¹ Cware Jesu aha shazyiva ye a Mafarisi niba shuwa ye akwesi akaviza noku koroveza a bazyiizwa bangi kuhita Johani ² (nanga kali ndeye kakorobeza, kono bazyiizwa mbabo kavatenda vulyaho), ³ akuzwa mwa Judea noku boora hape kwa Galireya. ⁴ Kono kaku swanera kwakwe ye ahite ya Samaria. ⁵ Cware akezya mwi toropo ya Samaria, ikuiwa Sikare, haho mpahafwihi ne chibaka echo nicha hewa kwa Josefa kweshi Jakobo. ⁶ Esima lya Jakobo nelyo kali kere haho. Jesu shika kwangite mumuyendo wakwe mi mpaho sha kara hambali ye sima. Shika ishunina kwi nako ye enja ni konke. ⁷ O mukentu wo Musamaria akezya kukuteka menji, mi Jesu aku amba kwakwe, ''Ndihe ku menji ndinywe.'' ⁸ Kakuli a bazyiizwa bakwe niba zwaho kuya mwi town kawura ezilyo. ^{9 10} Cware o mukentu wo Samaria aku mutava, ''Mbuti kukezya ye ewe, we Mujuda, ondi kumbira, eme nde mukentu wo Samaria, kuchintu cho kunywa?'' Kakuli ma Majuda kava tendi zintu nama Samaria. Jesu aku mutava noku amba kwakwe, ''Ati nozyi echihewa cha Nyambe, mi nozyo a amba kwako, ' Ndihe ndinywe,' nali no mukumbili, eye nana kuhi a menji ahara.'' ¹¹ O mukentu aku mutava, ''Akutekeha, waazya echitekiso mi ne sima lizungite. Cware ngaye a menji ahara? ¹² Kali oli munene, kwe shwetu Jakobo, ozyo natuha elisima mi momo nanywa neye, nabanakwe nezi munantu zakwe?'' ¹³ Jesu aku mutava ye, ''Yenshe ozyo anywa mwaa menji narafwa enyota hape, ¹⁴ ko ozyo anywa mu menji awo ndiha kali nafwe enyota hape. Mi kavulyaho, mi menji awo ndi muha mbuabe eziba enene kwakwe, kumutwara kuvuharo kavumani.'' ¹⁵ O mukentu aku mutava, Akutekeha, ndihe kwawo menji okutiye nandi reke kufwa enyota nokezya kuteka menji kunu.'' ¹⁶ Jesu aku amba kwakwe, ''Yende, kakuwe mukwame wako, mi oka boore kunu.'' ¹⁷ O mukentu aku mutava noku amba kwakwe, ''Ndaazya mukwame.'' Jesu aku mutava, ''No ambi nenja, 'Ndaazya mukwame,' ¹⁸ Kakuli kokwesi a bakwame be anjaa, mi nozyo akwesi hanu kali mukwame wako. Ezo no ambi nzahawa.'' ¹⁹ O mukentu aku amba kwakwe, ''Akutekeha, Ndibwene oli muporofita. ²⁰ Bashukurwetu niva raperera heli rundu, kono ewe o amba ye chibaka ckoku raperala ndi Jerusarema.'' ²¹ Jesu aku mutava, ''Zumine zangu, mukentu, okutiye ikezya enako eyo nimwa kurapera Tata kali heli rundu kapa mwa Jerusarema. ²² O rapera ezo kozyi. Tu rapera ezo tuzyi, kakuli epuruso nja Majuda. ²³ Nanga kwina vulyaho, enako ikezya, mi mpoina hanu, aho a barapeli beniti navara rapera Tata mu ruho ne niti, kakuli Tata ashaka bantu bovulyaho okuva varapeli vakwe. ²⁴ Nyambe muzya, a vantu va murapera vavotere ku murapera ko ruho ne niti.'' ²⁵ O mukentu aku amba kwakwe, ''Ndizyi ye Messia akezya (ozyo akuiwa Kiresite). Shake nakezye nara tu torokera zintu zonshe.'' ²⁶ Jesu aku mutava, ''Ndime, ozyo a amba kwako.'' ²⁷ Mwinako yiyo a bazyiizwa bakwe vokuhura. Cware kavakomoketwa aho kaamba no mukentu, kono kwaazya ozyo na amba, ''Chinji