¹ Mu mashara ezi ninda bona engiroyi limwi ka li surumuka hansi kuzwa kuwiru. Kali na o buyendesi o bunene, mi efasi nliya zura e tubo lya lyo. ² Ni lya shumpura kezwyi li gorete ye, ''Nawi, nawi Babilona o munene! Sha na zoki o munzi wa badimona na makaro e myuzya e mibbi yonshe, na makaro ezizyuni zonshe ezi zaazya kucenete ne zi zi zilitwa. ³ Kakuli ba shi macaba onshe ni ba nywa ku waine yi purumuna yo kushaintika kwakwe. A banfumu be fasi ni ba fumiswa ke ngamu zo vuharo vo vushayi.'' ⁴ Paho shendi shuwa limwi ezwyi lizwa kuwiru lita ye, ''muzwe kwakwe bantu bangu, o kuta ye mwasha tambuli ku zibi zakwe, ye mwasha wani ku nkozi zakwe zimwi''. ⁵ Kakuli ezibbi zakwe zi hompelwa mani kuwiru mi Nyambe shana ka kumburuki ezi tendantu zakwe ezibbi. ⁶ Mu voozere vulyaho kataha kwava munya, mu mulihe kovire keci naatenda; mwi nkomoki eyo naashanganisa, mushanganise kobire eco cimu likene chake. ⁷ Shina vulyaho naa liha evuvo no vumbombo mumuhe o kushandiswa noku swaviswa. Mu mozyo wakwe kali kumusanga ye, 'Ndikere mbo nfumu - kentu; kali ndili mufwirwa, kali nendi vone ozyo alira.' ⁸ Kavulyaho enkozi zakwenezira kezya mwizyuva lyonke: o rufu, o kulira a vafu, no rukubwe. Nara yisiwa ku muliro kumana, kakuli Nfumu Nyambe ndeye zyo akwesi manta, ndeye amu atura.'' ⁹ Ava Nfumu vefasi ava niva shaintika ko kurara neye nokuki tahisa zo vumbombo zakwe shake niva vone ovusi vokuya kwakwe nivara mutakumina noku lilira. ¹⁰ Kokutiya a mashando akwe, nivara kazyimana o kure noku lira ye, ''mbu shomani, mbu shomani ku mureneñi o munene, Babirona, o mureneñi wina a manta!Mwi nako yonke kwa kezyi e nkonto zako.'' ¹¹ A bawulisi be fasi nibara takuma no ku mu lira kakuli ashi azya ozyu shake a kuuranga e zi suantu zakwe nera. ¹² E zi suantu ze gauda, ze silivera, mabwe o butokwa, ni ze perera, ze line i cena, ze pulipela, ze siluki ni ze masila a subira ne mishobo yonshe ye zikuni zi nunka nenja ne mishobo ye zi suantu zonshe ezi zi tendwa ha manaka a banjovu, ze zikuni zi dura, ze nsipi nize mabburu. ¹³ Zisuantu ze sinamoni ni za malungiso o tulyo, ze insense, ze mira ni ze furankiinsense, ze waine niz e oli ye olive, ze fulauro yi nakite ni zo buloto, eñombe ne ngu, embizyi za ku bantu ne zi zironga ezintu ne bakana za bantu ne myuzya ya bantu. ¹⁴ Ni ba ra taye, e zikwata ko shako kuli fulira za kushonshoroki. O rubono rwako ronshe ne bubo za mani, ka li ne zi waniwe hape. ¹⁵ A baulisi aba kaba wulisanga ezi zintu kwakwe no kuwana ko e zi munantu ni ba ra ka zyimana a hare, ni ba tiyite ku shando lyakwe. Ni ba ra takuma no kulira o muliliro wo kulira o mufu. ¹⁶ No kulira ye, Mbu-shomani! mbu-shomani, hii e leneñi e nene. Owu kawu zyobere ze line e ndotu, mu pulipera no kusubira, no kukebera-kebera mu gauda, mu mabwe o butokwa no mu perera. ¹⁷ Ke nako yonke e cifumu cinene bulyena shi ca zyundiswa kusiya matongo. Bonse a bayendesi ba kuwate, na ba ba yendanga ke zisepe bonshe, na bazuwi bazo, na ba ba wana zo buharo bwabo ezi zizwa muwate bonshe, ni ba ka zimana a hare. ¹⁸ Shake ni ba bone o busi bo kuya kwa kwe, ni ba ra amba ye, Mani shiwa ba ko o muleneñi u fwana no wu muleneñi o munene? ¹⁹ Ni ba ra li zyumbaira eruli ku mitwi yabo, ko kutakuma no kulira ni ba shumpure ye, mbu-shomani! Mbu-shomani, hii muleneñi o munene. Omu ni ba fumina bonshe aba ka ba kwesi e zisepe muwate ko rubono rwakwe. Mwi nako yonke na zyundiswa kusiya matongo. ²⁰ Ewe wiru o botelelrwa, ke baka lyakwe! Mubotelerwa, enwe mucenete na baapositola na baporofita. Kakuli Nyambe na lete e nkaturo zenu hakwe. ²¹ Cwale e ngiroyi li lima a manta ni lya nanuna ebwe e nene li kuma ha bwe enene lyo kutwisa no ku li shonjera muwate no ku taye: Ka wuwo mukwa u fwana, u tiza, o muleneñi o munene wa Babilona no ura shonjerwa hanshi, kali ne u bonwa kame. ²² E njimbo zi ba shi magitaya na bazyimbi, bashibi ba mampeta na bashibi ba mantorombita, ka ri niba shuwahare mwako hape, kakushina o mubezyi wanahare mwako hape. Kali ne kushuwahare o murumo we nkunju yitwa e zilyo hape mwako. ²³ Kali ne ku munike e tubo lye rambi mwako kame, kali neku shuwahare ezywi lyo musheshi no musheshiwa mwako kame, kakuli bako bantu kavali vaana vo nfumu ve fasi, mi vashi machava niva homiwa kuzako zo vulozi. ²⁴ A maroha ava vacenete nia vaporofita mwakwe nia wanahara, na maroha ava niva yayiwa vonshe hanshi.''