¹ Paulusi, omu apositora wa Jeso Kiresite ko kuya omo ashakira Nyambe, ku bantu ba Nyambe abo ba chenete mwa Ephesusi nabo ba sepahara kwa Jeso Kiresite. ² Chishemo kwenu ne mpore yizwa kwa Nyambe Shwetu no Nfumu Jeso Kiresite. ³ Nyambe ne Shi wa Nfumwetu Jeso Kiresite ba rumbwa, ozyo na tu fuyaura ke nfuyauzi yo muzya yonshe yina mu zibaka ze wiru kwa Kiresite. ⁴ Nyambe na tusharura kwakwe kuzwa ku matangiro e fasi, o kute ye tube ba chenete no kusha nyanswa mu mensho akwe. ⁵ Nyambe ka tu rukiseze a katanzi ye tube bana ba jobora ka Jeso Kiresite, kokuya ko ku mutabisa chaha omo a shakira. ⁶ O kuañurwa kwetu ni kwaba mu kutemba e chishemo chakwe chirotu echo na tuha kabulyo kozyo a shaka. ⁷ Ka Jeso Kiresite twina o kuhazwa mu maroha akwe no ku kwatirwa e zibbi, kokuya ke chishemo chakwe ka chimani. ⁸ Na ha echi chishemo hawiru lyetu ko kuzyiba no ku shuwisisa. ⁹ Nyambe na zyibahaza kwetu e baka li lizikite lyomo a shakira, kokuya kezo kazi mutabisa, mi na lisunda mwi njira ya Kiresite. ¹⁰ E mitendo ya Kiresite kaili ntukiso yo ku zyuziliza kwe nako, o kureta e zintu zonshe hantu honke, zonshe zintu muwiru na hanshi, mwinshi yo muyendesi yenke, nanga Kiresite. ¹¹ Kwa Kiresite nitwa ketiwa kuba ba joboli. Nitwa sharurwa a katanzi kokuya kezo ka azyara ozyo a tenda e zintu zonshe kuya ke baka lyomo a shakira. ¹² Nyambe na tuketa okuba bajoboli okuti ye netube be ntanzi kuba ne nsepo yi gorete kwa Kiresite, okutiye netu halire ku mutemba ke nkanya yakwe. ¹³ Kwa Kiresite, nenwe bulyaho, aho mushuwa ezywi lye niti, e evangeli yo kuhazwa kwi kwenu, mi nimwa zumina kwakwe no ku dintwa no Muzya wu Chenete nimwa sepiswa. ¹⁴ O Muzya wu Chenete nchisupo cho kujobora kwetu mani netu chi hindilire kuba chetu, mu kutembwa kwe nkanya yakwe. ¹⁵ Kebaka lili, shinga ninda shuwa ze ntumero yako ku Nfumu Jeso ne rato lyako ku bantu ba chenete ba Nyambe, ¹⁶ Kali ninda reka oku litumera kwa Nyambe kenu handishi mi kuwa mwi ntapero zangu. ¹⁷ Ndi rapera kute ye Nyambe wa Nfumwetu Jeso Kiresite, e shi we tubo, nara miha o muzya wo kuzyiba no kushuwisisa kuhazwa kwakwe. ¹⁸ Ndi rapera kute ye a mensho e myozyo yenu a yaruke, okuti ye muzyibe e nsepo yi gorete oko na mikuwira no bungi bwe tubo lyi joborwa mukati ka bantu ba chenete ba Nyambe. ¹⁹ Mi mu ntapero zangu ndi kumbira kute ye nemu zyibe o bunene bwa manta akwe kwetu tu zumina, kokuya ko mutendo wa manta akwe a gorete. ²⁰ Aa manta a swana awo na tendesa Nyambe kwa Kiresite aho na mubusa ku bafu noku mukalika ku anja lya malyo akwe mu zibaka zo kuwiru. ²¹ Ka kalikite Kiresite kuhita mirawo na babusi na manta oku busa he wiru lye zimunya, na mazina onshe nitwa wulika . Kali nkute ye Kiresite nara busa bulyo mwayinu nako, kono nomwi nako yi shikezya. ²² Nyambe na bika e zintu zonshe mu maanja a Kiresite mi na muha ku nkereke ye ndo muyendesi we zintu zonshe. ²³ E nkereke ngo mubili, mu kuzyura kwakwe ozyo aha o buharo ku zintu zonshe.