¹ Oku ku kuvukura kwa Jesu Kiresite oku namuha Nyambe ye asunde a vakana vakwe kwezo zi votere kuli tahanera o kutendahara. Naazi zyivahaza ku mukana wakwe Johani ko kutuma Engiroyi lyakwe. ² Johani naa paka zezywi lya Nyambe novu paki ovo nibwa hewa kaza Jesu Kiresite, ne zintu zonshe ezo naa vona. ³ E nfwiyauzi njozyu a vara a mazywi eci porofita, hape e nfwiyauzi nzavena vashuwa noku mamenra ezi zi ñoretwa mo, kakuli enako sheyi shunine. ⁴ Johani, kwi enkereke ze anja-ni-zovire za mwa Asia: Echishemo ne mpore zive nenwe ezo zizwa kozyu enako, nozyu kena ko nozyu na kezye, neyi izwa ku myuzya ye anja-ni-yovire yina havuso vo ruvona rwakwe, ⁵ nezi zizwa kwa Jesu Kiresite, e mpaki yi sepahara, e veere lyava vavuka ku rufu, no muvusi wa vanfumu vefasi. Eye ozyu naa tushaka mi naatu rukurura ku zibbi zentu ka maroha akwe. ⁶ Mi shana tutenda o muvuso, na vapurisita va Nyambe wakwe ni Veshi - etuvo na manta zive kwakwe kuya oku kakumani. Amen. ⁷ Muvone, akezya na mazyova; mi a mensho onshe naara muvona, nanga mbavena niva mushompaura. A vantu vefasi vonshe navara lira kevaka lyakwe. Mi mbovulyaho neku tendahare, Amen. ⁸ Ndime alpha ne omega,'' Ndu Nfumu Nyambe a amba vulyaho, ''ozyu enako, nozyu kena ko, nozyu nakezye, Ndi Manta -Onshe.'' ⁹ Ndime, Johani - nkuruyenu no muyenzenu mu mashando no muvuso nomu kugoresa mukuli ombeka mi ecici cetu ka Jesu - kandina muwongo lya Patimosi kevaka lye zywi lya Nyambe no vupaki bwa Jesu. ¹⁰ Ninda va mu muzya mwizyuva lyo Nfumu, mi mu mashara angu ninda shuwa ezywi li ongoza mbwe ntorombita. ¹¹ Eli nilya ndita ye, ''O ñore mwivuka eci obwene nokuchi tumika ku makereke e anja-ni-ovire - kwa Efase, kwa Simina, kwa Pegamo, kwa Tiyatira, kwa Sade, Kwa Firaderufiya, Laodesiya.'' ¹² Ninda futuruka ye ndi vone shizywi eli kali amba kwangu, mi aho shendi futuruka ninda vona a marambi e gauda e anja-ni-wovire. ¹³ Mi hakati ka marambi kakwina o muntu kafwana shina ndi mwana muntu, ka zyavere muci zyavaro echire cikahura hanshi ku matende akwe, no munsunga we gauda ku zimburuka e cizuva cakwe. ¹⁴ O mutwi ne nshuki zakwe kazi tuva shina bwanda - kapa shina meni a gangire, mi a mensho akwe shina muliro u tumbuka. ¹⁵ A matende akwe shina chitare ca beyi mu muliro munene, mi ezywi lyakwe shina menji avuva. ¹⁶ Mu anja lyakwe lya malyo ka kwesi entungwezi ze anja-ni-zovire, mi mukanwa kakwe kamuzwa o mukware o muceku u funda noku-noku. E cifateho cakwe kacifwana mbwe zyuva limunikite hawa. ¹⁷ Aha shendi muvona, ndoku wira ha matende akwe mbo muntu afwire. Mpaho shandi kambika e anja lyakwe lya malyo nokuta ye, ''Washa tiyi. Ndime we ntanzi niwa kamani-mani, ¹⁸ ndime ozyu ahara. Ninda fwa, mi vone, shendi hara vuharo kavumani! Mi ndikwesi enkii zo rufu nize civaka ca vafu. ¹⁹ Mpaho ñore ezi novoni, ezi zinako, nezi nazi tendahare mu mashara. ²⁰ Mi kezo zi zikitwa zitoroka ze ntungwezi ze anja-ni-zovire ezi novoni mu anja lyangu lya malyo niya marambi e anja-nii ovire e gauda nje yinu. Entungwezi ze anja-ni-zovire nga mangiroyi a makereke e anja-ni-ovire, mi a marambi e anja -ni - ovire nga makereke.''