¹ Paulusi, o mwika wa Jeso Kiresite,na kuwiwa okuba omu apositola, mi na bikirwa kumbali ke evangeli ya Nyambe. ² Eyi nje mbuzi na sepisa katanzi ka ba porofita mu mañoro a chenete. ³ Yi amana ne mwane mukwame, ozyu na retwa kuzwa ku bana ba Davida kuya ko mubili ⁴ Ko kubuka ku bafu, na konkesezwa kuba o Mwana wa Nyambe a gorete chaha ko Muzya wo kuchena- Jeso Kiresite Nfumwetu. ⁵ Ke baka lyakwe nitwa tumbura e chishemo nobu apositola bo ku kuteka ke nsepo mukati ke mishobo yonshe, ke zina lyakwe. ⁶ Mukati keyi mishobo, nenwe nimwa kuiwa kuba kwa Jeso Kiresite. ⁷ Eli ñoro njabo bonshe bena mwa Roma, abo ba shakiwa kwa Nyambe, abo ba kuiwa kuba bantu ba chenete. E chishemo chibe nenwe, ne mpore izwa kwa Nyambe shwetu no Nfumu Jeso Kiresite. ⁸ Cha pili, ndi litumera kwa Nyambe ka Jeso Kiresite kenu mwenshe, kakuli e ntumero yenu yi ambwa mwi fasi lyonshe. ⁹ Kakuli Nyambe nje mpaki yangu, ozyo ndi berekera mu muzya wangu mwi evangeli ya Mwane, komo ndi amba kwa Nyambe kenu nako yonshe. ¹⁰ Monsho mo ndi raperera ndi kumbiranga kute ye kube nenja ko kushaka kwa Nyambe aha ndikezya kwenu ¹¹ Kakuli ndi rakaza ku mibona, ye ndimihe e ntuhu zo ruho, oku migoresa. ¹² Ndi toroka ye, ndi rakaza ye muli susueze mukati kenu, ke ntumero zani neni, yenu ni yangu ¹³ Hanu ndishaka ye muzyibe, bayawe, ye kandi shakanga kezya kwenu, kono kandi kaniswa mbita hahanu. Mbobulyena kandi shaka okutiye mube misero mukati kenu mbwee shina mukati ka ke Zishi zonshe. ¹⁴ Ndilishuwa kuba no musebezi wo kutwara ezywi ku Bagerike noku bezyira, konshe ku batali na basiru. ¹⁵ Cware, eme, Ndi litukiseze ku hasanya evangeli ni kwenu mwina mwa Roma. ¹⁶ Ka ndifwi nshoni ke evangeli, kakuli nga manta a Nyambe ke ntukuruho yani neni ozyo a zumina, kutangira Bajuda mi na Bagerike. ¹⁷ Kakuli mweyi njira o kuchena kwa Nyambe nikwa zyibahazwa mwi ntumero ne ntumero, shina ho nikwa ñoliwa, ''Abo ba chenete bara hara ke ntumero.'' ¹⁸ Kakuli o kubenga kwa Nyambe ku bonahazwa kuzwa kuwiru kezya kubonshe bena mu zibbi nabo baazya kuchenete ba zika o buniti. ¹⁹ Ezi nkute ye zina zi zyibahere kuamana ne Nyambe zi bonahere kwabo. Kakuli Nyambe na basunda e niti. ²⁰ Kakuli e misebezi yakwe mirotu ka tuboni yi libonaheze ko kuchena kuzwa he mpupo ye fasi. Zi shuwahara kuya ke zintu niza pangwa. Ezi zintu nje xnchamu zakwe ka zimani ne nomo a fwanina. Ka ma manikizo, aba bantu basi azya ku litabilira. ²¹ Ezi nkutiye, naho kabazyi kuamana ne Nyambe, kali niba mu rumba kuti ye ndi Nyambe, kapa ku litumera kwa kwe. Kono, niba ba basiru mu ngazyaro zabo, mi e myozyo yabo kayi sihisitwe. ²² hinda ye bazyi, kono niba ba basiru. ²³ Niba chincha e kanya ka yimani ya Nyambe no ku rapera ziswaniso zo kuswanisa ko muntu ozyo nafwe,ke zizyuni, ke ziforoforo za matende one, ni ke zintu zi kokoba hanshi. ²⁴ Kabulyaho Nyambe na baha e ntakazo zo kwi myozyo yabo zo kusha chena, okutiye e mibili yabo yasha kutekehi mukati kabo. ²⁵ Mbabo niba chincha e niti ya Nyambe no kuhoma, nabo kaba rapera noku tendera e chibumbo kunje yo Mubumbi, ozyo a tembwa kutwaro koo. Kube bulyaho. ²⁶ Ka bulyena, Nyambe na baha ku ntakazo kazi kutekehi, kakuli bakentu babo niba chincha kuzwa mwinjira niba bumbirwa kuya mwezo zaazya ku zuminizwa ku bantu. ²⁷ Kufwana bulyaho, a bakwame nabo niba reka mutendo wabo wo bukwame na bakentu bo ku babirwa mwi ntakazo za bakwame bayenzabo. Aba kabali bakwame kaba rara na bakwame kabo eyo kayi botere, mi mbabo niba tambura muchabo o murandu wo u botera e zintu niba tenda. ²⁸ Kakuli kali kaba azyara ye o kuba ne Nyambe no kuzyiba nkwa butokwa mu buharo bwabo, na bareka mwi ngazyaro zo bubbi, okute ye batende zo zintu zaazya kwina nenja. ²⁹ Niba kabirwa e zintu zonshe zo kusha chena, e zibbi, kushilira za zyumwi, mi noku remeka bantu mwinjira zingi. Bazywire o muna, o buyazi, o bukali, kuhoma, mi no kutenda zibbi kwa bamwi. ³⁰ Mba shebe, ba hata, nabena ka bashaki Nyambe. Nzi bangama, mba mahanyi, mi ba litunta. Mbashi ntangauzi, mi kaba kuteki bazazi babo. ³¹ Ka bashuwisisi; kaba likwatwa habo, ka bashaki bakwabo, mi baazya e chishemo. ³² Bazyi omo a shakira Nyambe ye ba hare, okuti ye abo batenda ezo zintu o rufu ru babotere. Kono kali nzezi zintu batenda bulyo, bashi tambura bantu bazi tenda.