¹ Kabulyaho mwaazya oku litabilira, enwe bantu, enwe mu atura, kezo mu atura kubamwi muli atura mubeni. Kakuli nenwe mu atura mutenda zintu zi fwana. ² Kono tuzyi ye e nkaturo ya Nyambe yi ama mwi niti haishi wira habo batenda zintu za bulyaho. ³ Kono mu azyare zi, enwe bantu, enwe mu atura abo batenda za bulyena nanga nemu tenda e zintu zi fwana. Haha namura sheya kwi nkaturo ya Nyambe? ⁴ Kapa mushwahwire o burotu bwe chishemo chakwe, o kuliyeha kwe nkaturo yakwe, noku kwata o mozyo? Kamuzyi ye o burotu bwakwe bu mitwara ku kubaka? ⁵ Kono nkuya ko ku zyuminiza no kusha baka kwe myozyo yenu okuti ye mu libikire o bukali mwi zyuba lyo bukali, elyo nde zyuba lye nkaturo ya bantu ba chenete. ⁶ Nara ba boozekeza o muntu no muntu kokuya ke zitendantu zakwe: ⁷ kwabo bantu ba hindikira o kutenda e zintu zirotu no kushaka kutemba, ku kuteka, no kuba ne niti, nara baha o buharo ka bumani. ⁸ Kono kwabena ba linanuna, abo kaba chilili e niti kono ba chilira e zintu zaazya kuchenete, o bukali bunene nabura kezya. ⁹ Nyambe nara reta e shando nene ku muntu yenshe ozyo na tenda e zibbi, ku tangira ku Mujuda, mi noku Mugerike. ¹⁰ Kono murumbe, mu kuteke, mi e mpore yara kezya kuyenshe ozyo atenda e zirotu, ku tangira ku Mujuda, mi noku Mugerike. ¹¹ Kakuli kwa Nyambe kwaazya e nketururo. ¹² Bungi bwabo kaba fosa niba shazyi o murao nabo ni bara ya ni kwaazya o murao, mi bonshe abo niba fosa nibazyi o murao nibara aturwa ka wina murao. ¹³ Kakuli kali nkutiye bena bashuwa zo murao mbabo ba chenete habuso bwa Nyambe, kono mbabena batenda zo murao mbabo niba kwatirwa e zibbi zabo. ¹⁴ Kakuli bashi Zishi, abo baazya omurao, batenda e zintu zo murao komo niba wanina, abo, murao kwabo beni, nanga ni baazya o murao. ¹⁵ Kezi basunda kute ye e zitendo zi shakahara ku murao zi ñoretwa mu myozyo yabo. O kuzyiba o burotu no bubbi kuba o bupaki kwabo, mi e ngazyaro zabo zi nyansa kapa kuba zyimanina kwabo beni ¹⁶ mi nikwa Nyambe hape. Ezo nazira tendahara mwi zyuba elyo Nyambe shaka na ature miziko ya bantu bonshe, kuya ka mazywi angu, ka Jeso Kiresite. ¹⁷ Nali ndinwe mu likuwa ye Mujuda, mu likwate ha murao, mu boterwa koku likuumuseza kwa Nyambe, ¹⁸ muzyibe ezo a shaka Nyambe, mi mulike e zintu zi chinchana kwazo, nemu chilire o murao. ¹⁹ Hape nali mu lishuwa ko kugoresa ye enwe mubeni ndinwe mu yendesa bena ka baboni, e muni kwabo bena mu kansikwe, ²⁰ mu tengurura a basiru, mu ruta a bampwire, mi ye mukwesi mu murao e nkaruro yo kuzyiba ni yo buniti ²¹ Enwe, mu ruta bamwi, kamu liruti mubeni? Enwe mu kutaza okusha hiba, mu hiba? ²² Enwe muta ye mwasha pangi bu buki, mu panga o bubuki? Enwe mu toyete e ziswaniso, mu hiba mu matempele? ²³ Enwe mu boterwa hawa mu murao, kana kamu kuteki Nyambe mu kushotoka o murao? ²⁴ Kakuli "e zina lya Nyambe ka likutekwa mukati ke Zishi ke baka lyenu," shina mbulyaho niya ñorwa. ²⁵ Kakuli o mukanda wu mitusa heba mu kuteka o murao, kono heba muchora o murao, o mukanda wenu sheuba mbwee kali nimwa ya ku mukanda. ²⁶ Mi, hape, omuntu naya ku mukanda heba na tenda kezo zi shakahara ko murao, o kusha ya ku mukanda kwakwe kali neku barwa ye nkuya ku mukanda. ²⁷ Ozyo kali naya ku mukanda kali nami ature hashi bumbiliza o murao? E baka ndyo kuta ye mukwesi mañoro no mukanda zi ñoretwa mi hape mushi shotoka o murao! ²⁸ Kakuli kali mujuda ozyo alisunda vulyo hanje; kapa ye mukanda vulyo wina hanje mwi nyama. ²⁹ Kono Mujuda ozyo akere mukati, mi o mukanda ngoku mozyo, muruho, kali muma ñoro. Oku temba kozywina muntu kakuzwi ku bantu kono kwa Nyambe.