mushaka?'' kapa ''Chinji aho o amba neye?'' ²⁸ Cware o mukentu aku reka e chitekiso chakwe, noku voora kwi toropo, noka amba ku vantu, ²⁹ ''Mukezye, mubone o mukwame nandi sumwini zonshe zangu ezo ndatenda. Kaiwoli kuva Kiresite, haha mbovulyaho?'' ³⁰ Vokuzwa mwi toropo nokezya kwakwe. ³¹ Mwi nako yiyo, a bazyiizwa bakwe kava mujingiza, ye, ''Rabbi, lye. ³² ''Kono aku batava, ''Ndikwesi zilyo zokulya ezo mwaazya kuzyi.'' ³³ Cware a bazyiizwa bokuli ambira, ''Kwaazya ozyo namu reteli ezilyo, kapa bana kareti?'' ³⁴ Jesu aku vatava ye, ''Ezilyo zangu kutenda ezo ashaka ozyo naka ndituma oku maninikiza mutendo wakwe. ³⁵ Mwasha ambi ye, 'Kwina emyezi yone mi oku zyangura kuhure'? Ndi amba kwenu, mutonde kwiwuru mi mubone amawa, kakuli sheya kwani enako yoku zyangura. ³⁶ Yenshe ozyo a zyangura nara wana chimwinya mi a shanganisa eziyango zo vuharo kavumani, okutiye ozyo akuna nozyo azyangura nabalitembere hantu honke. ³⁷ Ko muambiro owo, 'Zyumwinya abyira, mi zyumwi azyangura; ngwa hawa. ³⁸ Ninda mituma okezya kuzyangura ezo kali nimwatenda. Bamwinya niva tenda o mutendo, enwe nimwa kavira mu mitendo yavo. ³⁹ Bana vungi bwa bantu ba Samaria abo kavakara mwina mu mureneñi niva zumina kwakwe kevaka lyo muambiro wo mukentu, ''Nandi sumwini zonshe ezo ndatenda.'' ⁴⁰ Cware vantu va Samaria bokezya kwakwe noku muta ye akare navo, mi naakara navo mazyuva ovire. ⁴¹ Vangi bamwinya niva zumina kevaka lyezywi lyakwe. ⁴² Boku amba ku mukentu, ''Katushi zumini kevaka lyo kutiye nozi ambi, kono kezo twashuwi tuveni, mi tuzyi ye ozyo ndo Muhazi we fasi.'' ⁴³ Aho kuhita awo mazyuva aku nanuka mo kuya kwa Galireya. ⁴⁴ Kakuli Jesu shaamba ye o muporofita ka kutekiwa mu chishi chakwe. ⁴⁵ Aho kezya kuhura mwa Galireya, bena Galireya niva mutambura. Niva vona zonshe ezo natenda mwa Jerusarema mwi nako ye mikiti, kakuli navo niva yako ku mikiti. ⁴⁶ Cware akezya mwa Cana yamwa Galireya omo nazora a menji kuatenda e waine. Kakwina o mukuru weshika lyo nfunu mwa Kapenauna shi mwana ozyo karwara. ⁴⁷ Aho shashuwa ye Jesu nakezyi kwa Galireya kazwa kwa Judea, nayenda kwa Jesu noka mukumbira ye ayende aka hoze mwane, ozyo shikena hafwihi nokufwa. ⁴⁸ Jesu aku amba kwakwe ye, ''Mbita shake ovone ezisupo nezo zikomona, kali shake o zumine.'' ⁴⁹ We shika lyo nfumu mpaho mutaye, ''Ewe okutekeha, kezye mwanangu nashini kufwa.'' ⁵⁰ Jesu aku amba kwakwe, ''Yende. Mwano ahara.'' O Mukwame aku zumina ezo amba Jesu kwakwe, akuzwaho nakaya. ⁵¹ Aho kakaya, a bakana bakwe boku shangana, noku sumwina ye mwane ahara. ⁵² Aku babuza e nako eyo natangi kulishuwa nenja. Boku mutava ye, ''Mwi nako ye anjaa nito vire zyona oku hisa muvili nikwa muzwa.'' ⁵³ Cware eshi aku zyiva ye nje nako yiyina namuta Jesu, ''Mwano ahara.'' Haho eye nive njuwo yakwe bonshe niva zumina. ⁵⁴ Echi chisupo chabili echo natenda Jesu aho azwa mwa Judea kuya kwa Galireya.