi neye o kutiye netu tembwe neye. ¹⁸ Hanu ndibwene ye eshando lyeinu nako lyaazya entuso oku likanisa ne kanya eyo netu sundiwe. ¹⁹ Koku lindira epupo eyi shaka neisundiwe kuvana va Nyambe. ²⁰ Ezi vumbwa niza tendiwa koku vumbilizwa, kali kono kazi shakira, kono kakwe eye natenda vulyaho, ke nsepo ²¹ yo kutiye oku vumbwa nakura zwisa mu vukana vutwara kuku voora, kokutiye neva retiwe mwi tukuruho ya vaana va Nyambe. ²² Akuli tuzyi oku vumbwa konshe kutonga oku kuvaza kureta hanu. ²³ Mi kali mbovulyaho vulyo, mi neswe tuveni, eswe tukwesi eziyango zo Ruho, tutakuma hawa mukati, aho tulindire oku hindiwa, oku hazwa ku mivili yetu. ²⁴ Mweyi ensepo nitwa hazwa. Hanu ensepo eyo ivonahara kali nji nsepo. Kwavo vena ensepo kwezo vawora kuvona? ²⁵ Kono ati netuva ne nsepo kuzintu ezo katuvoni, tuzi lindira vulyaho koku gora. ²⁶ Munjira ifwana, o Ruho rutusa mwina twaazya ku gorete. Kakuli katuzyi omo tuvotere ku raperera, kono O Ruho rutu zyimanina mwezina zitu kuvaza. ²⁷ Ozyo a tatuva e myezyo azyi cina mwi ngana yo Ruho, kakuli ndeye azyimanina a vantu va vacenete va Nyambe komo ashakira Nyambe. ²⁸ Tuzyi ye kwavena vashaka Nyambe, atenda ezintu zonshe ko vurotu, kwavena niva kuyiwa komo ashakira. ²⁹ Kakuli kwavena kazyi kare navatenda o kutiye vafwane Mwane, okutiye nave evere mukati ka vanakwe vava kwame. ³⁰ Kwavo naakezya kuhuza, navo mbovulyaho vakuyiwa. Kwavo vakwite avo vantu mbabo vacenete. Kwavo vacenete, mbabo vatembiwa. ³¹ Zinji cware tuwora o kuta hawiru lyazi zintu? Ati Nyambe ngwetu, ndini hape awora kutu rwisa? ³² Ozyu kali naakaterwa mwane kono namureta hacivaka cetu twenshe, mbuti kali shaka natuhe ezintu zonshe koku rukuruha? ³³ Ndini ozyu awora oku hambika a vantu avo nali ketera Nyambe? Nyambe ndeye vulyo a cenesa. ³⁴ Ndini a nyansa? Jesu Kiresite ndeye vulyo naafwa - kuhitilira aho, ndeye na vuswa - ozyo akere ku maryo e anja lya Nyambe, mi ndeye atu kumbilira. ³⁵ Ndini awora kutu bbatura kwi rato lya Kiresite? Mbukavavu, kapa kushaliketa, kapa kushandiswa, kapa njinjara, kapa chitntenentene, kapa maziezi, kapa mukware? ³⁶ Vulyaho komo ziñorerwe, ''Koku wana ezintu tuyayiwa ezyuva lyonshe. Tufwana shina nzi mberere zitwaliwa kuku yayiwa.'' ³⁷ Muzintu zonshe ndiswe nitwa hita kozyu natu sahaka. ³⁸ Hanu shenda zumini kute kwaazya rufu, kapa vuharo, kapa mañiroyi, kapa e mivuso, kapa ezintu zi kereko, kapa ezintu zishi kezya, kapa a maanta, ³⁹ kapa ovure kuya mwiwiru, kapa ovuzungi, kapa echi vumbwantu zonshe, kali nezi wore okutu batura kwi rato lya Nyambe, eli likere kwa Kiresite Jesu o Nfumu wetu.